ତାତି ବଢାଉଛି ଭଦ୍ରକ ରାଜନୀତି । ହ୍ୟାଟ୍ରିକ୍ ମାରିବାକୁ ବିଜେଡି କଲବଲ, କାହା ମୁଣ୍ଡରେ ଶିରିପା ପାଇଁ ବାଛିବେ ବିଜେପି-କଂଗ୍ରେସ ?
କନକ ବ୍ୟୁରୋ: ସାଧାରଣ ନିର୍ବାଚନ ନେଇ ତାରିଖ ଘୋଷଣା ପରେ ରାଜ୍ୟ ରାଜନୀତି ସରଗରମ । ଏପ୍ରିଲ ୨୯ ତାରିଖରେ ହେବାକୁଥିବା ଚତୁର୍ଥ ପର୍ଯ୍ୟାୟ ଲୋକସଭା ନିର୍ବାଚନରେ ଓଡ଼ିଶାର ୬ଟି ଲୋକସଭା ଓ ଏହା ଅଧିନରେ ଥିବା ୪୨ଟି ବିଧାନସଭା କ୍ଷେତ୍ରରେ ହେବ ମତଦାନ । ସେଥି ମଧ୍ୟରେ ରହିଛି ଭଦ୍ରକ ଜିଲ୍ଲା ସଂସଦୀୟ କ୍ଷେତ୍ରର ଭଦ୍ରକ ବିଧାନସଭା ନିର୍ବାଚନମଣ୍ଡଳୀ । ଯାହାକୁ ନେଇ ଏଠାରେ ଏବେ ରାଜନୈତିକ ଛକାପଞ୍ଝା ଦେଖିବାକୁ ମିଳିଛି । ଉଭୟ ବିଜେଡି ଓ ବିଜେପି ଏହି ଆସନକୁ ନିଜ ଦଖଲକୁ ନେବାକୁ ଅଣ୍ଟା ଭିଡିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜିଲ୍ଲା ସଦର ମହକୁମାରେ ଏଇ ନିର୍ବାଚନ ମଣ୍ଡଳୀ ହୋଇଥିବାରୁ ଏହା ଉପରେ ଉପରେ ସବୁ ରାଜନୈତିକ ଦଳର ଆଖି । ଗତ ୨୦୦୯ ଓ ୨୦୧୪ ନିର୍ବାଚନ ବେଳେ ଏଇ ଆସନରେ ପୂର୍ବତନ ମନ୍ତ୍ରୀ ଯୁଗଳ କିଶୋର ପଟ୍ଟନାୟକ ବିଜେଡି ଦଳରୁ ଟିକଟ ପାଇ ଦୁଇ ଦୁଇଥର ବିଧାୟକ ହୋଇଛନ୍ତି । ଗତ ୨୦୧୪ ନିର୍ବାଚନରେ ଭଦ୍ରକ ଆସନରୁ ଯୁଗଳ ବାବୁ ବିଜେଡି ଦଳରୁ ତାଙ୍କର ଦ୍ବିତୀୟ ଇନିଂସ ଆରମ୍ଭ କରିଥିଲେ । ଏବଂ ୮୦ ହଜାର ୩୩୩ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ । ତାଙ୍କର ନିକଟତମ ପ୍ରତିଦ୍ୱନ୍ଦୀ କଂଗ୍ରେସର ନରେନ ପଲେଇ ଦ୍ବିତୀୟ ସ୍ଥାନରେ ରହିଥିବା ବେଳେ ବିଜେପି ପ୍ରାର୍ଥୀ ଡା. ପ୍ରଦୀପ ନାୟକ ତୃତୀୟ ସ୍ଥାନରେ ରହିଥିଲେ ।
