ବିଶ୍ୱକପରେ ବିରାଟ ବାହିନୀ ପାଇଁ ଆଗକୁ ବଡ ଚ୍ୟାଲେଞ୍ଜ । ଆସନ୍ତା ୧୦ ଦିନରେ ଭାରତର ୪ଟି ଗୁରୁତ୍ୱପୂର୍ଣ୍ଣ ମ୍ୟାଚ୍ ।
କନକ ବ୍ୟୁରୋ : ବିଶ୍ୱକପ୍ କ୍ରିକେଟରେ ଭାରତ ପାଇଁ ଆଗକୁ ଆସୁଛି ଅଧିକ ଚ୍ୟାଲେଂଜ । ଆସନ୍ତା ୧୦ ଦିନ ମଧ୍ୟରେ ନିଜର ଅବଶିଷ୍ଟ ୪ଟି ମ୍ୟାଚ୍ ଖେଳିବ ଟିମ୍ ଇଣ୍ଡିଆ । ଗୁରୁବାର ୱେଷ୍ଟ ଇଣ୍ଡିଜକୁ ଭେଟିବା ପରେ ୩୦ ତାରିଖରେ ଆୟୋଜକ ଇଂଲଣ୍ଡ, ଜୁଲାଇ ୨ରେ ବାଂଲାଦେଶ ଏବଂ ଜୁଲାଇ ୬ ତାରିଖରେ ଶ୍ରୀଲଙ୍କା ବିରୋଧରେ ମ୍ୟାଚ୍ ଖେଳିବ ଭାରତ । ତେବେ ଲଗାତାର ମ୍ୟାଚ ଖେଳି ଭାରତୀୟ ଦଳକୁ ଧୈର୍ଯ୍ୟ, ସହନଶୀଳତା ଓ କୌଶଳର କଡା ପରୀକ୍ଷା ଦେବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟ ଦଳଗୁଡିକ ଠାରୁ ବିଳମ୍ବରେ ଅଭିଯାନ ଆରମ୍ଭ କରିଥିବା ଟିମ୍ ଇଣ୍ଡିଆ ଆଫଗାନିସ୍ଥାନ ବିପକ୍ଷରେ କଡା ମୁକାବିଲା ଛଡା ଅନ୍ୟ ୪ଟି ମ୍ୟାଚରେ ଚମତ୍କାର ପ୍ରଦର୍ଶନ କରିଥିଲା । ପ୍ରତି ମ୍ୟାଚରେ ଆଧିପତ୍ୟ ଜାହିର କରିଥିଲା । କିନ୍ତୁ ଆଫଗାନିସ୍ଥାନ ମ୍ୟାଚରେ ଦଳର ଦୋଷ ଦୁର୍ବଳତା ପଦାକୁ ଆସିଥିଲା । ତେବେ ବର୍ମିଂହାମରେ ଖେଳାଯିବାକୁ ଥିବା ଭାରତ-ଇଂଲଣ୍ଡ ମ୍ୟାଚ୍ ଚଳିତ ବିଶ୍ୱକପର ଆଉ ଏକ ପ୍ରତୀକ୍ଷିତ ମ୍ୟାଚ । ଘରୋଇ ପରିବେଶରେ ଭାରତକୁ ପରାସ୍ତ କରିବା ପାଇଁ ନିଶ୍ଚୟ ଇଂଲଣ୍ଡ ଚେଷ୍ଟା କରିବ । ଏହି ବିଜୟ ସେମାନଙ୍କ ପାଇଁ ସେମିଫାଇନାଲ ବାଟ ଫିଟାଇପାରେ । ସେପଟେ ପ୍ରତିମ୍ୟାଚ ଭାରତ ପାଇଁ ଅଧିକ ଚ୍ୟାଲେଂଜ ସୃଷ୍ଟି କରିବ । ବାଂଲାଦେଶର ସଫଳତମ ଅଲରାଉଣ୍ଡର ସକିବ ଅଲ୍ ହାସନ୍ ଭାରତକୁ ଆସନ୍ତା ମ୍ୟାଚ୍ ପାଇଁ ଚେତାବନୀ ଦେଇଛନ୍ତି । ଭାରତର ବିଜୟ ରାସ୍ତାରେ ବାଂଲାଦେଶ କଂଟା ହୋଇ ଠିଆ ହେବ ବୋଲି ସେ କହିଛନ୍ତି ।