ଶେଷ ପର୍ଯ୍ୟନ୍ତ ପ୍ରତିଶୃତି ମିଳିଥିଲା, କିନ୍ତୁ ଟିକେଟ ଘୋଷଣା ହେବା ପରେ ତାଲିକାରେ ନାଁ ନଥିଲା । ପୁଷ୍ପେନ୍ଦ୍ରଙ୍କ ପ୍ରାର୍ଥୀତ୍ୱକୁ ନେଇ ପ୍ରଶ୍ନ ଉଠାଇଲେ କଳାହାଣ୍ଡି ସାଂସଦ ଅର୍କକେଶରୀ
କନକ ବ୍ୟୁରୋ : କଳହାଣ୍ଡି ଲୋକସଭା ଆସନ ପାଇଁ ବିଜେଡି ପୁଷ୍ପେନ୍ଦ୍ର ସିଂହଦେଓଙ୍କୁ ମୈଦାନକୁ ଓହ୍ଲାଇବାକୁ ଘୋଷଣା କରିଛନ୍ତି । ଦିଲ୍ଲୀ ଲଢେଇ ପାଇଁ କଳାହାଣ୍ଡିରୁ ବିଜେଡି ସିପାହୀ ଭାବେ ଯୁଦ୍ଧ ମୈଦାନକୁ ଓହ୍ଲାଇବେ ଧର୍ମଗଡରୁ ଦୁଇ ଦୁଇଥର ବିଧାୟକ ଥିବା ପୁଷ୍ପେନ୍ଦ୍ର । ତେବେ ପୁଷ୍ପେନ୍ଦ୍ରଙ୍କ ପ୍ରାର୍ଥୀତ୍ୱକୁ ନେଇ ସବୁଠୁ ଅଧିକ ଆଶ୍ଚର୍ଯ୍ୟ ହୋଇଛନ୍ତି କଳାହାଣ୍ଡି ସାଂସଦ ଥିବା ଅର୍କ କେଶରୀ ଦେଓ । ଏପରିକି ନବୀନଙ୍କ ଏଭଳି ଘୋଷଣା ତାଙ୍କୁ ନିରାଶ କରିଥିବା କହିଛନ୍ତି ଅର୍କକେଶରୀ । କାରଣ କଳାହାଣ୍ଡି ସାଂସଦ ପ୍ରାର୍ଥୀ ହେବାକୁ ପ୍ରମୁଖ ଦାବିଦାର ଥିଲେ ଅର୍କକେଶରୀ ।
Kanak News is now on WhatsApp
Join and get latest news updates delivered to you via WhatsApp
କଳାହାଣ୍ଡି ସାଂସଦ ପ୍ରାର୍ଥୀ ଘୋଷଣା ପରେ ଅର୍କକେଶରୀ କହିଛନ୍ତି, ତାଙ୍କୁ ଶେଷ ପର୍ଯ୍ୟନ୍ତ ଟିକେଟ ଦିଆଯିବ ବୋଲି ପ୍ରତିଶୃତି ଦିଆଯାଇଥିଲା । ଯଦି ତାଙ୍କୁ ଦିଆନଯାଏ ତେବେ ତାଙ୍କ ପତ୍ନୀଙ୍କୁ ଟିକେଟ ଦିଆଯିବା ନେଇ ମଧ୍ୟ ଗ୍ରୀନ୍ ସିଗନାଲ ଦେଇଥିଲେ ବିଜେଡି ସୁପ୍ରିମୋ । କିନ୍ତୁ ଏହାପରେ ମଧ୍ୟ ଯେଉଁଭଳି ଭାବେ ତାଙ୍କର ଟିକେଟ କାଟିଦିଆଗଲା ତାହା ନିରାଶ କରିଛି ବୋଲି କହିଛନ୍ତି ଅର୍କକେଶରୀ । ଏପରି ଦଳ ଏଠାରେ ପୁଷ୍ପେନ୍ଦ୍ରଙ୍କୁ ପ୍ରାର୍ଥୀ କରିଛି, କିନ୍ତୁ ତାଙ୍କ ନେତୃତ୍ୱରେ ହିଁ ଦଳ ଗତ ପଞ୍ଚାୟତ ନିର୍ବାଚନରେ ପରାଜୟବରଣ କରିଥିଲା ।
ଅର୍କକେଶରୀ କହିଛନ୍ତି, ସେ ବିଜେଡିରେ ଯୋଗ ଦେବା ପରେ ଦଳ ଏଠାରେ ପ୍ରଥମ ଥର ପାଇଁ ଖାତା ଖୋଲିଥିଲା । ଏପରିକି ସେ ଦଳକୁ ଆସିବା ପରେ କଳାହାଣ୍ଡି ମ୍ୟୁନିସପାଲଟି ନିର୍ବାଚନରେ ମଧ୍ୟ ଦଳ ସଫଳତା ହାସଲ କରିଥିଲା । କିନ୍ତୁ ଏହାପରେ ମଧ୍ୟ ଟିକେଟ କାଟିଦେବା ତାଙ୍କୁ ଶକ୍ତ ଧକ୍କା ଦେଇଛି । ନିଜ ରାଜନୈତିକ ଭବିଷ୍ୟତକୁ ନେଇ ଅର୍କକେଶରୀ କହିଛନ୍ତି, ପ୍ରାର୍ଥୀପତ୍ର ଦାଖଲ ଶେଷ ହେବାକୁ ଆହୁରି ୫ ଦିନ ବାକି ଅଛି । କର୍ମୀ ଓ ଶୁଭେଚ୍ଛୁ ମାନଙ୍କର ମତାମତ ନିଆଯିବା ସହ ଆଲୋଚନା ଚାଲିଛି । ତେଣୁ ଖୁବଶୀଘ୍ର କୌଣସି ନିଷ୍ପତି ନେବେ ବୋଲି ସଂକେତ ଦେଇଛନ୍ତି ଅର୍କକେଶରୀ । ଯଦି ଅର୍କକେଶରୀ ଦଳ ଛାଡନ୍ତି ତେବେ କଳାହାଣ୍ଡି ରାଜନୈତିକ ଗଣିତ ସମ୍ପୂର୍ଣ୍ଣ ଭାବେ ଓଲଟପାଲଟ ହୋଇଯିବାର ସମ୍ଭାବନା ରହିଛି । ଏହାପୂର୍ବରୁ ୨୦୧୩ ମସିହାରେ ବିଜେଡିରେ ଯୋଗ ଦେଇଥିଲେ ଅର୍କକେଶରୀ ଓ ୨୦୧୪ରେ ବିଜେଡି ଟିକେଟରେ କଳାହାଣ୍ଡି ସାଂସଦ ଭାବେ ନିର୍ବାଚିତ ହୋଇଥିଲେ ।