ବିଜେଡି ପାଇଁ ଏଠାରୁ କିଏ ପ୍ରାର୍ଥୀ ହେବ ତାକୁ ନେଇ କଳ୍ପନାଜଳ୍ପନା ଲାଗି ରହିଛି । କାରଣ ଲଗାତର ଦୁଇଥର ବିଧାୟକ ହୋଇ ବିଜେଡି ଦଳରେ ଯୁଗଳ ନିଜର ସ୍ଥିତି ଜାହିର କରିଥିବା ବେଳେ ଏବେ ତାଙ୍କର ବୟସାଧିକ କାରଣରୁ ସେ ଆଉ ପ୍ରତ୍ୟକ୍ଷ ରାଜନୀତିକୁ ଆସିବେ ନାହିଁ ବୋଲି ଗଣମାଧ୍ୟମ ଆଗରେ ପ୍ରକାଶ କରିଛନ୍ତି । ତେବେ ଯୁଗଳଙ୍କ ସ୍ଥାନରେ ଆସନ୍ତା ୨୯ ତାରିଖରେ ହେବାକୁଥିବା ଶେଷ ପର୍ଯ୍ୟାୟ ନିର୍ବାଚନରେ ଦଳରୁ ତାଙ୍କ ପୁତ୍ର ତଥା ଜିଲ୍ଲା ବିଜେଡିର ଉପସଭାପତି ଅସିତ ପଟ୍ଟନାୟକଙ୍କ ନାମକୁ ନେଇ ଅଧିକ ଚର୍ଚ୍ଚା ହେଉଛି । ଅସିତଙ୍କ ବ୍ୟତୀତ ପୂର୍ବତନ ଜିଲ୍ଲାପରିଷଦ ଅଧ୍ୟକ୍ଷ ଜଗନ୍ନାଥ ସ୍ବାଇଁ, ଯୁବନେତା ସଂଜୀବ ମଲ୍ଲିକଙ୍କ ନାମକୁ ନେଇ ଚର୍ଚ୍ଚା ହେଉଛି । ତେବେ ବିଜେଡି ସୁପ୍ରିମୋ ଏଯାବତ୍ ଭଦ୍ରକ ବିଧାନସଭା କ୍ଷେତ୍ରରୁ କାହାକୁ ଟିକଟ ମିଳିବ କିଛି ସଂକେତ ଦେଇ ନାହାନ୍ତି ।
ଅନ୍ୟପଟେ କଂଗ୍ରେସ ତରଫରୁ କିଏ ଭଦ୍ରକ ବିଧାନସଭା କ୍ଷେତ୍ରର ପ୍ରାର୍ଥୀ ହେବ ତାହା ଆସନ୍ତା ୧୭ ତାରିଖ ମଧ୍ୟରେ ପ୍ରକାଶ କରାଯିବ ବୋଲି କଂଗ୍ରେସ ଶିବିରରୁ ଶୁଣିବାକୁ ମିଳୁଛି । ଏପରିକ୍ଷେତ୍ରରେ କଂଗ୍ରେସରେ ଚର୍ଚ୍ଚାରେ ଅଛନ୍ତି ଜିଲ୍ଲା କାର୍ଯ୍ୟକାରୀ ସଭାପତି ନଳିନୀକାନ୍ତ ମହାନ୍ତି ଓ ପୂର୍ବତନ ବିଧାୟକ ନରେନ ପଲେଇ । ଏଇ ଦୁଇନେତାଙ୍କ ମଧ୍ୟରୁ କଂଗ୍ରେସର କେନ୍ଦ୍ରୀୟ ଟିମ୍ କାହା ନାମରେ ମୋହର ମାରିବେ ତାହାକୁ ନେଇ ଦ୍ୱନ୍ଦରେ ଉଭୟଙ୍କ ସମର୍ଥକ ।
ସେହିପରି ବିଜେପିରୁ ପ୍ରଦୀପ ନାୟକ, ରାଜୀବ ମହାନ୍ତି, ତୁଷାର ଜେନା ଓ ମନସ୍ମିତା ଖୁଣ୍ଟିଆଙ୍କ ନାମ ଚର୍ଚ୍ଚାରେ ରହିଥିବା ବେଳେ ବିଜେପି ପକ୍ଷରୁ ମଧ୍ୟ କାହାକୁ ଟିକଟ ମିଳିବ ସ୍ପଷ୍ଟ ହୋଇନାହିଁ । ଭଦ୍ରକ ସଦର ବିଧାନସଭା କ୍ଷେତ୍ର ଜିଲ୍ଲା ରାଜନୀତିର ପ୍ରମୁଖ କେନ୍ଦ୍ରସ୍ଥଳ ହୋଇଥିବା ବେଳେ ଏଇ ଆସନରୁ ସବୁ ଦଳ ମନ୍ତ୍ରଣା କରି ଭାବିଚିନ୍ତି ପ୍ରାର୍ଥୀ ଚୟନ କରିବେ ବୋଲି ଆଲୋଚନା ହେଉଛି ।