ଜଗନମୋହନଙ୍କ ପ୍ରାଥମିକତା ପୋଲାଭରମ । ଶୀଘ୍ର ପ୍ରକଳ୍ପ ସାରିବାକୁ ଅଫିସରଙ୍କୁ ନିର୍ଦ୍ଦେଶ ।
କନକ ବ୍ୟୁରୋ: ପୋଲାଭରମ ପ୍ରକଳ୍ପ ପାଇଁ ଆକ୍ସନ ମୋଡରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀ । ପୋଲାଭରମ ପ୍ରକଳ୍ପକୁ ଶୀଘ୍ର ସାରିବାକୁ ସରକାରୀ କଳକୁ ନିର୍ଦ୍ଦେଶ ଦେଇଛନ୍ତି ଜଗନ । ବର୍ତ୍ତମାନ ପୋଲାଭରମ କାର୍ଯ୍ୟ କେତେ ବାଟ ଆଗେଇଲାଣି ତାହାର ସମୀକ୍ଷା କରିବା ସହ କଣ ସବୁ ଆବଶ୍ୟକତା ରହିଛି ତାହାକୁ ନେଇ ଅଧିକାରୀଙ୍କ ସହ ଆଲୋଚନା କରିଛନ୍ତି ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ସେପଟ ବୈଠକ ପରେ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀ ଘୋଷଣା କରିଛନ୍ତି ଯେ କୌଣସି ପ୍ରକାର ଦୁର୍ନୀତିକୁ ପ୍ରଶୟ ଦିଆଯିବନାହିଁ । ସେହିପରି ଯେଉଁ ଅଧିକାରୀ ଭଲ କାମ କରିବେ ତାଙ୍କୁ ପୁରସ୍କାର ଦିଆଯିବ ବୋଲି ଜଗନ ସ୍ପଷ୍ଟ କରିଛନ୍ତି । କିଭଳି ଗୋଦାବରୀ ନଦୀର ପାଣିକୁ ସମୁଦ୍ରକୁ ନଛାଡି ସଂଚୟ କରି ରଖି ହେବ ତାହାର ଯୋଜନା ପ୍ରସ୍ତୁତ କରିବାକୁ ଜଗନ ନିର୍ଦ୍ଦେଶ ଦେଇଛନ୍ତି । ହେଲେ ପୂର୍ବରୁ ପୋଲାଭରମ ପ୍ରକଳ୍ପକୁ ଓଡିଶା, ଛତିଶଗଡ଼ ଓ ତେଲେଙ୍ଗାନା ବିରୋଧ କରିଆସୁଛନ୍ତି । ଏହା ଦ୍ୱାରା ଓଡ଼ିଶାର ମାଲକାନଗିରି ଜିଲ୍ଲା ପ୍ରଭାବିତ ହେବ ବୋଲି ଓଡିଶା ସରକାର ଯୁକ୍ତି ବାଢି ଆସୁଛନ୍ତି ।
ଅନ୍ୟପଟେ ଆନ୍ଧ୍ର ପ୍ରଦେଶ ଜଳସେଚନ ସଚିବ କହିଛନ୍ତି କି, ପୋଲାଭରମ ପ୍ରକଳ୍ପ ବାବଦକୁ ରାଜ୍ୟ ସରକାର ୧୧୫୩୭ କୋଟି ଟଙ୍କା ଖର୍ଚ୍ଚ କରିସାରିଲେଣି । କେନ୍ଦ୍ର ୪୮୧୦ କୋଟି ଟଙ୍କା ଦେଇଛି । ସେହିପରି ଏହି ପ୍ରକଳ୍ପ ସାରିବାକୁ ହେଲେ ଅତିରିକ୍ତ ୧୨ ହଜାର କୋଟି ଟଙ୍କା ଆବଶ୍ୟକ ବୋଲି ସେ କହିଛନ୍ତି । ତେବେ ଆସନ୍ତା ଜୁନ ୬ ତାରିଖରେ ପୁଣି ଥରେ ପୋଲାଭରମ ପ୍ରକଳ୍ପ ବାବଦରେ ପୁର୍ନବାର ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଆଲୋଚନା କରିବେ ବୋଲି ସୂଚନା ମିଳିଛି ।