କନକ ବ୍ୟୁରୋ : ମୁକୁଳା ଡ୍ରେନରେ ପଡି ଚାଲିଗଲା ଜୀବନ । ଭୁବନେଶ୍ୱରର ପଣ୍ଡା ପାର୍କ ବସ୍ତି ନିକଟରେ ଯାଇଥିବା ପିଡବ୍ଲୁଡି ବିଭାଗର ୨ଶହ ଫୁଟିଆ ମାଷ୍ଟର ପ୍ଲାନ ରାସ୍ତା ସଂଲଗ୍ନ ମୁକୁଳା ଡ୍ରେନରେ ପଡି ପ୍ରାଣ ହରାଇଛନ୍ତି ଜଣେ ବୃଦ୍ଧ । ମୃତକ ଜଣକ ଗଂଜାମ ଜିଲ୍ଲା ଦିଗପହଣ୍ଡି ବ୍ଲକ ବିଏଲଏନପୁରର ନନ୍ଦିଆ ନାୟକ ବୋଲି ଜଣାପଡିଛି । ସେ ତାଙ୍କ ବଡଭାଇଙ୍କ ଶୁଦ୍ଧିକ୍ରିୟାରେ ଯୋଗଦେବାକୁ ଆସିଥିବାବେଳେ ନିଜେ ଏପରି ଦୁର୍ଘଟଣାର ଶିକାର ହୋଇ ପ୍ରାଣ ହରାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭୋର ପ୍ରାୟ ସାଢେ ତିନିଟା ବେଳେ ସେ ପରିଶ୍ରା ପାଇଁ ବାହାରକୁ ଆସିଥିବାବେଳେ ଘର ସମ୍ମୁଖ ମୁକୁଳା ଡ୍ରେନରେ ଖସିପଡି ବେହୋସ ହୋଇଯାଇଥିଲେ । ଫଳରେ ସେ ସାହାଯ୍ୟ ପାଇଁ ମଧ୍ୟ କାହାକୁ ଡାକିପାରିନଥିଲେ । ସକାଳ ୫ଟା ବେଳେ ଘରଲୋକ ଦେଖି ତାଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତି କରିଥିଲେ । ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ଚିକିତ୍ସିତ ଅବସ୍ଥାରେ ତାଙ୍କ ମୃତ୍ୟୁ ଘଟିଛି ।
ତେବେ ଏହା ପ୍ରଥମ କଥା ନୁହେଁ । ରାଜଧାନୀରେ ମ୍ୟାନ ହୋଲ ଯୋଗୁଁ ଲୋକେ ବାରମ୍ବାର ଏପରି ଅସୁବିଧାର ସମ୍ମୁଖୀନ ହେଉଛନ୍ତି । କିଛି ଦିନ ପୂର୍ବରୁ ମଧ୍ୟ ଭୁବନେଶ୍ୱରରେ ମ୍ୟାନହୋଲରେ ପଡି ବୃଦ୍ଧା ଗୁରୁତର ଭାବେ ଆହତ ହୋଇଥିଲେ । ପରେ ଚିକିତ୍ସା ପାଇଁ ତାଙ୍କୁ ମେଡ଼ିକାଲରେ ଭର୍ତ୍ତି କରାଯାଇଥିଲା । ୨୫ ଅଗଷ୍ଟ ପ୍ରାୟ ସମୟ ରାତି ୮ଟାରେ ଜଣେ ୭୦ ବୟସର ବୃଦ୍ଧା ଦୁଃଖୀ ସେଠୀ ରାସ୍ତାରେ ଯାଉଥିବା ସମୟରେ ମ୍ୟାନହୋଲରେ ପଡିଯାଇଥିଲେ । ଦୀର୍ଘ ସମୟଧରି ହୋଲ ଭିତରେ ଛଟପଟ ହୋଇଥିଲେ ବୃଦ୍ଧା । କିନ୍ତୁ ବୃଦ୍ଧା ଦୁଃଖୀ ସେଠୀଙ୍କର କେହି ଖୋଜ ଖବର ପାଇନଥିଲେ । ପରେ ସକାଳୁ ଖବର ପାଇ ଅଗ୍ନିଶମ କର୍ମଚାରୀ ପହଂଚି ଉଦ୍ଧାର କରିଥିଲେ । ଦୀର୍ଘ ୧୨ ଘଂଟା ପରେ ଅତି ସାବଧାନତାର ସହ ଉଦ୍ଧାର ହୋଇଥିଲେ ବୃଦ୍ଧା ଜଣକ ।
ସ୍ମାର୍ଟ ସିଟିର ମାନ୍ୟତା ପାଇଥିବା ସ୍ମାର୍ଟ ହୋଇପାରିନି ଭୁବନେଶ୍ୱର । ଲୋକେ ବିଭିନ୍ନ ସମୟରେ ଅଭିଯୋଗ କରୁଥିଲେ ହେଁ ଅବସ୍ଥା ସୁଧୁରି ପାରୁନି । ବାରାମ୍ବାର ଏପରି ଘଟଣା ଘଟୁଛି କିନ୍ତୁ ସ୍ୱରେଜ ବିଭାଗ ପକ୍ଷରୁ କୈାଣସି ଦୃଷ୍ଟି ଦିଆଯାଉନି ।