ଥରହର ହେବ ଶତ୍ରୁ ଶିବିର, ଆକାଶମାର୍ଗରୁ ଟାର୍ଗେଟକୁ ନିମିଷକେ କରିବ ଧ୍ୱଂସ । ଆସନ୍ତାକାଲି ବାୟୁସେନାରେ ସାମିଲ ହେବ ବିଧ୍ୱଂସକାରୀ ବିମାନ ଅପାଚେ ।
ଏଥର ଆଉ ମିଳିବନି ତ୍ରାହି, ଥରହର ହେବ ଶତ୍ରୁ ଶିବିର । ଆଖି ପିଛୁଳାକେ ଶତ୍ରୁ ଶିବିରକୁ ଆକାଶମାର୍ଗରୁ ଧ୍ୱଂସ କରିବାକୁ ସେନାରେ ସାମିଲ ହେବ ବିଧ୍ୱଂସକାରୀ ଅପାଚେ ହେଲିକପ୍ଟର । ଆସନ୍ତାକାଲି ବାୟୁସେନାରେ ସାମିଲ ହେବ ଆମେରିକା ନିର୍ମିତ ଅପାଚେ ଏଏଚ୍ ୬୪ ଇ ହେଲିକପ୍ଟର । ଆଉ ଏହି ହେଲିକପ୍ଟର ଭାରତୀୟ ବାୟୁସେନାକୁ ଆହୁରି ଶକ୍ତିଶାଳୀ କରିବ । ପ୍ରାଥମିକ ପର୍ଯ୍ୟାୟରେ ଏହାକୁ ପାକିସ୍ତାନ ସୀମା ନିକଟବର୍ତ୍ତୀ ପଠାନକୋଟ ଏୟାରବେସରେ ସାମିଲ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ଆକାଶପଥରୁ ଆଖି ପିଛୁଳାକେ ଟାର୍ଗେଟକୁ ଧ୍ୱଂସ କରିପାରୁଥିବା ଏହି ହେଲିକପ୍ଟର ଶତ୍ରୁ ଶିବିରରେ ଭୟ ସୃଷ୍ଟି କରିବାକୁ ଯଥେଷ୍ଟ । ଟ୍ୟାଙ୍କ୍, ଗାଡିକୁ ଧ୍ୱଂସ କରିବାରେ ମାହିର ଥିବା ଅପାଚେ ପୂରା ବିଶ୍ୱରେ ବିଧ୍ୱଂସକାରୀ ହେଲିକପ୍ଟର ଭାବେ ଜଣାଶୁଣା । ଏହି ହେଲିକପ୍ଟରରେ ୩୦ ଏମଏମ ମେଶିନଗନ ସଂଯୁକ୍ତ ରହିଛି । ଯେଉଁଥିରୁ ଗୋଟିଏ ଥରରେ ୧୨୦୦ ରାଉଣ୍ଡ ପର୍ଯ୍ୟନ୍ତ ଗୁଳି ଚଳାଇ ଯାଇପାରିବ । ଏହାଛଡା ଏଥିରେ ଆଣ୍ଟି ଟ୍ୟାଙ୍କ୍ ହେଲଫାୟାର ମିସାଇଲ ରହିଛି ଯାହା ଶତ୍ରୁ ପକ୍ଷର ଟ୍ୟାଙ୍କକୁ ଥରକେ ନଷ୍ଟ କରିବାକୁ ସକ୍ଷମ ।
୧୫୦ ନଟିକାଲ ମିଲ ବେଗରେ ଉଡାଣ ଭରୁଥିବା ଏହି ଅପାଚେ ହେଲିକପ୍ଟରରେ ହାଇଡ୍ରା ଅନଗାଇଡେଡ ରକେଟ ମଧ୍ୟ ରହିଛି । ଯାହା ସ୍ଥଳଭାଗରେ ଥିବା ଟାର୍ଗେଟକୁ ବେଶ ସହଜରେ ଧ୍ୱଂସ କରିଥାଏ । ୨୦୧୫ରେ ଆମେରିକା ସହ ୨୨ଟି ହେଲିକପ୍ଟର ପାଇଁ ଚୁକ୍ତି କରିଥିଲା ଭାରତ । ଶତ୍ରୁପକ୍ଷର ସୀମାରେ ପଶି ଆକ୍ରମଣ କରିବାରେ ମାହିର ଥିବା ଏହି ହେଲିକପ୍ଟରକୁ ଆମେରିକା ସେନା ମଧ୍ୟ ବ୍ୟବହାର କରୁଛି । ଭାରତୀୟ ବାୟୁସେନା ଏବେ ଋଷ ନିର୍ମିତ ଏମଆଇ ୩୫ ଓ ଏମଆଇ୍ ୨୫ ହେଲିକପ୍ଟର ବ୍ୟବହାର କରୁଛି । ପାକିସ୍ତାନର ବାରମ୍ବାର ପରମାଣୁ ଧମକ ମଧ୍ୟରେ ଅପାଚେ ହେଲିକପ୍ଟର ସାମିଲ ହେବା ଭାରତୀୟ ବାୟୁସେନାକୁ ଆହୁରି ଶକ୍ତିଶାଳୀ କରିବ ।