ଜେଲରେ ମନ୍ତ୍ରୀପୁଅ, ବଢୁଛି ଅଭିଯୋଗ : ଦେବାଶିଷ ପାତ୍ରଙ୍କ ଗୁଣ୍ଡାଗର୍ଦ୍ଦିରେ ଭୟଭୀତ ହୋଇ ଓଡ଼ିଶା ଫେରି ପାରୁନାହାନ୍ତି ଯୁବକ, ସହାୟତା ପାଇଁ ମୁଖ୍ୟମନ୍ତ୍ରୀଙ୍କୁ କଲେ ନିବେଦନ
କନକ ବ୍ୟୁରୋ : ମନ୍ତ୍ରୀଙ୍କ ପୁଅଙ୍କ ଦବଙ୍ଗଗିରି । ମନ୍ତ୍ରୀ ବାପାଙ୍କ ବିରୁଦ୍ଧରେ କିଏ ମୁହଁ ଖୋଲିଲେ ମିଳୁଛି ଶାସ୍ତି । ଓଡ଼ିଶାର ପାୱାରଫୁଲ୍ ମନ୍ତ୍ରୀ ବଦ୍ରୀ ପାତ୍ରଙ୍କ ପୁଅ ଦେବାଶିଷ ପାତ୍ରଙ୍କୁ ନେଇ ବଢ଼ିବାରେ ଲାଗିଛି ଅଭିଯୋଗ । ବିଚ୍ ରାସ୍ତାରେ ଲୋକଙ୍କୁ ହାଣି ପକାଇଥିବା ଦେବାଶିଷ ଏବେ ଜେଲରେ ଅଛନ୍ତି ସତ । ହେଲେ ସେ ଛାଡି ଯାଇଥିବା ଗୁଣ୍ଡାଗର୍ଦ୍ଦିର ପରିମାଣ ଭୋଗୁଛନ୍ତି ସ୍ଥାନୀୟ ଅଂଚଳର ଲୋକ । ସୂଚନା ଅନୁସାରେ ମନ୍ତ୍ରୀ ପୁଅଙ୍କ ଭୟରେ ଓଡ଼ିଶା ଛାଡି ଚେନ୍ନାଇରେ ଦିନ କାଟୁଛନ୍ତି । ଆଉ ସ୍ଥିତି ଏଭଳି ହୋଇଛି ଯେ, ସେ ଆଉ ଗାଁକୁ ଫେରିବାକୁ ସାହାସ ଜୁଟାଇ ପାରୁ ନାହାଁନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଘର ଦ୍ୱାର ଛାଡି ଚେନ୍ନାଇରେ ଆତ୍ମଗୋପନ କରିଥିବା ପୀଡ଼ିତ ଯୁବକ ଏଥିରୁ ରକ୍ଷା ପାଇବା ପାଇଁ ଆତୁର ନିବେଦନ କରିଛନ୍ତି । ଗଣଶିକ୍ଷା ମନ୍ତ୍ରୀ ବଦ୍ରୀ ନାରାୟଣ ପାତ୍ରଙ୍କ ପୁଅ ଦେବାଶିଷ ପାତ୍ରଙ୍କ ଇଙ୍ଗିତରେ ଆକ୍ରମଣର ଶିକାର ହୋଇ, ଲହୁଲୁହାଣ ହୋଇଥିଲେ । ଜୀବନ ବିକଳରେ ଚେନ୍ନାଇକୁ ଚାଲିଯାଇଥିବା ସୁନୀଲ, ଏବେ ଗାଁକୁ ଫେରିବାକୁ ସାହାସ ବି କରୁ ନାହାଁନ୍ତି । କାରଣ ଦେବାଶିଷ ପାତ୍ରଙ୍କ ନେଟୱାର୍କର ନଜର ଅଛନ୍ତି ସୁନିଲ ।
ସୁନୀଲ, ନବୀନ ନିବାସ ସାମ୍ନାରେ ଆତ୍ମହୁତି ଦେବାକୁ ଉଦ୍ୟମ କରିଥିଲେ । ଯାହାଙ୍କୁ ବହୁ କଷ୍ଟରେ ଉଦ୍ଧାର କରିଥିଲା ପୁଲିସ୍ । ସୁନୀଲଙ୍କ ଅଭିଯୋଗ ଥିଲା ମନ୍ତ୍ରୀ ବଦ୍ରୀ ପାତ୍ର ପ୍ରଧାନମନ୍ତ୍ରୀ ଆବାସ୍ ଯୋଜନାରେ ମିଳୁଥିବା ଘର ଦେବାରେ ଅନିୟମିତତା କରୁଛନ୍ତି । ବାରମ୍ବାର ଅନୁରୋଧ କରିବା ସତ୍ୱେ ତାଙ୍କୁ ଘରଟିଏ ନମିଳିବା ଅଭିଯୋଗ କରିଥିଲେ । ଘସିପୁରା ଅଂଚଳରେ ଚାଲିଥିବା ଦୁର୍ନୀତିକୁ ପଦାକୁ ଆଣିବା ପାଇଁ ଏଭଳି ଏକ ଉଦ୍ୟମ କରିଥିବା କହିଛନ୍ତି ସୁନୀଲ ।
