ନବୀନ ନିବାସରୁ ସିଦ୍ଧାନ୍ତଙ୍କୁ ଆସିଲା ଡ଼ାକରା ! ସୁପ୍ରିମୋଙ୍କ ସହ ଆଲୋଚନା କଲେ ବ୍ରହ୍ମପୁର ସାଂସଦ, କହିଲେ ଦଳ ସୁପ୍ରିମୋ ଚାହିଁଲେ ନିର୍ବାଚନ ଲଢିବି ।
କନକ ବ୍ୟୁରୋ: ନବୀନ ନିବାସରେ ବ୍ରହ୍ମପୁର ବିଜେଡି ସାଂସଦ ସିଦ୍ଧାନ୍ତ ମହାପାତ୍ର । ଅନେକ ଛକାପଞ୍ଝା ପରେ ଶେଷର ନବୀନ ନିବାସରୁ ଡ଼ାକରା ଆସିବା ପରେ ବିଜେଡି ସୁପ୍ରିମୋଙ୍କୁ ଭେଟିଛନ୍ତି ସିଦ୍ଧାନ୍ତ ମହାପାତ୍ର । ସାକ୍ଷାତ ପରେ ସିଦ୍ଧାନ୍ତ କହିଛନ୍ତି ଯେ, ସୁପ୍ରିମୋଙ୍କ ସହ ଏହା କେବଳ ସୌଜନ୍ୟ ମୂଳକ ସାକ୍ଷାତ ହୋଇଛି । ଆଗାମୀ ନିର୍ବାଚନରେ ଟିକେଟ୍ ପାଇବା ନେଇ ସିଦ୍ଧାନ୍ତ କହିଛନ୍ତି ଯେ, ଦଳର ସୁପ୍ରିମୋ ନବୀନ ପଟ୍ଟନାୟକ ଯାହା ନିଷ୍ପତି ନେବେ ତାକୁ ସମ୍ମାନ ଜଣାଇବି । ଦଳ ଯଦି ଚାହିଁବ ନିର୍ବାଚନ ଲଢ଼ିବି ନଚେତ୍ ଦଳ ପାଇଁ ପ୍ରଚାର କରିବି ବୋଲି କହିଛନ୍ତି ବ୍ରହ୍ମପୁର ସାଂସଦ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଟିକେଟ୍ ଯଦି ନମିଳେ ତେବେ ବିଜେପିରେ ସାମିଲ ହେବା ନେଇ ହେଉଥିବା ଚର୍ଚ୍ଚା ଉପରେ ଲକ୍ଷ୍ମଣରେଖା ଟାଣିଛନ୍ତି ସିଦ୍ଧାନ୍ତ । ଏବଂ କହିଛନ୍ତି କି, ମୁଁ କୌଣସି ଦଳ ସହ ଯୋଗାଯୋଗରେ ନାହିଁ । ଏହା ସୋସିଆଲ ମିଡ଼ିଆରେ ଚର୍ଚ୍ଚା ହେଉଛି । ଏହା କେବଳ ଗୁଜବ ବୋଲି କହିଛନ୍ତି ସିଦ୍ଧାନ୍ତ ।
ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ତାରିଖ ଯେତେ ପାଖାଉଛି ସେତେ ରାଜନୀତି ଉଷ୍ମ ହେବାରେ ଲାଗିଛି । ଗତ ଦୁଇଟି ସାଧାରଣ ନିର୍ବାଚନରେ ବ୍ରହ୍ମପୁର ଲୋକସଭା ଆସନରୁ ଦୁଇ ଦୁଇଥର ବିଜୟୀ ହୋଇ କଂଗ୍ରେସର ହେଭିୱେଟ୍ ଚନ୍ଦ୍ରଶେଖର ସାହୁଙ୍କୁ ପରାଜିତ କରିଥିବା ସିଦ୍ଧାନ୍ତଙ୍କୁ ଏଥର ଟିକେଟ୍ ମିଳିବ କି ନାହିଁ ତାକୁ ନେଇ କଳ୍ପନା ଜଳ୍ପନା ଲାଗିରହିଛି । କାରଣ ପୂର୍ବତନ କେନ୍ଦ୍ରମନ୍ତ୍ରୀ ଚନ୍ଦ୍ରଶେଖର ସାହୁ କ˚ଗ୍ରେସ ଛାଡି ବିଜେଡିରେ ଯୋଗଦେବାପରେ ବ୍ରହ୍ମପୁର ଲୋକସଭା କ୍ଷେତ୍ରକରେ ରାଜନୀତି ଗୋଳମାଳିଆ ହୋଇପଡ଼ିଛି ।