କୋଲକାତା ଟୋଲପ୍ଲାଜା ଗୁଡିକରେ ସେନା ମୁତୟନ : ତୀବ୍ର ପ୍ରତିକ୍ରିୟା ପ୍ରକାଶ କଲେ ମମତାଙ୍କ ବାନାର୍ଜି
କନକ ବ୍ୟୁରୋ : ସଚିବାଳୟରେ ରାତି କାଟିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି । ପଶ୍ଚିମବଙ୍ଗର ବିଭିନ୍ନ ସ୍ଥାନରେ ସେନା ମୁତୟନ କରାଯାଇଥିବା ବିରୋଧରେ ସଚିବାଳୟରେ ଥିବା ନିଜ କାର୍ଯ୍ୟାଳୟରେ ରାତି କାଟିଛନ୍ତି ମମତା । ସଚିବାଳୟ ନିକଟ ଦନକୁନି ଓ ପଲସିତ ଟୋଲ ପ୍ଲାଜା ସହ ରାଜ୍ୟର ପାଖାପାଖି ୧୮ଟି ଜିଲ୍ଲାର ବିଭିନ୍ନ ସ୍ଥାନରେ ସେନା ମୁତୟନ କରାଯାଇଥିବା ନେଇ ଚିନ୍ତା ପ୍ରକାଶ କରିଛନ୍ତି ମମତା ବାନାର୍ଜି । ପଶ୍ଚିମବଙ୍ଗରେ ସେନା ମୁତୟନ କରିବା ଜରୁରୀ କାଳିନ ପରିସ୍ଥିତି ସହ ସମାନ ।
Kanak News is now on WhatsApp
Join and get latest news updates delivered to you via WhatsApp
ଯେପର୍ଯ୍ୟନ୍ତ ସେନାକୁ ହଟାଇ ଦିଆ ନଯାଇଛି ସେପର୍ଯ୍ୟନ୍ତ ସେ ସଚିବାଳୟରେ ଡେରା ପକାଇବେ ବୋଲି ଗତକାଲି କହିଥିଲେ ମମତା ବାନାର୍ଜି । ରାଜ୍ୟର ବିଭିନ୍ନ ସ୍ଥାନରେ ସେନା ମୁତୟନ କରାଯିବା ପୂର୍ବରୁ ରାଜ୍ୟ ସରକାରଙ୍କ ସହ କୌଣସି ଆଲୋଚନା କରା ଯାଇନାହିଁ ବୋଲି କହିଛନ୍ତି ମମତା । ଅପରପକ୍ଷରେ ମୁଖ୍ୟମନ୍ତ୍ରୀଙ୍କ ଏପରି ଅଭିଯୋଗକୁ ଖଣ୍ଡନ କରିଛି ସେନା ବିଭାଗ ।
ସେନାର ଏହା ନିୟମିତ ଅଭ୍ୟାସ ବୋଲି କୁହାଯାଇଛି । ରାଜ୍ୟ ପୁଲିସ ସହ ଆଲୋଚନା କରାଯାଇ ତାଙ୍କ ସହଯୋଗରେ ଏହି ଅଭ୍ୟାସ କରାଯାଉଥିବା ଇଷ୍ଟର୍ଣ୍ଣ କମାଣ୍ଡ ପକ୍ଷରୁ କୁହାଯାଇଛି । ତେବେ ଏହାକୁ ଖଣ୍ଡନ କରିଛି ପଶ୍ଚିମବଙ୍ଗ ପୁଲିସ । ସେନା ମୁତୟନ କରାଯିବା ନେଇ ମମତାଙ୍କ ପ୍ରତିକ୍ରିୟା ପରେ ବିଭିନ୍ନ ସ୍ଥାନରୁ ସେନାକୁ ହଟାଇ ଦିଆଯାଇଛି ।