ମହିଳା ସାମ୍ବାଦିକଙ୍କ ଗାଲରେ ହାତମାରି ବିବାଦରେ ଫସିଗଲେ ତାମିଲନାଡୁ ରାଜ୍ୟପାଳ ! ଯୌନ ଶୋଷଣ ନେଇ ଅଭିଯୋଗର ସଫେଇ ରଖିବାବେଳେ ଆଚରଣ ପାଇଁ ମାଗିଲେ କ୍ଷମା
କନକ ବ୍ୟୁରୋ : ହାତ ମାରି କ୍ଷମା ମାଗିଲେ ତାମିଲନାଡୁ ରାଜ୍ୟପାଳ । ମହିଳା ସାମ୍ବାଦିକଙ୍କ ଗାଲ ଆଉଁସି ବିବାଦୀୟ ହୋଇଥିବା ବନୱାରୀ ଲାଲ୍ ପୁରୋହିତ, ଶେଷରେ ତାଙ୍କ ଆଚରଣ ପାଇଁ କ୍ଷମା ମାଗିଛନ୍ତି । ଯୌନ ଶୋଷଣ ଭଳି ସଂଗୀନ ମାମଲାକୁ ନେଇ ସାମ୍ବାଦିକ ସମ୍ମିଳନୀ କରୁଥିବା ବେଳେ ରାଜ୍ୟପାଳ ଜଣେ ମହିଳା ପ୍ରଶ୍ନର ଉତ୍ତର ଦେବା ବଦଳରେ ତାଙ୍କ ଗାଲରେ ହାତ ମାରିଥିଲେ । ଆଉ ଏହି ଘଟଣା ପାଇଁ ସମ୍ବିଧାନର ଏକ ଶୀର୍ଷରେ ଥିବା ଜଣେ ବ୍ୟକ୍ତିଙ୍କୁ ମୁଣ୍ଡ ନୁଆଁଇବାକୁ ପଡ଼ିଛି ।
Kanak News is now on WhatsApp
Join and get latest news updates delivered to you via WhatsApp
ତାମିଲନାଡୁର ରାଜ୍ୟପାଳବନୱାରୀ ଲାଲ୍ ପୁରୋହିତ, ଯିଏ ସାମ୍ବାଦିକ ସମ୍ମିଳନୀରେ ଜଣେ ମହିଳା ସାମ୍ବାଦିକଙ୍କ ଗାଲକୁ ଆଉଁସି ଏକ ବଡ ଧରଣର ବିବାଦକୁ ନିମନ୍ତ୍ରଣ ଦେଇଥିଲେ । ଯେଉଁଥିପାଇଁ ସମ୍ବିଧାନର ଏକ ଶୀର୍ଷ ଆସନରେ ଥିବା ଜଣେ ରାଜ୍ୟପାଳଙ୍କୁ କ୍ଷମା ପ୍ରାର୍ଥନା କରିବାକୁ ପଡ଼ିଛି ।
ଘଟଣାଟି ବେଶ ବିବାଦୀୟ ହୋଇଥିଲା, ଯେତେବେଳେ ମହିଳା ସାମ୍ବାଦିକ ଟ୍ୱିଟ୍ କରି ଲେଖିଲେ-ମୁଁ ମୋ ମୁହଁକୁ ବାରମ୍ବାର ଧୋଇଲି । ହେଲେ ସେହି ଘଟଣାରୁ ମୁକ୍ତି ପାଇପାରୁନି । ରାଜ୍ୟପାଳ ବନୱାରୀ ପୁରୋହିତଙ୍କ ଆଚରଣ ଯୋଗୁଁ ମୁଁ କ୍ରାଧିତ । ହୁଏତ ଏହା ଆପଣଙ୍କ ପାଇଁ ପ୍ରଶଂସା କରିବାର