ବଦଳିଲେ ବରଗଡ ଏସପି । ବିଜେପି କହିଥିଲା, ସରକାରଙ୍କ ଏଜେଂଟ ଭଳି କରୁଛନ୍ତି କାମ । ବଦଳିକୁ ନେଇ ରାଜନୀତି ଉଷ୍ମ ।
ବିଜେପୁର ଉପ-ନିର୍ବାଚନ ଆଗରୁ ବଡ ନିଷ୍ପତ୍ତି । ବରଗଡ ଏସପି ଜୁଗଳ କିଶୋରଙ୍କୁ ବଦଳାଇ ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ । ରାଜ୍ୟ ଗୃହ ବିଭାଗକୁ ଚିଠି ଲେଖି ନିର୍ବାଚନ ଅଧିକାରୀ, କାହାକୁ ବରଗଡ ଏସପି ଭାବେ ଦାୟିତ୍ୱ ଦିଆଯିବ, ସେନେଇ ତିନୋଟି ନାଁ ସୁପାରିଶ କରିବାକୁ କହିଛନ୍ତି । ଆଉ ଏହାପରେ ଗୃହ ବିଭାଗ ପୋଲିସ ଡିଜି ଡାକ୍ତର ରାଜେନ୍ଦ୍ର ପ୍ରସାଦ ଶର୍ମାଙ୍କୁ ଚିଠି ଲେଖି ତିନି ଅଫିସରଙ୍କ ନାଁ ମାଗିଛି । ଯେଉଁ ଆଇପିଏସ ଅଧିକାରୀଙ୍କ ନିର୍ବାଚନ ପରିଚାଳନାରେ ଅଭିଜ୍ଞତା ଥିବ, ସେମାନଙ୍କୁ ପ୍ରାଥମିକତା ଦିଆଯିବ । ତେବେ ନିର୍ବାଚନକୁ ଆଉ ୧୬ ଦିନ ଥିବା ବେଳେ ଜିଲ୍ଲା ଏସପି ବଦଳିବା ଏବେ ଚର୍ଚ୍ଚାର ବିଷୟ ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ତଳେ ରାଜ୍ୟ ବିଜେପିର ଏକ ପ୍ରତିନିଧି ଦଳ ମୁଖ୍ୟ ନିର୍ବାଚନ କମିଶନଙ୍କୁ ଭେଟି ନିର୍ବାଚନ ପରିଚାଳନାରେ ହେଉଥିବା ପକ୍ଷପାତିତା ବାବଦରେ ଅଭିଯୋଗ କରିଥିଲେ । ଯେଉଁଥିରେ ବିଜେପି କର୍ମୀଙ୍କୁ ହୋଇଥିବା ଗୁଳିମାଡ ମଧ୍ୟ ଉଲ୍ଲେଖ ଥିଲା । ସେହିଭଳି ମୋଦିଙ୍କ ମନ୍ କି ବାତ୍ ସମୟରେ ହୋଇଥିବା ଅପ୍ରିତୀକର ସ୍ଥିତି ବାବଦରେ ମଧ୍ୟ ବିଜେପି ଫୋରାଦ୍ ହୋଇଥିଲା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଏସପି ଓ ଜିଲ୍ଲାପାଳଙ୍କ ବାବଦରେ ଫେରାଦ୍ ହୋଇଥିଲେ । ଆଉ ଏହାପରେ ଏସପିଙ୍କୁ ବଦଳାଇ ଦିଆଯାଇଛି । ଗତ ୩୦ ତାରିଖରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିଜେପି ନେତା ଅରୁଣ ସିଂ, ଭୁପେନ୍ଦ୍ର ଯାଦବ୍, ସମ୍ବିତ ପାତ୍ର ଏବଂ ଓମ୍ ପାଠକ୍ ଦିଲ୍ଲୀରେ ମୁଖ୍ୟ ନିର୍ବାଚନ କମିଶନଙ୍କୁ ଭେଟି ବରଗଡ ଜିଲ୍ଲାପାଳ, ଏସପି, ବିଜେପୁର, ବରପାଲି ଓ ଗାଇସିଲଟ ବିଡିଓ ଓ ଅନ୍ୟ କିଛୀ ଅଧିକାରୀଙ୍କ ନାଁରେ ଅଭିଯୋଗ କରିଥିଲେ ।
ସୂଚନା ଅନୁସାରେ, ବରଗଡ ଜିଲ୍ଲାପାଳଙ୍କୁ ମଧ୍ୟ ବଦଳାଯିବାର ଯଥେଷ୍ଟ ସମ୍ଭାବନା ଅଛି । ଯଦିଓ ଏନେଇ କୈାଣସି ମହଲରୁ ସ୍ପଷ୍ଟ ସୂଚନା ସାମ୍ନାକୁ ଆସିନାହିଁ ତେବେ ପାୱାର କରିଡରରେ ଏହାକୁ ନେଇ ଜୋରଦାର ଚର୍ଚ୍ଚା ଚାଲିଛି । ଭୋଟଦାନର କିଛି ଦିନ ଆଗରୁ ଏହି ନିଷ୍ପତ୍ତି ରାଜ୍ୟ ରାଜନୀତିକୁ ଉଷ୍ମ କରିଛି ।