ମହାରାଷ୍ଟ୍ରରେ ଛାଡ ହେଲା କୃଷି ଋଣ ! ଆନ୍ଦୋଳନରୁ ଓହରିଲେ ଚାଷୀ ସଂଗଠନ
କନକ ବ୍ୟୁରୋ: ମହାରାଷ୍ଟ୍ରରେ ଛାଡ଼ ହେବ କୃଷକଙ୍କ ଋଣ । ଏହା ଘୋଷଣା କରିଛନ୍ତି ମହାରାଷ୍ଟ୍ର ସରକାର । କୃଷି ଋଣ ଛାଡ଼ ଦାବିରେ ରାଜ୍ୟବ୍ୟାପି ଚାଷୀ ଆନ୍ଦୋଳନ ମୁଣ୍ଡ ଟେକିଥିବାବେଳେ ଆଜି ବଡ଼ ଧରଣର ଚାଷୀ ବିକ୍ଷୋଭ ଯୋଜନା କରିଥିଲେ କୃଷକ ସଂଗଠନ । ତେବେ ସରକାରଙ୍କ ଏହି ଘୋଷଣା ପରେ ଚାଷୀ ସଂଗଠନଗୁଡିକ ଆନ୍ଦୋଳନରୁ ଓହରି ଯାଇଛନ୍ତି । ଏବଂ ସରକାରଙ୍କ ପଦକ୍ଷେପକୁ ଅତ୍ୟନ୍ତ ସ୍ୱାଗତଯୋଗ୍ୟ ପଦକ୍ଷେପ ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସଙ୍କ ଅଧକ୍ଷତାରେ ୩ଘଂଟା ଧରି ଋଣ ଛାଡ ସଂକ୍ରାନ୍ତ ନିଷ୍ପତି ନେବା ପାଇଁ ବୈଠକ ଅନୁଷ୍ଠିତ ହୋଇଥିଲା । ବୈଠକ ପରେ କୃଷି ଋଣ ଛାଡ଼ କରିବାକୁ ସରକାର ଘୋଷଣା କରିଛନ୍ତି । ଏହା ସହ କୃଷକଙ୍କ ବିରୋଧରେ ରୁଜୁ ହୋଇଥିବା ମାମଲା ପ୍ରତ୍ୟାହାର ଦିଗରେ ମଧ୍ୟ ପଦକ୍ଷେପ ନିଆଯିବ ବୋଲି ବୈଠକରେ ନିଷ୍ପତି ହୋଇଛି । ଏଥିପାଇଁ ସରକାର ଏବଂ ଚାଷୀ ପ୍ରତିନିଧିମାନଙ୍କୁ ନେଇ ଏକ କମିଟି ଗଠନ ହେବ ।
ଏହି କମିଟି କୃଷକଙ୍କ ସ୍ୱାର୍ଥ ରକ୍ଷା ଦିଗରେ ନିଆଯାଉଥିବା ପଦକ୍ଷେପକୁ ତ୍ୱରାନ୍ୱିତ କରିବା ଦିଗରେ କାର୍ଯ୍ୟ କରିବ । ସରକାରଙ୍କ ଏହି ନିଷ୍ପତି ଚାଷୀ ସଂଗଠନ ଗୁଡିକୁ ଆଶ୍ୱସ୍ତ କରିଛି । ତେବେ ଆଜିଠାରୁ ଆରମ୍ଭ ହେବାକୁ ଥିବା ରାଜ୍ୟବ୍ୟାପି ବିକ୍ଷୋଭ କାର୍ଯ୍ୟକ୍ରମକୁ ରଦ୍ଦ କରାଯାଇଛି । ଏନେଇ ବିଭିନ୍ନ କୃଷକ ସଂଗଠନମାନେ ଘୋଷଣା କରିଛନ୍ତି ।