କନକ ବ୍ୟୁରୋ : ଦିଲ୍ଲୀବାସୀଙ୍କୁ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ବଡ ଉପହାର । ୨୦୦ ୟୁନିଟ୍ ଯାଏଁ ବିଜୁଳି ବିଲ୍ ଛାଡ । ଆଜି ଏନେଇ ଦିଲ୍ଲୀ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି । ଅର୍ଥାତ୍ ଦିଲ୍ଲୀରେ ଯେଉଁ ଉପଭୋକ୍ତା ମାସିକ ୨୦୦ ୟୁନିଟ୍ ରୁ କମ୍ ବିଜୁଳି ବ୍ୟବହାର କଲେ , ସେମାନଙ୍କୁ ଆଉ ବିଜୁଳି ବିଲ୍ ଦେବାକୁ ପଡିବ ନାହିଁ । ଏପରି ସବସିଡି ପାଇଁ ଦିଲ୍ଲୀ ସରକାରଙ୍କ ଉପରେ ୧୮ ଶହ କୋଟିର ବୋଝ ବଢିବ ।
Kanak News is now on WhatsApp
Join and get latest news updates delivered to you via WhatsApp
ତେବେ ୨୦୦ ୟୁନିଟରୁ ଅଧିକ ବିଜୁଳି ବ୍ୟବହାର କଲେ କିନ୍ତୁ ପୂର୍ବ ପରି ପୁରା ବିଜୁଳି ବିଲ୍ ଦେବାକୁ ପଡିବ ବୋଲି କହିଛନ୍ତି କେଜରିୱାଲ । ୨୦୧୩ ପୂର୍ବରୁ ଦିଲ୍ଲୀରେ ବିଜୁଳି ଉପଭୋକ୍ତାଙ୍କୁ ୨୦୦ ୟୁନିଟ୍ ବିଜୁଳି ପାଇଁ ୯ ଶହ ଟଙ୍କା ଦେବାକୁ ପଡୁଥିଲା । କିନ୍ତୁ ଏବେ ସମାନ ବିଜୁଳି ବ୍ୟବହାର କଲେ କୌଣସି ବିଲ୍ ଦେବାକୁ ପଡିବନାହିଁ । ଦିଲ୍ଲୀରେ ବିଜୁଳି କଂପାନୀର କ୍ଷତି ସଂପର୍କରେ ସୂଚନା ଦେବାକୁ ଯାଇ କେଜରିୱାଲ କହିଛନ୍ତି ଆଗରୁ ବିଜୁଳି କମ୍ପାନୀର କ୍ଷତି ୧୭ ପ୍ରତିଶତ ରହିଥିଲା ।
ଏହା ଏବେ କମି କମି ୮ ପ୍ରତିଶତକୁ ଆସିଛି । ସାରା ଦେଶରେ ବିଜୁଳି ଦର ବଢୁଥିବା ବେଳେ ଦିଲ୍ଲୀରେ ବିଜୁଳି ଦର କମ୍ ହୋଇଛି । ଏବେ ଉପଭୋକ୍ତାଙ୍କୁ ଛାଡ ବି ମିଳିଛି । ଦିଲ୍ଲୀରେ ଜନତା ଏକ ଇମାନଦାର ସରକାର ବାଛି ଥିବାରୁ, ବିଜୁଳି ଉପଭୋକ୍ତାଙ୍କୁ ଏପରି ଉପହାର ମିଳିଥିବା କହିଛନ୍ତି କେଜରିୱାଲ ।