ଉଦାହରଣ ପାଲଟିଲେ ଆନ୍ଧ୍ର ମୁଖ୍ୟମନ୍ତ୍ରୀ । ଚିକିତ୍ସା ପାଇଁ ସାହାଯ୍ୟ ମାଗୁଥିଲେ କର୍କଟ ରୋଗୀ, ପୀଡ଼ିତଙ୍କୁ ଦେଖି ୨୦ ଲକ୍ଷ ଟଙ୍କା ସହାୟତା ଦେଲେ ଜଗନ ।
କନକ ବ୍ୟୁରୋ: ନିଜର ପ୍ରଥମ ସରକାରରେ ହୃଦୟ ଜିଣିଲେ ଆନ୍ଧ ପ୍ରଦେଶ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡି । ବିମାନବନ୍ଦରରେ ପ୍ଲାକାର୍ଡ ଧରି ସାହାଯ୍ୟ ମାଗୁଥିବା ଜଣେ କର୍କଟ ପୀଡ଼ିତଙ୍କୁ ୨୦ଲକ୍ଷ ଟଙ୍କା ସହାୟତା ଦେଇ ନବ ନିର୍ବାଚିତ ସରକାର ଆନ୍ଧ୍ରବାସୀଙ୍କ ସହ ରହିଛନ୍ତି ବୋଲି ପ୍ରମାଣିତ କରିଛନ୍ତି । ତାଙ୍କର ଏଭଳି କାମ କରିବା ପରେ ଲୋକେ ତାଙ୍କୁ ପ୍ରଶଂସା କରିବାରେ ଲାଗି ପଡ଼ିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆନ୍ଧ୍ରପ୍ରଦେଶର ନବ ନିର୍ବାଚିତ ମୁଖ୍ୟମନ୍ତ୍ରୀ ଓ୍ଵାଇଏସ୍ ଜଗନ ମୋହନ ରେଡ୍ଡୀ ପୁଣି ଥରେ ଏକ ଉଦାହରଣ ସୃଷ୍ଟି କରିଛନ୍ତି । ସୂଚନା ମୁତାବକ, ବିଶାଖାପଟନମ୍ ଗସ୍ତରେ ଯାଇଥିବା ବେଳେ ବିମାନବନ୍ଦର ରାସ୍ତାରେ ମୁଖ୍ୟମନ୍ତ୍ରୀ ଜଗନ ମୋହନ ଜଣେ ବ୍ୟକ୍ତି କର୍କଟ ରୋଗର ଚିକିତ୍ସା ପାଇଁ ପ୍ଲାକାର୍ଡ ଧରି ସାହାଯ୍ୟ ମାଗୁଥିବା ଦେଖିଥିଲେ । ଏହା ପରେ ତୁରନ୍ତ ଗାଡ଼ି ଅଟକାଇ ସାହାଯ୍ୟ ମାଗୁଥିବା ବ୍ୟକ୍ତିଙ୍କ ପାଖରେ ପହଞ୍ଚିଥିଲେ ଜଗନ ରେଡ୍ଡୀ । ସେଠାରେ ପହଞ୍ଚିବା ପରେ ବ୍ୟକ୍ତିଜଣଙ୍କ ନିଜ ବନ୍ଧୁଙ୍କୁ ରକ୍ତ କର୍କଟ ରୋଗ ହୋଇଥିବା କଥା ଜଣାଇଥିଲେ । ଏହା ସହ ୨୫ଲକ୍ଷ ଟଙ୍କାର ଖର୍ଚ୍ଚ ହେବ ବୋଲି ଜଣାଇବା ପରେ ମୁଖ୍ୟମନ୍ତ୍ରୀ ଜଗନ ରେଡ୍ଡୀ ତୁରନ୍ତ ୨୦ଲକ୍ଷ ଟଙ୍କା ଦେବା ସହ ଭଲ ଡ଼ାକ୍ତରଖାନାରେ ଚିକିତ୍ସା ପାଇଁ ବ୍ୟବସ୍ଥା କରାଇଥିଲେ ବୋଲି ଜଣା ପଡ଼ିଛି ।
ବର୍ତ୍ତମାନ ଆନ୍ଧ୍ର ମୁଖ୍ୟମନ୍ତ୍ରୀଙ୍କ ଏଭଳି କାର୍ଯ୍ୟକୁ ନେଇ ସାରା ରାଜ୍ୟରେ ଜଗନଙ୍କ ଭୂରି ଭୂରି ପ୍ରଶଂସା କରୁଛନ୍ତି ସାଧାରଣ ଜନତା । ଜଣେ ନବ ନିର୍ବାଚିତ ଏବଂ ନୂଆ ସରକାରର ଡ଼ୋରୀ ହାତକୁ ନେବା ପରେ ନିଜର ମାନବିକତା ଏବଂ କ୍ଷମତାର ସଦୁପଯୋଗ କରିବା ଭଳି ଉଦାହରଣ କାର୍ଯ୍ୟ ସମସ୍ତଙ୍କ ହୃଦରେ ତାଙ୍କ ପ୍ରତି ସମ୍ମାନ ବଢ଼ାଇ ଦେଇଛି ବୋଲି ଦେଖିବାକୁ ମିଳିଛି ।