ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଲେ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ । ବିଜୟ ପାଇଁ ନବୀନଙ୍କୁ ଜଣାଇଲେ ଶୁଭେଚ୍ଛା, ମିଳିମିଶି କାମ କରିବାକୁ ଦେଲେ ପ୍ରତିଶୃତି ।
କନକ ବ୍ୟୁରୋ: ଆଜି ମୁଖ୍ୟମନ୍ତ୍ରୀଙ୍କୁ ଭେଟିଛନ୍ତି ଭୁବନେଶ୍ୱରର ନବନିର୍ବାଚିତ ସାଂସଦ ଅପରାଜିତା ଷଡଙ୍ଗୀ । ଭୁବନେଶ୍ୱର ସାଂସଦ ଭାବେ ନିର୍ବାଚିତ ହେବା ପରେ ମୁଖ୍ୟମନ୍ତ୍ରୀଙ୍କ ସହିତ ଏହା ତାଙ୍କର ଥିଲା ପ୍ରଥମ ସାକ୍ଷାତ । ତେବେ ଏହି ସାକ୍ଷାତକାରକୁ ସେ କେବଳ ସୌଜନ୍ୟମୂଳକ ସାକ୍ଷାତ ବୋଲି କହିଛନ୍ତି । ବିଜୟୀ ହେବା ପରେ ସମସ୍ତଙ୍କୁ ଭେଟି ସେ କୃତଜ୍ଞତା ଜଣାଉଥିବା କହିଛନ୍ତି । ଏହି ଅବସରରେ ସେ ମୁଖ୍ୟମନ୍ତ୍ରୀଙ୍କୁ ବିଜୟ ପାଇଁ ଶୁଭେଚ୍ଛା ଜଣାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱର ସଂସଦୀୟ କ୍ଷେତ୍ରର ବିକାଶ ପାଇଁ ଯାହା ସହଯୋଗ ଆବଶ୍ୟକ ଜଣେ ସାଂସଦ ଭାବେ ସେ ତାହା କରିବେ ବୋଲି ମୁଖ୍ୟମନ୍ତ୍ରୀଙ୍କୁ ଭେଟି ପ୍ରତିଶ୍ରୁତି ଦେଇଥିବା କହିଛନ୍ତି ଅପରାଜିତା । ବିକାଶରେ କୌଣସି ଦଳ ନଥାଏ, ତେଣୁ ପରସ୍ପର ମିଳିମିଶି କାମ କରିବେ ବୋଲି କହିଛନ୍ତି ଅପରାଜିତା ।
ଚଳିତ ଲୋକସଭା ନିର୍ବାଚନରେ ବିଜେଡି ପ୍ରାର୍ଥୀ ଅରୂପ ପଟ୍ଟନାୟକଙ୍କୁ କଡା ମୁକାବିଲାରେ ପରାସ୍ତ କରି ଭୁବନେଶ୍ୱରରୁ ପ୍ରଥମ ଥର ପାଇଁ ସାଂସଦ ହୋଇଥିଲେ ଅପରାଜିତା । ଏପରିକି ଭୁବନେଶ୍ୱର ସଂସଦୀୟ କ୍ଷେତ୍ରରେ ପ୍ରଥମ ଥର ପାଇଁ ପଦ୍ମ ଫୁଟାଇଥିଲେ ଅପରାଜିତା । ଭାରତୀୟ ପ୍ରଶାସନିକ ସେବାରେ ଥିବା ଅପରାଜିତା ନିର୍ବାଚନ ପୂର୍ବରୁ ଚାକିରୀରୁ ସ୍ୱେଚ୍ଛାକୃତ ଭାବେ ଅବସର ନେବା ସହ ବିଜେପିରେ ସାମିଲ ହୋଇଥିଲେ ଏବଂ ଦଳ ପକ୍ଷରୁ ତାଙ୍କୁ ଭୁବନେଶ୍ୱର ଆସନରେ ପ୍ରାର୍ଥୀ କରାଯାଇଥିଲା ।