କନକ ବ୍ୟୁରୋ : ଆଜିକା ଦିନରେ ପ୍ରାୟତଃ ଶୁଣିବା ପାଇଁ ମିଳୁଛି ପିଲାମାନେ ବାପା ମାଙ୍କୁ ପଚାରୁ ନାହାନ୍ତି କିମ୍ବା ତାଙ୍କର ଉଚିତ ଯତ୍ନ ନେଉନାହାନ୍ତି । ଖବର କାଗଜରେ ପ୍ରତିଦିନ ଏପରି କିଛି ଖବର ଆସୁଛି । କେଉଁଠି ପିଲାମାନେ ଟଙ୍କା ପାଇଁ ବାପା ମା’ଙ୍କୁ ଘରୁ ବାହାର କରିଦେଲେଣି ତ ଆଉ କେଉଁଠି ବାପା ମାଙ୍କୁ ଅନାଥାଶ୍ରମ ଛାଡ଼ିି ଦେଉଛନ୍ତି । କିନ୍ତୁ ଏବେ ବି ଏମିତି ସନ୍ତାନ ଅଛନ୍ତି ଯିଏ ବାପାମା ପାଇଁ ସବୁ ତ୍ୟାଗ କରିବା ପାଇଁ ପ୍ରସ୍ତୁତ । ଯାହାଙ୍କୁ ଏ ଯୁଗର ଶ୍ରବଣ କୁମାର କହିଲେ ଅତ୍ୟୁକ୍ତି ହେବ ନାହିଁ । ଏମିତି ଜଣେ ବ୍ୟକ୍ତିି ହେଲେ କାର୍ତ୍ତିକ ।
Kanak News is now on WhatsApp
Join and get latest news updates delivered to you via WhatsApp
୭୦ ବର୍ଷୀୟ ବାପା, ୬୫ ବର୍ଷିୟ ମାଙ୍କୁ ଭାରରେ ବୋହି ବାରିପଦା କଚେରୀରେ ପହିଂଛନ୍ତି ମୋରଡା ଥାନା ମୋହନପୁରର କାର୍ତ୍ତିକ ସିଂ । ମିଛ ମାମଲା ଓ ବିଳମ୍ବିତ ନ୍ୟାୟ ପ୍ରକ୍ରିୟାକୁ ବିରୋଧ କରି ୪୦ କିଲୋମିଟର ବାଟ ଚାଲିଛନ୍ତି କାର୍ତ୍ତିକ । ପୁଅ କାନ୍ଧରେ ବାପା ମାଙ୍କୁ ଦେଖି ହତବାକ୍ ସମସ୍ତେ । ବାପା ଗୋରା ସିଂଙ୍କ ହାତରେ ରହିଛି ଖଣ୍ଡିଏ ବାଡି, ମା ମଲ୍ଲୀଙ୍କ ହାତରେ ଗୋଟିଏ ଥାଳି ଓ ଜାତୀୟ ପତାକା । ଏହି ଭାର ବୁହା ପଛରେ ରହିଛି ଏକ କୋହଭରା, ଯନ୍ତ୍ରଣା ଜର୍ଜରିତ କାହାଣୀ ।
କାର୍ତ୍ତିକଙ୍କ କଥାରୁ ଯାହା ଅନୁମାନ କରାଯାଉଛି, ସେ ମାନସିକ ସ୍ତରରେ ଗଭୀର ଆଘାତ ପାଇଛନ୍ତି । ଗୋଟିଏ ପଟେ ପୁଲିସର ଜୁଲମ୍ ଅନ୍ୟପଟେ ସାମାଜିକ ବାସନ୍ଦ, ତାଙ୍କୁ ମାନିସକ ସ୍ତରରେ ଭାଙ୍ଗି ଦେଇଛି । ଖାଲି ଏତିକି ନୁହେଁ ଏକ ମିଛ ମାମଲାରେ ବିଳମ୍ବିତ ନ୍ୟାୟ ପ୍ରକ୍ରିୟା କାର୍ତ୍ତିକଙ୍କ ଜୀବନକୁ ହତାଶ କରି ଦେଇଥିବା ସେ କୋହଭରା କଣ୍ଠରେ କହିଛନ୍ତି ।
ବୃଦ୍ଧାବସ୍ଥାରେ ବାପାମାଙ୍କ ସେବା କରିବାକୁ ପାଖରେ କେହି ନାହିଁ । ତାଙ୍କ ନାଁରେ ମିଛ ମାମଲା ଚାଲିଥିବାରୁ ୩୦ ବର୍ଷିୟ କାର୍ତ୍ତିକଙ୍କ ବିବାହ ହୋଇପାରୁନଥିବା ସେ କହିଛନ୍ତି । ଏଭଳି ସ୍ଥିତିରେ ତାଙ୍କୁ ମାନସିକ ସ୍ତରରେ ସହାଯ୍ୟ କରିବା ପ୍ରଶାସନ ଦାୟିତ୍ୱ ବୋଲି ସ୍ଥାନୀୟ ଲୋକ କହିଛନ୍ତି ।