ସତ କହିବ ବାବୁଲା ! ୯ ଦିନରେ ସୁସ୍ଥରୁ ଗୁରୁତର ହୋଇଗଲେ ସଂଗ୍ରାମୀଙ୍କ ଦାୟାଦ
କନକ ବ୍ୟୁରୋ : ପ୍ରଧାନମନ୍ତ୍ରୀ ମୋଦିଙ୍କଠାରୁ ବାପାମାଆ ସମ୍ମାନିତ ହେବା ପରେ କୁଆଡେ ଗାୟବ ହୋଇଗଲେ ପୁଅ । ଶେଷରେ ଗତକାଲି ଏକ ନାଟକୀୟ ଢଙ୍ଗରେ ପୁଅ ବାବୁଲା ପଣ୍ଡାଙ୍କୁ ରାସ୍ତାକଡରୁ ନିଶାସକ୍ତ ଅବସ୍ଥାରେ ଉଦ୍ଧାର କଲା ପୋଲିସ । ଏହାପରେ ତାଙ୍କୁ ଗତକାଲି ରାତିରେ କଟକ ବଡ ଡାକ୍ତରଖାନା ପଠାଇ ଦିଆଗଲା । ଆହୁରି ଆଶ୍ଚର୍ଯ୍ୟ ଜନକ ଭାବେ ଆଜି ଡାକ୍ତର କହିଛନ୍ତି ବାବୁଲାଙ୍କ ମାନସିକ ଅବସ୍ଥା ଠିକ ନାହିଁ, ସେ ଠିକରେ କଥା କହିପାରୁ ନାହାନ୍ତି ଏବଂ ତାଙ୍କର କିଡନୀ ମଧ୍ୟ ଖରାପ ହୋଇଯାଇଛି । ହଠାତ୍ ୯ ଦିନ ଭିତରେ ବାବୁଲାଙ୍କ ସହ କଣ ଘଟିଲା, ତାହା ଏବେ ବି ରହସ୍ୟ ଘେରରେ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବାବୁଲା ଉଦ୍ଧାର ହେବା ଖବର ଶୁଣି ପୁଅକୁ ଦେଖିବା ଲାଗି ଜୟପୁରରୁ କଟକ ଆସିଛନ୍ତି ମାଆ ସୁଜାତା ପଣ୍ଡା ଓ ସଂପର୍କୀୟ । ତେବେ ସ୍ୱାଧୀନତା ସଂଗ୍ରାମୀ ଦାୟାଦଙ୍କ ଚିକିତ୍ସା ଖର୍ଚ୍ଚ ସରକାର ବହନ କରିବେ ବୋଲି ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ତେଣୁ କେନ୍ଦ୍ରାଂଚଳ ଆରଡିସିଙ୍କ ସମେତ କଟକ ଜିଲ୍ଲାପାଳ ବଡ ମେଡିକାଲରେ ପହଂଚି ତାଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିବା ସହ ଚିକିତ୍ସାର ଅନୁଧ୍ୟାନ କରିଛନ୍ତି । ହେଲେ ଏବେ ବି ବାବୁଲାଙ୍କ ନିଖୋଜ ହେବା ପଛର ରହସ୍ୟ ଉପରୁ ପରଦା ହଟିପାରୁ ନାହିଁ ।
• ଦୀର୍ଘ ୯ ଦିନ ହେଲା ବାବୁଲା ପଣ୍ଡା ଥିଲେ କେଉଁଠି?
• ୧୬ରେ ସମ୍ବର୍ଦ୍ଧିତ ହେବା ପରେ କେଉଁଆଡେ ଚାଲିଗଲେ?
• ଭୁୁବନେଶ୍ୱରରେ ଥିବା ସତ୍ତେ୍ୱ ତାଙ୍କୁ ପୋଲିସ ପାଇଲାନାହିଁ କିପରି?
• ତାଙ୍କୁ ଲୁଚାଇ ରଖାଯାଇଥିବା ନେଇ ବିଜେପି ଅଭିଯୋଗର ସତ୍ୟତା ଅଛି କି?
୯ଦିନ ଧରି ବାବୁଲା ନିଖୋଜ ହେବା ଓ ନାଟକୀୟ ଢଙ୍ଗରେ ଉଦ୍ଧାର ହେବାକୁ ନେଇ ସରଗରମ ହୋଇଛି ରାଜ୍ୟ ରାଜନୀତି । ବିଜେପି ଜାତୀୟ କାର୍ଯ୍ୟକାରିଣୀରେ ସମ୍ବର୍ଦ୍ଧନା ପାଇଁ ରାଜଧାନୀ ଆସିଥିଲେ ଏହି ସ୍ୱାଧୀନତା ସଂଗ୍ରାମୀଙ୍କ ଦାୟାଦ । ହେଲେ ଫେରିବା ସମୟରେ ଅଲଗା ହୋଇଗଲେ ଲକ୍ଷ୍ମୀ ପଣ୍ଡାଙ୍କ ଦାୟାଦ ପରିବାର ।
ସ୍ୱାମୀ ଓ ପୁଅଠାରୁ ଅଲଗା ହୋଇଗଲେ ବୋହୂ । ବାଲେଶ୍ୱରରୁ ଉଦ୍ଧାର ହୋଇ ଜୟପୁର ଫେରିଲେ । ଆଉ ସେହିଦିନରୁ ନିରୁଦ୍ଦିଷ୍ଟ ଥିବା ବାବୁଲା ପାଣ୍ଡା ଶେଷରେ ରାସ୍ତାକଡରୁ ଉଦ୍ଧାର ହେବା ଘଟଣା ସଂପୂର୍ଣ୍ଣ ରହସ୍ୟରେ ରହିଛି । ବାବୁଲା ସଂଜ୍ଞା ଫେରିପାଇଲେ, ସେ ହିଁ ପୁରା ଘଟଣା ଉପରୁ ପରଦା ହଟାଇ ପାରିବେ ।