କନକ ବ୍ୟୁରୋ : ପର୍ଥ ଟେଷ୍ଟରେ ପରାସ୍ତ ହେଲା ଟିମ୍ ଇଣ୍ଡିଆ । ପର୍ଥରେ ଭାରତ ଓ ଅଷ୍ଟ୍ରେଲ୍ରିା ମଧ୍ୟରେ ଖେଳାଯାଉଥିବା ଦ୍ୱିତୀୟ ଟେଷ୍ଟକୁ ୧୪୬ ରନରେ ବାଜି ମାରି ନେଇଛି କଙ୍ଗାରୁ ଟିମ୍ । ଦ୍ୱିତୀୟ ଇନିଂସରେ ୨୮୭ ରନର ବିଜୟ ଲକ୍ଷ୍ୟକୁ ପିଛା କରୁଥିବା ବିରାଟ ବାହିନୀ ଅଷ୍ଟ୍ରେଲିଆ ବୋଲରଙ୍କ ଘାତକ ବୋଲିଂ ଆଗରେ ମାତ୍ର ୧୪୦ ରନରେ ମୁଣ୍ଡ ନୁଆଁଇଥିଲେ । ଏହି ବିଜୟ ସହ ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଏବେ ୧-୧ରେ ସ୍ଥିତିରେ ବରାବର ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ ଅଷ୍ଟ୍ରେଲିଆ ପ୍ରଥମେ ଟସ୍ ଜିତି ବ୍ୟାଟିଂ କରିବା ସହ ପ୍ରଥମ ଇନିଂସରେ ୩୨୬ ରନ କରିବାକୁ ସକ୍ଷମ ହୋଇଥିଲା । ଜବାବରେ ଅଧିନାୟକ ବିରାଟ ସତକ ସତ୍ତେ୍ୱ ମଧ୍ୟ ଟିମ୍ ଇଣ୍ଡିଆ ୨୮୩ ରନରେ ଅଲଆଉଟ ହେବା ସହ ପ୍ରଥମ ଇନିଂସରେ ୪୩ ରନରେ ପଛୁଆ ରହିଥିଲା । ପରେ ଦ୍ୱିତୀୟ ଇନିଂସରେ ଭାରତୀୟ ବୋଲରଙ୍କ ଶାଣିତ ବୋଲିଂ ଆଗରେ ୨୪୩ ରନରେ ମୁଣ୍ଡ ନୁଆଁଇଥିଲା କଙ୍ଗାରୁ ଟିମ୍ । ଭାରତ ପକ୍ଷରୁ ମହମ୍ମଦ ସାମି ସର୍ବାଧିକ ୬ଟି ୱିକେଟ ନେଇ ଅଷ୍ଟ୍ରେଲିଆର ବ୍ୟାଟିଂ ମେରୁଦଣ୍ଡ ଭାଙ୍ଗି ଦେଇଥିଲେ । ଆଉ ଏହାସହ ଭାରତକୁ ୨୮୭ ରନର ବିଜୟ ଲକ୍ଷ୍ୟ ମିଳିଥିଲା ।
ଏହି ଟେଷ୍ଟ ମ୍ୟାଚ୍ ଜିତି ଭାରତ ୨-୦ରେ ସିରିଜରେ ଆଗୁଆ ରହିବାକୁ ଲକ୍ଷ୍ୟ ନେଇ ପଡିଆକୁ ଓହ୍ଲାଇଥିଲା । ତେବେ ପ୍ରଥମ ଇନିଂସ ଭଳି ଦ୍ୱିତୀୟ ଇନିଂସରେ ମଧ୍ୟ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା କୋହଲି ଆଣ୍ଡ କୋ । ଆଉ ଏହାପରେ ଲଗାତାର ୱିକେଟ ହରାଇ ମାତ୍ର ୧୪୦ ରନରେ ପ୍ୟାଭିଲିୟନ ଫେରିଥିଲା ପୂରା ଟିମ୍ । ଅଷ୍ଟ୍ରେଲିଆ ପକ୍ଷରୁ ମିସେଲ ଷ୍ଟାର୍କ ଓ ନାଥାନ ଲିୟନ ୩ଟି ଲେଖାଏଁ ୱିକେଟ ନେଇଥିବା ବେଳେ ପାଟ କମିନସ ଓ ଜୋସ ହାଜେଲଉଡ ୨ଟି ଲେଖାଏଁ ୱିକେଟ ନେଇ ଭାରତୀୟ ଇନିଂସର ସମାପ୍ତ ଘଟାଇଥିଲେ । ଏହି ସିରିଜର ତୃତୀୟ ମ୍ୟାଚ୍ ୨୬ ଡିସେମ୍ବରରେ ମେଲବର୍ଣ୍ଣରେ ଖେଳାଯିବ ।