ଆକାଶ ମାର୍ଗରୁ ବାଲୁଖଣ୍ଡରେ ହରିଣ ଠାବ କରିବାକୁ ପ୍ରୟାସ : ଅଭୟାରଣ୍ୟରେ ଉଡିଲା ଡ୍ରୋନ, କିଛି ହରିଣଙ୍କ ଛବି ଉତ୍ତୋଳନ କଲା ଡ୍ରୋନ କ୍ୟାମେରା
କନକ ବ୍ୟୁରୋ : ପୁରୀ ବାଲୁଖଣ୍ଡ ଅଭୟାରଣ୍ୟରେ ବନବିଭାଗର ଡ୍ରୋନ୍ କ୍ୟାମେରାରେ କଏଦ ହୋଇଛନ୍ତି ହରିଣ । କିଛି ଚିତ୍ରା ହରିଣ ଦଳ ହୋଇ ଏକାଠି ଅଭୟାରଣ୍ୟ ଭିତରେ ବିଚରଣ କରୁଛନ୍ତି । ଯାହା ବନବିଭାଗକୁ ଆଶ୍ୱସ୍ତ କରିଛି । ତେବେ ପ୍ରଶ୍ନ ଉଠୁଛି, ବାଲୁଖଣ୍ଡରେ ରହୁଥିବା ୪ ହଜାରରୁ ଅଧିକ ହରିଣ ସୁରକ୍ଷିତ ଅଛନ୍ତି ତ?
Kanak News is now on WhatsApp
Join and get latest news updates delivered to you via WhatsApp
ଧ୍ୱସ୍ତ ବିଧ୍ୱସ୍ତ ବାଲୁଖଣ୍ଡ ଅଭୟାରଣ୍ୟରେ ବିଚରଣ କରୁଛନ୍ତି ଚିତ୍ରା ହରିଣ । ବନବିଭାଗ ପକ୍ଷରୁ ଡ୍ରୋନ କ୍ୟାମେରା ସାହାଯ୍ୟରେ ବାଲୁଖଣ୍ଡର ଆକାଶମାର୍ଗରୁ ନିଆଯାଇଥିବା ଚିତ୍ର । ସାମୁଦ୍ରିକ ଝଡ ଫୋନି ପରେ ହଜି ଯାଇଥିବା କିଛି ହରିଣଙ୍କୁ ପୁଣି ଦେଖିବାକୁ ମିଳିଛି ଅଭୟାରଣ୍ୟରେ । କ୍ୟାମେରା ଟ୍ରାପ ଲଗାଇ ହରିଣଙ୍କ ଫଟୋଚିତ୍ର ପାଇବା ପରେ ଏବେ ଡ୍ରୋନ୍ କ୍ୟାମେରା ଦ୍ୱାରା ହରିଣ ଠାବ ହେବା ବନବିଭାଗକୁ ଆଶ୍ୱସ୍ତ କରିଛି । ଏହି ସର୍ଚ୍ଚ ଅପରେସନ କୋଣାର୍କ ବନଖଣ୍ଡରେ ମଧ୍ୟ କରାଯିବ ବୋଲି କହିଛନ୍ତି ବନ ଅଧିକାରୀ ।
ତେବେ ପ୍ରଶ୍ନ ଉଠୁଛି ବାଲୁଖଣ୍ଡରେ ରହୁଥିବା ୪ ହଜାରରୁ ଉର୍ଦ୍ଧ୍ୱ ହରିଣ ସୁରକ୍ଷିତ ଅଛନ୍ତି ତ? ବାତ୍ୟା ପରେ ଦୀର୍ଘ ଦଶ ଦିନ ଧରି ଦେଖା ଦେଇନଥିବା ଏହି ହରିଣ ଏବେ ଦେଖାଯିବା ପରେ ତାଙ୍କ ସୁରକ୍ଷା ପ୍ରତି ବିଶେଷ ଧ୍ୟାନ ଦେବାକୁ ଚେଷ୍ଟା କରୁଛି ବନବିଭାଗ । ଏପରକି ଥର୍ମୋ ସେନ୍ସର କ୍ୟାମେରା ମାଧ୍ୟମରେ ଅନ୍ୟ ହରିଣଙ୍କୁ ଠାବ କରିବାକୁ ପ୍ରୟାସ କରାଯିବ ବୋଲି ସ୍ଥିର କରିଛି ବନବିଭାଗ ।
ଚଳିତ ବର୍ଷ ଗଞ୍ଜାମ ଜିଲ୍ଲାର ଭେଟନଇ ଅଂଚଳରୁ ବାଲୁଖଣ୍ଡକୁ କୃଷ୍ଣସାର ମୃଗ ଆଣିବାକୁ ଯୋଜନା କରିଥିଲେ ସରକାର । କିନ୍ତୁ ସେଠାରେ ଥିବା ଚିତ୍ରା ହରିଣଙ୍କ ସୁରକ୍ଷାକୁ ପ୍ରାଥମିକତା ଦେଇ, ବାଲୁଖଣ୍ଡର ଜୈବ ବିବିଧତାକୁ ଫେରାଇଆଣିବା ପର୍ଯ୍ୟନ୍ତ ଏହି ସ୍ଥାନାନ୍ତରଣ ପ୍ରକ୍ରିୟାକୁ ସ୍ଥଗିତ ରଖାଯାଇଛି ।