ଆମ ଆଦମି ପାର୍ଟିକୁ ବଡ ଝଟକା : ଦଳ ଛାଡିଲେ ବରିଷ୍ଠ ନେତା ଆଶୁତୋଷ
କନକ ବ୍ୟୁରୋ : ଆମ ଆଦମି ପାର୍ଟିକୁ ବଡ ଝଟକା । ଦଳର ବରିଷ୍ଠ ନେତା ଆଶୁତୋଷ ଆଜି ସକାଳୁ ନିଜର ଇସ୍ତଫା ପତ୍ର ଦେଇଛନ୍ତି । ସେ ନିଜେ ଏହି ଘୋଷଣା କରିଛନ୍ତି । ସାମ୍ବାଦିକରୁ ନେତା ବନିଥିବା ଆଶୁତୋଷ ଆଜି ଟ୍ୱିଟ କରି ଦଳରୁ ଇସ୍ତଫା ଦେଇଥିବା ଘୋଷଣା କରିଛନ୍ତି । ସେ ଲେଖିଛନ୍ତି ଯେ, ସବୁ ଯାତ୍ରାର ଶେଷ ଥାଏ । ଆମ୍ ଆଦମି ପାର୍ଟି ସହ ଏକ ସୁନ୍ଦର ଓ କ୍ରାନ୍ତିକାରୀ ଯାତ୍ରା ଆଜି ଶେଷ ହୋଇଛି । ଏବଂ ସେ ଦଳରୁ ଇସ୍ତଫା ଦେଇଛନ୍ତି ବୋଲି ଲେଖିଛନ୍ତି । ତେବେ ଏପରି ନିଷ୍ପତ୍ତି ସେ ନିଜର ବ୍ୟକ୍ତିଗତ କାରଣ ଯୋଗୁଁ ନେଇଥିବା ଟ୍ୱିଟରେ ଉଲ୍ଲେଖ କରିଛନ୍ତି । ଯେଉଁମାନେ ତାଙ୍କୁ ସମର୍ଥନ ଜଣାଇଥିଲେ ସମସ୍ତଙ୍କୁ ଧନ୍ୟବାଦ ବୋଲି ଲେଖିଛନ୍ତି । ତେବେ ରାଜ୍ୟସଭା ପଠାଇବା ନେଇ ଆଶୁତୋଷ ଓ ଦଳ ମଧ୍ୟରେ ବିବାଦ ଦେଖାଦେଇଥିଲା । ତେବେ ସେ ନିଜର ଏହି ନିଷ୍ପତ୍ତି ଉପରେ କୌଣସି ଟିପ୍ପଣୀ କରିବେ ନାହିଁ ବୋଲି ଗଣମାଧ୍ୟମରେ କହିଛନ୍ତି । ଆଶୁତୋଷ ଦଳ ଛାଡିବା ତାଙ୍କ ବ୍ୟକ୍ତିଗତ ନିଷ୍ପତି ବୋଲି ଆପ୍ ନେତା କହିଛନ୍ତି । ସେପଟେ ଆଶୁତୋଷଙ୍କ ଇସ୍ତାଫ ନେଇ ପ୍ରତିକ୍ରିୟା ରଖିଛନ୍ତି ପୂର୍ବତନ ଆପ୍ ନେତା ପ୍ରଶାନ୍ତ ଭୂଷଣ । ଯେଉଁ ବ୍ୟକ୍ତିଙ୍କର ଆତ୍ମସମ୍ମାନ ଥିବ ସେ ଆପରେ ରହିପାରିବ ନାହିଁ ବୋଲି ପ୍ରଶାନ୍ତ ଭୂଷଣ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଶୁତୋଷ ଦଳ ଛାଡିବା ପରେ କୁମାର ବିଶ୍ୱାସ ପୁଣି ଥରେ ଆପ୍ ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ ଟାର୍ଗେଟ କରିଛନ୍ତି । ଜଣେ ପ୍ରତିଭା ସମ୍ପନ୍ନ ସହକର୍ମୀଙ୍କୁ ଷଡଯନ୍ତ୍ରପୂର୍ବକ ନିର୍ମମ ଭାବେ ହତ୍ୟା କରାଯାଇଛି ବୋଲି ସେ ଟ୍ୱିଟ କରି ଲେଖିଛନ୍ତି । ଏହାସହ ସ୍ୱାଧୀନତାର ଶୁଭେଚ୍ଛା ବୋଲି ମଧ୍ୟ ନିଜ ଟ୍ୱିଟରେ ଉଲ୍ଲେଖ କରିଛନ୍ତି କୁମାର ବିଶ୍ୱାସ । ୨୦୧୫ରେ ଦିଲ୍ଲୀରେ କେଜ୍ରିୱାଲ ସରକାରଙ୍କ ଗଠନ ପରେ ଦଳ ଛାଡିଥିବା ନେତାଙ୍କ ମଧ୍ୟରେ ଚତୁର୍ଥ ବଡ ନାଁ ହେଉଛି ଆଶୁତୋଷଙ୍କର । ଏହା ପୂର୍ବରୁ ଆପର ଯୋଗେନ୍ଦ୍ର ଯାଦବ, ପ୍ରଶାନ୍ତ ଭୂଷଣ ଓ ସାଜିୟା ଇଲ୍ମି ଭଳି ନେତା ଆମ୍ ଆଦମି ପାର୍ଟିରୁ ଇସ୍ତଫା ଦେଇସାରିଛନ୍ତି । ଆଶୁତୋଷ ଦଳ ଛାଡିବା ଆପ୍ ପାଇଁ ଏକ ବଡ ଝଟକା ବୋଲି କଂଗ୍ରେସ କହିଛି ।
ସାମ୍ବାଦିକତା ଛାଡି ନେତା ବନିଥିଲେ ଆଶୁତୋଷ । ୨୦୧୪ ଜାନୁୟାରୀ ୧୧ରେ ଆମ୍ ଆଦମି ପାର୍ଟିରେ ସାମିଲ ହୋଇଥିଲେ । ଅନ୍ନା ହଜାରେଙ୍କ ଆନ୍ଦୋଳନ ସମୟରୁ ହିଁ ଦୁର୍ନୀତି ବିରୋଧୀ କ୍ୟାମ୍ପେନକୁ ଆଶୁତୋଷ ସମର୍ଥନ କରିଆସୁଛନ୍ତି । ଆନ୍ନାଙ୍କ ଜନଲୋକପାଳ ଆନ୍ଦୋଳନକୁ ନେଇ ଆଶୁତୋଷ ଏକ କବିତା ମଧ୍ୟ ଲେଖିଥିଲେ । ୨୦୧୪ଲୋକସଭା ନିର୍ବାଚନରେ ଆପ୍ ଟିକେଟରୁ ସେ ଦିଲ୍ଲୀର ଚାନ୍ଦନୀ ଚୌକରୁ ନିର୍ବାଚନ ମଧ୍ୟ ଲଢିଥିଲେ । କିନ୍ତୁ ବିଜେପିର ଡକ୍ଟର ହର୍ଷବର୍ଦ୍ଧନଙ୍କ ଠାରୁ ତାଙ୍କୁ ପରାଜୟ ହେବାକୁ ପଡିଥିଲା । ତେବେ ନିକଟରେ ରାଜ୍ୟସଭା ଆସନ ପାଇଁ ଆଶୁତୋଷ ଓ ଆମ୍ ଆଦମି ପାର୍ଟି ମଧ୍ୟରେ ମତାନ୍ତର ଦେଖାଦେଇଥିଲା । ଏଥିପାଇଁ ସେ ଇସ୍ତଫା ଦେଇଥାଇ ପାରନ୍ତେ ବୋଲି ଚର୍ଚ୍ଚା ହେଉଛି ।