କନକ ବ୍ୟୁରୋ: ଚାଷୀଙ୍କ ଅକାଉଂଟକୁ ପୁଣି ଆସୁଛି କାଳିଆ ଟଙ୍କା । ଆସନ୍ତା ୨୨ ତାରିଖ ଚାଷୀଙ୍କୁ ମିଳିପାରେ ଦ୍ୱିତୀୟ ପର୍ଯ୍ୟାୟ କାଳିଆ ଟଙ୍କା । ଏଥିରେ ପ୍ରାୟ ୧୪ ଲକ୍ଷ କ୍ଷୁଦ୍ର ଓ ନାମମାତ୍ର ଚାଷୀ ଉପକୃତ ହେବେ । ସେହିପରି ଭୂମିହୀନ ଚାଷୀଙ୍କ ଖାତାକୁ ଆସନ୍ତା ୧୫ ତାରିଖରେ ପ୍ରୋତ୍ସାହନ ରାଶି ପଠାଇବେ ରାଜ୍ୟ ସରକାର । ପ୍ରଥମ ପର୍ଯ୍ୟାୟରେ ୪ରୁ ୫ଲକ୍ଷ ଭୂମିହୀନ ଚାଷୀଙ୍କୁ ୫ ହଜାର ଟଙ୍କା ଲେଖାଏଁ ପ୍ରୋତ୍ସାହନ ରାଶି ପଠାଇବେ । ଆଉ ଏସବୁ ଭିତରେ ପିଏମ୍ କିଷାନ୍ ଯୋଜନାରେ ଓଡ଼ିଶା ଚାଷୀଙ୍କୁ କେବେ ମିଳିବ ଟଙ୍କା ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ପର୍ଯ୍ୟାୟରେ ଚାଷୀଙ୍କ ଆକାଉଂଟକୁ ସଫଳତାର ସହ କାଳିଆ ଟଙ୍କା ପହଂଚିବା ପରେ ଦ୍ୱିତୀୟ ପର୍ଯ୍ୟାୟ ଟଙ୍କା ପଠାଇବା ପାଇଁ ପ୍ରକ୍ରିୟା ଚୁଡାନ୍ତ ହୋଇଛି । ସେହିପରି ଭୂମିହୀନ ଚାଷୀଙ୍କ ଜୀବନଧାରଣ ପାଇଁ ଘୋଷଣା ହୋଇଥିବା ସହାୟତା ରାଶି ଚାଷୀଙ୍କ ଖାତାକୁ ଯିବ ।
-ପ୍ରଥମରେ ୪ରୁ ୫ଲକ୍ଷ ଭୂମିହୀନ ଚାଷୀଙ୍କୁ ମିଳିବ ୫ହଜାର ଲେଖାଏଁ ପ୍ରୋତ୍ସାହନ ରାଶି
-ଆସନ୍ତା ୧୫ ତାରିଖରେ ଭୂମିହୀନ ଚାଷୀଙ୍କ ଖାତାକୁ ଯିବ ସହାୟତା ରାଶି
-୧୩ରୁ ୧୪ ଲକ୍ଷ କ୍ଷୁଦ୍ର ଏବଂ ନାମମାତ୍ର ଚାଷୀ ଦ୍ୱିତୀୟ ପର୍ଯ୍ୟାୟରେ ପାଇବେ କାଳିଆ ଟଙ୍କା
– ଆସନ୍ତା ୨୨ ତାରିଖ ଚାଷୀଙ୍କୁ ମିଳିପାରେ ଦ୍ୱିତୀୟ ପର୍ଯ୍ୟାୟ କାଳିଆ ଟଙ୍କା
କାଳିଆ ଯୋଜନାରେ କ୍ଷୁଦ୍ର ଏବଂ ନାମମାତ୍ର ଚାଷୀ ୫ ହଜାର ଟଙ୍କାର ଗୋଟିଏ କିସ୍ତି ଟଙ୍କା ପାଇସାରିଥିବା ବେଳେ ଭୂମିହୀନ ଚାଷୀଙ୍କୁ ୧୫ ତାରିଖରେ ମିଳିବ ପ୍ରଥମ ପର୍ଯ୍ୟାୟ ଟଙ୍କା ।
-ଭୂମିହୀନ ଚାଷୀଙ୍କୁ ଜୀବନଧାରଣ ପାଇଁ ପ୍ରଥମ ପର୍ଯ୍ୟାୟରେ ମିଳିବ ୫ ହଜାର ଟଙ୍କା
– ପର୍ଯ୍ୟାୟକ୍ରମେ ଭୂମିହୀନ ଚାଷୀଙ୍କୁ ମିଳିବ ମୋଟ ୧୨ ହଜାର ୫ଶହ ଟଙ୍କା
– ଚାଷୀମାନେ ଏହି ଟଙ୍କାରେ ଛେଳି, ବତକ, କୁକୁଡ଼ା, ଛତୁ ଏବଂ ମହୁ ଚାଷ କରିପାରିବେ
– ଜୀବନଧାରଣ ପାଇଁ ୭ଟି କ୍ଷେତ୍ରରେ ଏହି ଟଙ୍କାକୁ ବିନିଯୋଗ କରିପାରିବେ ଚାଷୀ
– ନିଜ ପସନ୍ଦ ଏବଂ ସୁବିଧା ମୁତାବକ ଟଙ୍କାକୁ ବିନିଯୋଗ କରିପାରିବେ ଭୂମିହୀନ ଚାଷୀ
ଏପଟେ ପ୍ରଧାନମନ୍ତ୍ରୀ କିଷାନ୍ ଯୋଜନାକୁ ରାଜ୍ୟ ସରକାର ସ୍ୱାଗତ କରିବା ସହ ଏଥିରେ ଭୂମିହୀନ ଚାଷୀଙ୍କୁ ସାମିଲ କରିବାକୁ ଅନୁରୋଧ କରିଛନ୍ତି ମୁଖ୍ୟମନ୍ତ୍ରୀ । ଯାହା ଉପରେ ପ୍ରତିକ୍ରିୟା ରଖିଛନ୍ତି ବିରୋଧୀ ଦଳ ନେତା । ଅନ୍ୟପଟେ ରାଜ୍ୟ ସରକାରଙ୍କ ପାଖରେ ଥିବା ତଥ୍ୟ ଅନୁସାରେ କେନ୍ଦ୍ରୀୟ ଯୋଜନା ଲାଗୁ କରିବାରେ ଅସୁବିଧା ନାହିଁ କହିଛନ୍ତି ଯୋଗାଣ ମନ୍ତ୍ରୀ ।
ରାଜନୀତିର ଏହି ବୟାନବାଜି ଭିତରେ ଗୋଟିଏ କଥା ସ୍ପଷ୍ଟ ଯେ, ୨୦୧୯ ନିର୍ବାଚନ ପୂର୍ବରୁ ଚାଷୀଙ୍କୁ କୌଣସି ଦଳ ବା ସରକାର ଅସନ୍ତୁଷ୍ଟ କରିବାକୁ ଚାହୁଁନାହଁନ୍ତି । ବୋଧେ ସେଇଥି ପାଇଁ କଂଗ୍ରେସ କୃଷି ଋଣ ଛାଡ କଥା କହୁଥିବା ବେଳେ ବିଜେଡି ଓ ବିଜେପି, ଚାଷୀଙ୍କ ପାଖକୁ ଟଙ୍କା ପଠାଇବା କଥା ଚିନ୍ତା କରିଛନ୍ତି ।