କନକ ବ୍ୟୁରୋ : ଆଜିଠୁ ଦୁଇଦିନିଆ ଭାରତବନ୍ଦ । ଆଜିଠାରୁ କେନ୍ଦ୍ରୀୟ ଶ୍ରମିକ ସଂଗଠନ ଦୁଇଦିନିଆ ଭାରତ ବନ୍ଦ ଡାକରା ଦେଇଛି । ଏହି ବନ୍ଦ ଆଜିି ଅର୍ଥାତ ୮ ଓ ୯ ତାରିଖ ଦୁଇଦିନ ଧରି ଚାଲିବ । ଦେଶର ବାମପନ୍ଥୀ ଚାଷୀ ସଂଗଠନଗୁଡ଼ିକ ମଧ୍ୟ ଏଥିରେ ସାମିଲ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଜି ସକାଳ ୬ଟାରୁ ୧୦ ତାରିଖ ସକାଳ ୬ଟା ଯାଏଁ ୪୮ ଘଣ୍ଟା ପାଇଁ ଏହି ଧର୍ମଘଟ ହେବ । ଏଥିରେ ଆଇଏନଟିୟୁସି, ଏଆଇଟିୟୁସି, ଏଚଏମଏସ, ସିଟୁ, ଏଆଇୟୁଟିୟୁସି ଭଳି ୧୦ଟି କେନ୍ଦ୍ରୀୟ ଶ୍ରମିକ ସଂଗଠନ, କେନ୍ଦ୍ର ଓ ବିଭିନ୍ନ ରାଜ୍ୟ ସରକାରଙ୍କ କର୍ମଚାରୀ ସଂଘ, ବ୍ୟାଙ୍କ ଓ ବୀମା କର୍ମଚାରୀଙ୍କ ସଂଘ ସମେତ ଜାତୀୟସ୍ତରର ବିଭିନ୍ନ ସ୍ୱାଧୀନ ଶ୍ରମିକ ଓ କର୍ମଚାରୀ ସଂଗଠନ ଏଥିରେ ସାମିଲ୍ ହୋଇଛନ୍ତି । ଭାରତବନ୍ଦ ଯୋଗୁ ବଜାର ଓ ଅନ୍ୟ କ୍ଷେତ୍ର ମଧ୍ୟ ପ୍ରଭାବିତ ହେବାର ଆଶଙ୍କା ରହିଛି । କେନ୍ଦ୍ର ସରକାରଙ୍କ ତ୍ରୁଟିପୂର୍ଣ୍ଣ ନୀତି ବିରୋଧରେ ଶ୍ରମିକ ସଂଗଠନ ଏହି ବନ୍ଦ ଡାକରା ଦେଇଛି ।
ସାରା ରାଜ୍ୟରେ ସକାଳୁ ସକାଳୁ ବନ୍ଦର ପ୍ରଭାବ ଦେଖିବା ପାଇଁ ମିଳିଛି । ରାସ୍ତାଘାଟ ପ୍ରାୟତଃ ଶୂନଶାନ୍ । କଟକ, ଭୁବନେଶ୍ୱର ଓ ରାଉରକେଲା, ବାଲେଶ୍ୱର, ସମ୍ବଲପୁର, ବ୍ରହ୍ମପୁର ଓ ପୁରୀରେ ବନ୍ଦର ପ୍ରଭାବ ଅଧିକ ଦେଖିବା ପାଇଁ ମିଳୁଛି । ବନ୍ଦ ଯୋଗୁଁ ରାଜ୍ୟରେ ଗାଡ଼ି ଚଳାଚଳ ବାଧାପ୍ରାପ୍ତ ହେବାସହ ବିଭିନ୍ନ ସ୍ଥାନରେ ରେଳରୋକ କରିଛନ୍ତି ଲୋକେ । ରାଜ୍ୟର ସମସ୍ତ ସ୍କୁଲ, କଲେଜ ବନ୍ଦ ହୋଇଛି ।
ସୂଚନାଯୋଗ୍ୟ ଶ୍ରମିକ ସଂଗଠନର ଅଭିଯୋଗ ହେଲା, ନୋଟବନ୍ଦୀ, ଜିଏସଟି ଯୋଗୁ ବ୍ୟବସାୟୀଙ୍କୁ ବହୁତ ଅସୁବିଧା ମଧ୍ୟରେ ବ୍ୟବସାୟ କରିବାକୁ ପଡୁଛି । ସେପଟେ ଭାରତବନ୍ଦକୁ ବିଜେଡ଼ି ଓ କଂଗ୍ରେସ ସମର୍ଥନ କରିଛି ।