ଭାରତ ସରକାର ପ୍ରକାଶ କଲେ ଶ୍ରେଷ୍ଠ ବିଶ୍ୱବିଦ୍ୟାଳୟର ତାଲିକା ! ଆଇଆଇଟି ଚେନ୍ନାଇ ସବୁଠାରୁ ଭଲ ଇଂଜିନିୟରିଂ କଲେଜ, ସ୍ଥାନ ପାଇଲାନି ବାଣୀବିହାର
କନକ ବ୍ୟୁରୋ : କେନ୍ଦ୍ର ମାନବ ସମ୍ବଳ ମନ୍ତ୍ରାଳୟ ଜାରି କରିଛି ଦେଶର ଶ୍ରେଷ୍ଠ ବିଶ୍ୱବିଦ୍ୟାଳୟ ତାଲିକା । ତେବେ ଟପ୍ ୧୦୦ ତାଲିକାରେ ସ୍ଥାନ ପାଇନାହିଁ ଓଡିଶାର ପୁରାତନ ଶିକ୍ଷାନୁଷ୍ଠାନ ଉତ୍କଳ ବିଶ୍ୱବିଦ୍ୟାଳୟ । କିନ୍ତୁ ପ୍ରଥମ ଶହେ ବିଶ୍ୱବିଦ୍ୟାଳୟରେ ସ୍ଥାନ ପାଇଛନ୍ତି ଭୁବନେଶ୍ୱର ସ୍ଥିତ ଦୁଇଟି ଘରୋଇ ବିଶ୍ୱବିଦ୍ୟାଳୟ । ୨୪ତମ ସ୍ଥାନରେ ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟ ରହିଥିବା ବେଳେ କିଟ୍ ବିଶ୍ୱବିଦ୍ୟାଳୟ ୪୨ ତମ ସ୍ଥାନରେ ରହିଛି । ଏହା ସହ ୯୧ତମ ସ୍ଥାନରେ ରହିଛି ଓଡିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ । ଅନ୍ୟପଟେ ସାମଗ୍ରିକ ତାଲିକାରେ ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟ ୩୮ତମ ସ୍ଥାନରେ ରହିଥିବା ବେଳେ କିଟ୍ ବିଶ୍ୱବିଦ୍ୟାଳୟ ଜାତୀୟ ସ୍ତରରେ ୬୫ ତମ ସ୍ଥାନରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଏହା ସହ ଏହି ତାଲିକାରେ ଓଡିଶାରେ ସ୍ଥିତ ଦୁଇଟି ଜାତୀୟ ଅନୁଷ୍ଠାନ ଶ୍ରେଷ୍ଠ ଶହେ ତାଲିକାରେ ସ୍ଥାନ ପାଇଛି । ରାଉରକେଲା ସ୍ଥିତ ଜାତୀୟ ବୈଷୟିକ ପ୍ରତିଷ୍ଠାନ-ଏନଆଇଟି ୪୨ ତମ ସ୍ଥାନରେ ରହିଥିବା ବେଳେ ଭୁବନେଶ୍ୱର ଆଇଆଇଟି ୫୧ ତମ ସ୍ଥାନରେ ରହିଛି । ବିଶ୍ୱବିଦ୍ୟାଳୟ ତାଲିକାର ଶୀର୍ଷରେ ବେଙ୍ଗାଲୁରୁ ସ୍ଥିତ ଭାରତୀୟ ବିଜ୍ଞାନ ପ୍ରତିଷ୍ଠାନ- ଆଇଆଇଏସ ଶୀର୍ଷରେ ରହିଛି । ଏହି ତାଲିକାର ଦ୍ୱିତୀୟ ସ୍ଥାନରେ ରହିଛି ଜବାହରଲାଲ ନେହରୁ ବିଶ୍ୱବିଦ୍ୟାଳୟ- ଜେଏନୟୁ, ଦିଲ୍ଲୀ । ଅନ୍ୟପଟେ ସାମଗ୍ରିକ ତାଲିକାର ଶୀର୍ଷରେ ମଧ୍ୟ ରହିଛି ବେଙ୍ଗାଲୁରୁ ସ୍ଥିତ ଆଇଆଇଏସ । ଏହି ତାଲିକାର ଦ୍ୱିତୀୟରେ ରହିଛି ମାଡ୍ରାସ ଆଇଆଇଟି, ତୃତୀୟ ସ୍ଥାନରେ ରହିଛି ବମ୍ବେ ଆଇଆଇଟି ।