ଆଜିଠାରୁ ଏସିଆନ ହକି ଚାମ୍ପିୟନସିପ୍ । ଆୟୋଜକ ଓମାନ ସହିତ ମୁହାଁମୁହିଁ ହେବ ଭାରତ । ପ୍ରଥମ ମ୍ୟାଚରୁ ବିଜୟ ଅଭିଯାନ ଲକ୍ଷ୍ୟରେ ଭାରତୀୟ ଦଳ ।
କନକ ବ୍ୟୁରୋ: ଆଜିଠାରୁ ଓମାନର ମସକାଟ୍ ଠାରେ ହକି ଏସିଆନ ଚାନମ୍ପିଅନସିପ ଆରମ୍ଭ ହେବାକୁ ଯାଉଛି । ପ୍ରଥମ ମ୍ୟାଚରେ ଭାରତୀୟ ପୁରୁଷ ହକି ଟିମ ଆୟୋଜକ ଓମାନ ସହିତ ମୁହାଁମୁହିଁ ହେବ। ଗତଥର ବିଜେତା ଭାରତ ପାଇଁ ଏହି ମ୍ୟାଚରେ ବିଜୟୀ ହେବା ବହୁ ଗୁରୁତ୍ୱପୂର୍ଣ୍ଣ ଅଟେ । କାରଣ ଭାରତୀୟ ଟିମ ନିକଟରେ ଏସୀୟ କ୍ରୀଡ଼ାରେ ନୈରାଶ୍ୟଜନକ ପ୍ରଦର୍ଶନ କରିଥିଲା । ସେଥିପାଇଁ ଭାରତକୁ ଏସୀୟ କ୍ରୀଡ଼ାରେ କାଂସ୍ୟ ପଦକରେ ସନ୍ତୁଷ୍ଟ ହେବାକୁ ପଡ଼ିଥିଲା । ତେଣୁ ଆଜି ସୁଲତାନ କାବୁସ ସ୍ପୋର୍ଟ୍ସ ପରିସରରେ ଖେଳାଯାଉଥିବା ଏହି ମ୍ୟାଚ ଭାରତ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ ।
Kanak News is now on WhatsApp
Join and get latest news updates delivered to you via WhatsApp
ଯଦି ଆମ୍ଭେ ଇତିହାସକୁ ଦେଖିବା ଗତ ଦୁଇ ମାସ ପୂର୍ବେ ଇଣ୍ଡୋନେସିଆର ଜାକର୍ତ୍ତା ଠାରେ ଏସୀୟ କ୍ରୀଡ଼ାରେ ଓମାନକୁ ଧୂଳି ଚଟାଇଥିଲା ଭାରତୀୟ ପୁରୁଷ ହକି ଟିମ୍ । ସେହି ମ୍ୟାଚରେ ଭାରତ ପ୍ରତିପକ୍ଷ ଦଳ ଓମାନକୁ ୭-୦ ଗୋଲରେ ପରାସ୍ତ କରିଥିଲା । କିନ୍ତୁ ଭାରତର ସେହି ସମୟର ଟିମ ଓ ବର୍ତ୍ତମାନ ଟିମ ମଧ୍ୟରେ ଅନେକ ପାର୍ଥକ୍ୟ ଅଛି । କାରଣ ସେହି ସମୟରେ ଅଭିଜ୍ଞ ଖେଳାଳି ସର୍ଦ୍ଦାର ସିଂହ ଟିମରେ ସାମିଲ ଥିଲେ କିନ୍ତୁ ଏବେ ସେ ସନ୍ୟାସ ନେଇ ସାରିଛନ୍ତି । ତେଣୁ ହୁଏତ କିଛି ଫରକ ନଜର ଆସିପାରେ ବୋଲି କ୍ରୀଡ଼ା ସମୀକ୍ଷକମାନେ ମତ ପ୍ରକାଶ କରିଛନ୍ତି ।
ଅନ୍ୟପଟେ ପୂର୍ବତନ ତଥା ଭାରତୀୟ ହକି ଜଗତରୁ ସନ୍ୟାସ ନେଇଥିବା ସର୍ଦ୍ଦାର ସିଂହଙ୍କ ପରିବର୍ତ୍ତେ ଯୁବ ଅଧିନାୟକ ମନପ୍ରୀତ ସିଂହଙ୍କୁ ଅଧିକ ଚାପ ପଡ଼ିପାରେ ବୋଲି କ୍ରୀଡ଼ା ସମୀକ୍ଷକମାନେ ମତ ପ୍ରକାଶ କରିଛନ୍ତି । ଏହା ପରେ ଭାରତ ନିଜର ୨ୟ ମ୍ୟାଚ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ଅକ୍ଟୋବର ୨୦ରେ ଭେଟିବାକୁ ଯାଉଛି । ଯାହା ଉପରେ ସମସ୍ତଙ୍କ ନଜର ରହିବ । କିନ୍ତୁ ଏହା ପୂର୍ବରୁ ଆୟୋଜକ ଓମାନ ସହିତ ହେବାକୁଥିବା ମ୍ୟାଚଟି ଗୁରୁତ୍ୱପୂର୍ଣ୍ଣ ଭୂମିକା ବହନ କରିବ ।