ହେଲେ କାହାଣୀ ଏତିକିରେ ସରିନଥିଲା । ବରଂ ଏହି ଘଟଣା ତାଙ୍କ ଜୀବନରେ ଆଣି ଦେଇଥିଲା ଆଉ ଏକ ସଂକଟ । ଠିକ୍ ମାଟ୍ରିକ୍ ପରୀକ୍ଷା ଚାଲିଥିବା ବେଳେ ସୁନୀଲଙ୍କ ଉପରେ ହୋଇଥିଲା ମରଣାନ୍ତକ ଆକ୍ରମଣ । ମନ୍ତ୍ରୀଙ୍କ ପୁଅ ଦେବାଶିଷ ପାତ୍ରଙ୍କ ଇଙ୍ଗିତରେ ସ୍ଥାନୀୟ ଅଂଚଳର କିଛି ଅସାମାଜିକ ଯୁବକ ଅଚାନକ୍ ଆକ୍ରମଣ କରିଦେଲେ । ଯେଉଁଥିରେ ଗୁରୁତର ହୋଇ ପ୍ରଥମେ ଯାଜପୁରରୋଡ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ କଟକ ଏବଂ ଭୁବନେଶ୍ୱରରେ ଚିକିତ୍ସା ପାଇଁ ଭତ୍ତ କରାଯାଇଥିଲା ।
ଆଉ ଏହି ସମସ୍ତ ଗୁଣ୍ଡାଗର୍ଦ୍ଦିର ପଛରେ ଯେଉଁ ଚେହେରାଟି କେନ୍ଦ୍ରରେ ରହୁଛନ୍ତି ସିଏ ହେଉଛନ୍ତି ପାୱାରଫୁଲ ମନ୍ତ୍ରୀ ବଦ୍ରୀ ପାତ୍ରଙ୍କ ପୁଅ ଦେବାଶିଷ ପାତ୍ର । ଯୁବ ନେତା, ପୂର୍ବତନ ଘସିପୁରା ବ୍ଲକ୍ ଚେୟାରମ୍ୟାନ୍ । ଏହି ଦବଙ୍ଗ ନେତାଙ୍କ ଠିକଣା ଏବେ କେନ୍ଦୁଝର ଜେଲ । ଜଣେ ବ୍ୟକ୍ତିଙ୍କୁ ବିଚ୍ ରାସ୍ତାରେ ଗୋଡାଇ ଗୋଡାଇ ହାଣିଥିବାର ଭିଜୁଆଲ ଭାଇରାଲ ହେବା ଏବଂ ପୁଲିସକୁ ଆକ୍ରମଣ ଘଟଣାରେ ଗତ ୧୯ ତାରିଖରେ ଗିରଫ ହୋଇଛନ୍ତି ଦେବାଶିଷ ପାତ୍ର ।
ଅଭିଯୋଗର ଲମ୍ବା ଫର୍ଦ୍ଦ ଥିବା ସତ୍ୱେ ପାୱାରଫୁଲ ମନ୍ତ୍ରୀଙ୍କ ପୁଅ ହୋଇଥିବାରୁ ପୁଲିସର ହାତ ପହଂଚିବା ଏତେ ସହଜ ହେଉନଥିଲା । ଏବେ ସିନା ଜେଲର ଚାରିକାନ୍ଥ ଭିତରେ ଅଛନ୍ତି । ହେଲେ ଜେଲ ବାହାରେ ଚାଲିଛି ତାଙ୍କର ନେଟୱାର୍କ । ଲୋକଙ୍କୁ ଧମକ୍ ଚମକ୍ ଦେବା ସହିତ ମାଡ଼ ମାରିବାର ଫର୍ଦ୍ଦ ଫର୍ଦ୍ଦ ଅଭିଯୋଗ ତାଙ୍କ ନାଁରେ ରହିଛି । କିଏ ମନ୍ତ୍ରୀ ପୁଅଙ୍କ ଦାଦାଗିରି ସହି ନପାରି ଗାଁ ଛାଡିଛି ତ ଆଉ କିଏ ମୁହଁ ଖୋଲିବାକୁ ସାହାସ ଜୁଟାଇ ପାରୁ ନାହାଁନ୍ତି ।