ଆଜି ସରିବ ବରଗଡ ଧନୁଯାତ୍ରା : ମଥୁରାରେ ମହାପ୍ରତାପି କଂସଙ୍କୁ ବଧ କରିବେ ଶ୍ରୀକୃଷ୍ଣ
କନକ ବ୍ୟୁରୋ : ଧନୁଯାତ୍ରାର ଦଶମ ଦିନରେ ମଥୁରାରେ ପହଂଚିଲେ ବନବିହାରୀ କୃଷ୍ଣ ଓ ଭାଇ ବଳରାମ । ମଥୁରାରେ ପ୍ରଭୁଙ୍କ ଭବ୍ୟ ସ୍ୱାଗତ କରାଯାଇଛି । ଚାରିଆଡ଼େ ହରି ଧ୍ୱନୀ, ହୁଳହୁଳି ଆଉ ପୂଜାର୍ଚ୍ଚାନ । ଆଦିମାତା ମନ୍ଦିରରେ ଥିବା ମଧୁବନ ତୋଟାରୁ ବାଙ୍କବିହାରୀ ଆରମ୍ଭ କରିଥିଲେ ମଥୁରା ଭ୍ରମଣ । ବାଟରେ ନୈବେଦ୍ୟ, ଫୁଲ, ଦୀପ, ଚନ୍ଦନ ଇତ୍ୟାଦିରେ ପୂଜା କରି ମଥୁରାବାସୀ ଶ୍ରୀକୃଷ୍ଣ, ବଳରାମଙ୍କୁ ସ୍ୱାଗତ କରିଥିଲେ । ଏହାସହ କଂସର ଆତଙ୍କରୁ ରକ୍ଷା କରିବା ପାଇଁ ନିବେଦନ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ମହାରାଜା କଂସ ଧନୁଯାତ୍ରାର ଦଶମଦିନରେ ନଗର ଭ୍ରମଣ କରିବା ସହ ରଂଗ ମହଲରେ ନାଚ ଗୀତର ମଜା ଉଠାଇଥିଲେ । ମହାରାଜା କଂସ ରାଜଦରବାରକୁ ପହଂଚି ନ୍ୟାୟ ବିଚାର କରିଥିଲେ । ଏହାପରେ ମହାରାଜା କଂସ ରାତ୍ରୀ ନିଦ୍ରାରେ ଥିବା ବେଳେ ସ୍ୱପ୍ନରେ ଭଗବାନ ଶ୍ରୀକୃଷ୍ଣଙ୍କୁ ଦେଖି ବ୍ୟତିବ୍ୟସ୍ତ ହୋଇ ପଡ଼ିଛନ୍ତି । କେତେବେଳେ କୃଷ୍ଣ ଦେବକୀ ଓ ବସୁଦେବଙ୍କ କୋଳରେ ଖେଳୁଛନ୍ତି ତ ଆଉ କେତେବେଳେ କଂସର ଛାତିରେ ଚଢି ତାଙ୍କୁ ବଧ କରୁଛନ୍ତି । ଏମତି କିଛି ସ୍ୱପ୍ନ ଦେଖି ହଠାତ୍ ମହାପ୍ରତାପି କଂସଙ୍କ ନିଦ ଭାଙ୍ଗିଯାଇଛି ଓ ସେ ଚମକି ପଡ଼ି ନିଜ ମନ୍ତ୍ରୀ ପରିଷଦକୁ ଜଣାଇଛନ୍ତି । ହେଲେ ମନ୍ତ୍ରୀ ଓ ସେନାପତି ମହାରାଜା କଂସଙ୍କୁ ଆଶ୍ୱସ୍ତି କରିଛନ୍ତି ।
ଏବେ ଅପେକ୍ଷା କେବଳ ସେହି ମୁହୁର୍ତକୁ କେତେ ବେଳେ ନନ୍ଦକୁମର କୃଷ୍ଣବଳରାମ ଆସିବେ ଓ ମଥୁରାରେ ଆତଙ୍କ ଚଳାଇଥିବା କଂସଙ୍କୁ ନିଧନ କରିବେ । କଂସ ମୃତ୍ୟୁରେ ସମଗ୍ର ମଥୁରା ଓ ଗୋପପୁରରେ ଆନନ୍ଦର ଲହରୀ ସହ ସମାପନ ହେବ ଧନୁଯାତ୍ରା ।