ମଧ୍ୟମ ଏବଂ ଜେଜେବାପା ଭଳି ଆଚରଣ ହୋଇପାରେ, ମାତ୍ର ମୋ ଦୃଷ୍ଟିରେ ଏହା ଭୁଲ । ଆଉ ଏହି ଟ୍ୱିଟ୍ ପରେ ବିବାଦ ମୁଣ୍ଡ ଟେକିଥିଲା । ଘଟଣାର ପ୍ରତିବାଦରେ ରାଜରାସ୍ତାକୁ ଓହ୍ଲାଇଥିଲେ ସାଧାରଣ ଜନତା । ରାଜ୍ୟପାଳଙ୍କୁ କ୍ଷମା ପ୍ରାର୍ଥନା କରିବାକୁ ଦାବି କରାଗଲା ।
କେଉଁ ଭାବନା ରଖି ରାଜ୍ୟପାଳ ମହିଳା ସାମ୍ବାଦିକଙ୍କ ଗାଲକୁ ଆଉଁସିଥିଲେ ସେନେଇ ରାଜ୍ୟପାଳ ସ୍ପଷ୍ଟୀକରଣ ରଖିଛନ୍ତି ସତ, ହେଲେ ଜଣେ ରାଜ୍ୟପାଳ ଜନତାକୁ କ୍ଷମାମାଗିବା ଭଳି ଏକ ବିରଳ ଘଟଣା ଘଟିିଛି ତାମିଲନାଡୁରେ । ବଡ କଥା ହେଉଛି-ଏଭଳି ଏକ ଘଟଣା ଠିକ୍ ସେତିକି ବେଳେ ଘଟିଥିଲା, ଯେତେବେଳେ ଯୌନ ଶୋଷଣ ମାମଲା ନେଇ ରାଜ୍ୟପାଳ ବନୱାରୀ ଲାଲ୍ ରାଜଭବନରେ ସାମ୍ବାଦିକ ସମ୍ମିଳନୀ କରୁଥିଲେ । ସାମ୍ବାଦିକ ସମ୍ବିଳନୀ ପଛରେ ଥିଲା ଏକ ଯୌନ ଶୋଷଣର କାହାଣୀ ।
ଦେବାଙ୍ଗ ଆର୍ଟସ୍ କଲେଜର ଜଣେ ମହିଳା ପ୍ରଫେସର, ଛାତ୍ରୀମାନଙ୍କୁ ଭଲ ନମ୍ବର ରଖିବାକୁ ହେଲେ ଅଧିକାରୀମାନଙ୍କ ସହ ସଂପର୍କ ରଖିବାକୁ ବାଧ୍ୟ କରୁଥିଲେ । ଆଉ ଏହି ମାମଲାରେ ତାଙ୍କୁ ଗିରଫ କରାଯାଇଥିଲା । ଅଧ୍ୟାପିକା ଜଣକ, ରାଜ୍ୟପାଳଙ୍କ ଖାସ୍ ଲୋକ ବୋଲି ଦାବି କରି ଆସୁଥିଲେ । ଯାହାକୁ ନେଇ ବିବାଦ ହେବା ପରେ ରାଜ୍ୟପାଳଙ୍କୁ ସାମ୍ବାଦିକ ସମ୍ମିଳନୀ ଡାକି ସ୍ପଷ୍ଟୀକରଣ ରଖିବାକୁ ବାଧ୍ୟ ହୋଇଥିଲେ । ଯୌନ ଶୋଷଣ ମାମଲାର ତଦନ୍ତ ପାଇଁ ସାମ୍ବାଦିକ ସମ୍ମିଳନୀରେ ପ୍ରତିଶ୍ରୁତି ଦେଉଥିବା ରାଜ୍ୟପାଳ, ସାମ୍ବାଦିକ ସମ୍ମିଳନୀ ପରେ ଏମିତି ଏକ ଆଚରଣ କଲେ, ଯାହା ଖୋଦ୍ ତାଙ୍କୁ ହରଡଘଣାକୁ ଟାଣିନେଲା ।