କନକ ବ୍ୟୁରୋ : ସୁନ୍ଦରୀ ଯୁବତୀଙ୍କ ସହ ଯୋଗଗୁରୁ । କାନ୍ଧରେ ହାତ ପକାଇ ହସ ହସ ମୁହଁରେ ପୋଜ୍ ଦେଉଛନ୍ତି ବାବା ରାମଦେବ । ସୋସିଆଲ୍ ମିଡିଆରେ ଭାଇରାଲ୍ ହେଉଛି ବାବାଙ୍କ ଏହି ଫଟୋ । ଲକ୍ଷାଧିକ ଲାଇକ୍ , ହଜାର ହଜାର କମେଂଟ୍ । ଆଉ ତାଠୁ ଅଧିକ ସେୟାର । ଗୁଗୁଲ, ଫେସବୁକ୍, ହ୍ୱାଟ୍ସଆପ୍, ହାଇକ୍, ଇନଷ୍ଟାଗ୍ରାମ, ସବୁଥିରେ ଏହି ଫଟୋକୁ ନେଇ ଚର୍ଚ୍ଚା । ସୋସିଆଲ୍ ମିଡିଆ ଫେସବୁକରେ ସବୁଠୁ ଅଧିକ ଦେଖାଯାଉଛି ନିର୍ବିବାଦୀୟ ବାବାଙ୍କ ଏହି ଫଟୋକୁ । ଆଉ ଏହେଉଛି ବାବାଙ୍କ ଆଉ ଏକ ଫଟୋ । ଗ୍ଲାମରସ୍ ଯୁବତୀଙ୍କ ସହ ବିନ୍ଦାସ ଅନ୍ଦାଜରେ ବାବା ଦେଉଛନ୍ତି ପୋଜ୍ । ଯାହାକୁ ନେଇ ସୋସିଆଲ୍ ମିଡିଆରେ ଜୋରଦାର ଚର୍ଚ୍ଚା । ଆଉ ପ୍ରତି ପୋଷ୍ଟ ତଳେ କମେଂଟ୍ ବି ବେଶ୍ ରୋଚକ । କିଏ କହୁଛି ରାମରହିମଙ୍କ ପରେ ଏବେ ରାମଦେବଙ୍କ ପାଳି । ଆଉ କିଏ ପ୍ରଶ୍ନ କରୁଛି ରାମଦେବଙ୍କ ନମ୍ବର ଆସିବ କେବେ?
Kanak News is now on WhatsApp
Join and get latest news updates delivered to you via WhatsApp
ଏହାରି ଭିତରେ ବାବା ରାମଦେବଙ୍କ ଆପତ୍ତିଜନକ ଫଟୋ ପୋଷ୍ଟ କରି ବିବାଦକୁ ଆସିଯାଇଛନ୍ତି ଭଦ୍ରକର ଜଣେ ଯୁବ ନେତା । ସଂପୃକ୍ତ ନେତାଙ୍କ ବିରୋଧରେ ଥାନାରେ ଏତଲା ଦେଇଛି ବିଶ୍ୱ ହିନ୍ଦୁ ପରିଷଦ । ସେପଟେ ସୋସିଆଲ୍ ମିଡିଆରେ ଘୁରିବୁଲିଥିବା ଏହି ଫଟୋକୁ ନେଇ ପ୍ରତିକ୍ରିୟା ରଖିଛନ୍ତି ରାମଦେବଙ୍କ ଭକ୍ତ । ଯେଉଁଥିରେ ସ୍ପଷ୍ଟ ଭାବେ ଦର୍ଶାଯାଇଛି ଯେ, ଫଟୋରେ ବାବାଙ୍କ ସହ ଥିବା ଯୁବତୀ ଜଣକ ଜଣେ କ୍ୟାନସର ରୋଗୀ । ଯିଏ ଏବେ ଜୀବନ ସହ ସଂଘର୍ଷ କରୁଛନ୍ତି । ପତଂଜଳି ଯୋଗପୀଠର ପ୍ରତିଷ୍ଠାତା ସଦସ୍ୟଙ୍କ ଏହି ପରିବାରକୁ ବାବା ହସପିଟାଲରେ ଭେଟି ଆଶୀର୍ବାଦ ଦେଇଥିଲେ । ଆଉ ଏହା ସେହି ସମୟର ଫଟୋ ।
ସେପଟେ ଦୁଷ୍କର୍ମ ମାମଲାରେ ବାବା ରାମରହିମ ଦୋଷୀ ସାବ୍ୟସ୍ତ ହେବା ପରେ ତାଙ୍କ ବ୍ୟକ୍ତିତ୍ୱ ଏବଂ ଚରିତ୍ର ନେଇ ପ୍ରଶ୍ନ ଉଠାଇଛନ୍ତି ରାମଦେବ । କହିଛନ୍ତି, ରାମରହିମ ସାଧୁ ନୁହଁନ୍ତି ସେ ଜଣେ ସଇତାନ । ଯୋଗଗୁରୁ ବାବା ରାମଦେବ । କର ଯୋଗ ରୁହ ନିରୋଗ- ଯୋଗ ମାଧ୍ୟମରେ ସାରା ଦେଶକୁ ଏହି ବାର୍ତା ଦେଉଛନ୍ତି ବାବା । ବିଶ୍ୱରେ ବି ବାବାଙ୍କ ବେଶ୍ ପ୍ରଭାବ । ହେଲେ ଦିଲ୍ଲୀରୁ ପଲ୍ଲୀ ଯାଏଁ ତଥାକଥିତ ବାବାଙ୍କ କେଳେଙ୍କାରୀ ସାମ୍ନାକୁ ଆସିବା ପରେ ଭକ୍ତଙ୍କ ଭାବାବେଗକୁ ଆଘାତ ଲାଗିଛି । ଆଉ ନିର୍ବିବାଦୀୟ ବାବା ରାମଦେବଙ୍କ ଉପରେ ଉଠିଛି ପ୍ରଶ୍ନ ।