ଆଲିସାନ ହୋଟେଲରେ ଲୁଚି ରହିଛନ୍ତି ସ୍କାମ ମାଷ୍ଟର ନିରଭ ମୋଦି! ରାତିକୁ ଭଡା ୮୪,୦୦୦ ଟଙ୍କା, ୯୦ ଦିନ ପାଇଁ କରିଛନ୍ତି ବୁକ୍
ପଞ୍ଜାବ ନ୍ୟାସନାଲ ବ୍ୟାଙ୍କକୁ ୧୧ ହଜାର ୪ ଶହ କୋଟି ଚୂନା ମାରି ଫେରାର ହୋଇଯାଇ୍ଥିବା ହୀରା ବ୍ୟବସାୟୀ ନିରଭ ମୋଦିଙ୍କୁ ନେଇ ପୂରା ଦେଶରେ ଚର୍ଚ୍ଚା । ପିଏନବି ମହାଘୋଟାଲା ଜଣା ପଡିବା ପୂର୍ବରୁ ନିରଭ ଦେଶ ଛାଡି ପଳାୟନ କରିଛନ୍ତି । ହଜାର ହଜାର କୋଟି ଟଙ୍କା ଲୁଟ କରିଥିବା ନିରଭ ଏବେ କେଉଁଠି ତାହା ଏବେ ଏକ ବଡ ପ୍ରଶ୍ନ । କିଛି ମିଡିଆ ରିପୋର୍ଟ ଅନୁଯାୟୀ, ନିରଭ ଏବେ ଆମେରିକାର ନ୍ୟୁୟର୍କ ସହରରେ ଏକ ଆଲିସାନ ହୋଟେଲରେ ଲୁଚି ରହିଛନ୍ତି ବୋଲି ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ମିଡିଆ ରିପୋର୍ଟ ଅନୁଯାୟୀ, ନ୍ୟୁୟର୍କର ସବୁଠାରୁ ଦାମୀ ହୋଟେଲ ଜେ ଡବ୍ଲୁ ମ୍ୟାରିଅଟ ଏସେକ୍ସ ହାଉସର ସବୁଠାରୁ ମହଙ୍ଗା ରୁମରେ ରହୁଛନ୍ତି ନିରଭ । ଯାହାର ପ୍ରତିଦିନର ଭଡା ହେଉଛି ୮୩,୬୪୨ ଟଙ୍କା । ଏହି ଆଲିସାନ ହୋଟେଲର ୩୬ତମ ଫ୍ଲୋରରେ ନିରଭ ରହୁଥିବା ସୂଚନା ମିଳିଛି । ରିପୋର୍ଟ ଅନୁଯାୟୀ, ୬୭ ଲକ୍ଷରୁ ଉଦ୍ଧ୍ୱର୍ ଟଙ୍କା ଦେଇ ୯୦ ଦିନ ପାଇଁ ଏହି ରୁମ ବୁକ କରାଯାଇଥିବା ଜଣାପଡିଛି । ତେବେ ବିଦେଶ ମନ୍ତ୍ରାଳୟ କହିଛି, ନିରଭ କେଉଁଠି ଅଛନ୍ତି ସେ ସମ୍ପର୍କରେ କୌଣସି ସୂଚନା ନାହିଁ ।
୩୬ତମ ଫ୍ଲୋରରେ ଥିବା ସେଣ୍ଟ୍ରାଲ ପାର୍କ ଡିଲକ୍ସ ସ୍ୱିଟରେ ନିରଭଙ୍କ ପୂରା ପରିବାର ରହୁଥିବା ଜଣାପଡିଛି । ୧୧୯୦ ସ୍କୋୟର ଫୁଟ ଏହି ସ୍ୱିଟରେ ରହି ଅଫିସ କାମ ମଧ୍ୟ କରାଯାଇପାରିବ । ନିରଭଙ୍କ ଏହା ସବୁଠାରୁ ଅଧିକ ପସନ୍ଦର ହୋଟେଲ । ତେଣୁ ଆମେରିକାରେ ଅଧିକାଂଶ ସମୟ ଏହି ହୋଟେଲରେ ରହିଥାନ୍ତି ନିରଭ । ନିରଭଙ୍କ ପତ୍ନୀ ଆମେରିକୀୟ ନାଗରିକ ହୋଇଥିବାରୁ ଅଧିକାଂଶ ସମୟ ସେ ଆମେରିକାରେ ରହିଥାନ୍ତି । ଏହି ମହାଠକେଇ ଘଟଣାରେ ନିରଭଙ୍କ ସମେତ ତାଙ୍କ ସହଯୋଗୀଙ୍କ ପାସପୋର୍ଟ ରଦ୍ଦ କରିଛନ୍ତି ଭାରତ ସରକାର । ଏହାଛଡା ଏହି ଘଟଣାରେ ବ୍ରାଞ୍ଚ ମ୍ୟାନେଜରଙ୍କୁ ମିଶାଇ ୩ ଜଣଙ୍କୁ ଗିରଫ କରାଯାଇଛି ।