ଭାରତ-ଅଷ୍ଟ୍ରେଲିଆ ହାଇଭୋଲଟେଜ୍ ଟକ୍କର ! ଟିମ୍ ଇଣ୍ଡିଆ ଆଗରେ ୨୩୭ ରନର ବିଜୟଲକ୍ଷ୍ୟ ।
କନକ ବ୍ୟୁରୋ : ପ୍ରଥମ ଦିନିକିଆରେ ଜବରଦସ୍ତ ବୋଲିଂ ପ୍ରଦର୍ଶନ କରିଛି ଭାରତ । ହାଇଦ୍ରାବାଦର ଉପଲ ଷ୍ଟାଡିୟମରେ ଖେଳାଯାଉଥିବା ପ୍ରଥମ ଦିନିକିଆରେ ଭ୍ରମଣକାରୀ ଅଷ୍ଟ୍ରେଲିଆ ଟସ୍ ଜିଣି ପ୍ରଥମେ ବ୍ୟାଟିଂ କରିବାର ନିଷ୍ପତ୍ତି ନେଇଥିଲା । ଅଷ୍ଟ୍ରେଲିଆର ଦୁଇ ଓପନର ଉସମାନ ଖ୍ବାଜା ଓ ଆରନ୍ ଫିଞ୍ଜ ଇନିଂସ ଆରମ୍ଭ କରିଥିଲା ବେଳେ କୌଣସି ରନ୍ ନ କରି ଫିଞ୍ଜ ଧୋନିଙ୍କ ହାତକୁ କ୍ୟାଚ ଦେଇ ପ୍ୟାଭିଲିୟନ ଫେରି ଯାଇଥିଲେ । ଧିମା ବ୍ୟାଟିଂ ପ୍ରଦର୍ଶନ କରିଥିବା ଟିମ୍ ଅଷ୍ଟ୍ରେଲିଆ ନିର୍ଦ୍ଧାରିତ ୫୦ ଓଭରରେ ୭ଟି ୱିକେଟ୍ ହରାଇ ୨୩୬ ରନ୍ କରିବାକୁ ସକ୍ଷମ ହୋଇଛି । ଫଳରେ ଭାରତ ଆଗରେ ଏବେ ୨୩୭ ରନର ବିଜୟ ଲକ୍ଷ୍ୟ ରହିଛି । ଅଷ୍ଟ୍ରେଲିଆ ପକ୍ଷରୁ ପ୍ରାରମ୍ଭିକ ବ୍ୟାଟ୍ସମ୍ୟାନ ଉସମାନ୍ ଖାୱଜା ୫୦ ରନର ଅର୍ଦ୍ଧଶତକୀୟ ପାଳି ଖେଳିଥିବା ବେଳେ ଗ୍ଲେନ୍ ମ୍ୟାକ୍ସୱେଲ୍ ୪୦, ଏବଂ ମାର୍କସ ଷ୍ଟଏନିସ୍ ୩୭ ଏବଂ ଆଲେକ୍ସ କ୍ୟାରି ୩୬ ରନର ଅପରାଜିତ ପାଳି ଖେଳିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭାରତ ପକ୍ଷରୁ ମହମ୍ମଦ ସାମି ଜବରଦସ୍ତ ବୋଲିଂ ପ୍ରଦର୍ଶନ କରିଥିବା ବେଳେ ୧୦ ଓଭରରେ ୪୪ ରନ ଦେଇ ୨ଟି ୱିକେଟ୍ ଅକ୍ତିଆର କରିଛନ୍ତି । ଯେଉଁଥିରେ ୨ଟି ମେଡେନ୍ ଓଭର ମଧ୍ୟ ରହିଛି । ସେହିପରି ଜସପ୍ରିତ୍ ବୁମରା ୧୦ ଓଭରରେ ୬୦ ରନ୍ ଦେଇଥିବା ବେଳେ ୨ଟି ୱିକେଟ୍ ନେଇଛନ୍ତି । କୁଲଦୀପ ଯାଦବ ମଧ୍ୟ ୨ଟି ୱିକେଟ୍ ଅକ୍ତିଆର କରିଥିବା ବେଳେ ୧୦ ଓଭରରେ ୪୬ ରନ ବ୍ୟୟ କରିଛନ୍ତି । ରବିନ୍ଦ୍ର ଜାଡେଜା କୌଣସି ୱିକେଟ୍ ପାଇନଥିଲେ ମଧ୍ୟ, ୧୦ ଓଭରରେ ମାତ୍ର ୩୩ ରନ୍ ବ୍ୟୟ କରିଛନ୍ତି । ଅଷ୍ଟ୍ରେଲିଆ ଠାରୁ ଟି-ଟ୍ୱେଣ୍ଟି ସିରିଜ ହାରିବା ପରେ ଭାରତ ଏହାର ବଦଲା ଦିନିକିଆରେ ନେବା ପାଇଁ ଲକ୍ଷ୍ୟ ରଖିଛି । ତେଣୁ ଏହି ମ୍ୟାଚଟିକୁ ଜିତିବାକୁ ହେଲେ ଦଳକୁ ଭଲ ବ୍ୟାଟିଂ ପ୍ରଦର୍ଶନ କରିବାକୁ ହେବ । ବିଶେଷ କରି ପ୍ରାରମ୍ଭିକ ଯୋଡି ଭଲ ଖେଳିଳେ ଭାରତ ଏହି ମ୍ୟାଚଟିକୁ ସହଜରେ ଜିତିପାରିବ ।