ଅନନ୍ତଙ୍କୁ ମିଳିଲା ନୂଆ ଦାୟିତ୍ୱ, ଦଳକୁ ଫେରିଲେ ଗୋବିନ୍ଦ! ଉଭୟଙ୍କ ନାଁରେ ମୋହର ମାରିଲେ ନବୀନ
କନକ ବୁରୋ : ଅବୁଝା ଅନନ୍ତଙ୍କୁ ନୂଆ ଦାୟିତ୍ୱ । ପୂର୍ବତନ ମେୟର ଅନନ୍ତ ନାରାୟଣ ଜେନାଙ୍କୁ ଦଳରେ ମିଳିଲା ଗୁରୁ ଦାୟିତ୍ୱ । ଖୋଦ୍ ଦଳର ସୁପ୍ରିମୋ ନବୀନ ପଟ୍ଟନାୟକ ଅନନ୍ତଙ୍କୁ ବିଜେଡିର ରାଜ୍ୟ ସାଧାରଣ ସଂପାଦକ ଭାବେ ନିଯୁକ୍ତି ଦେଇଛନ୍ତି । ଏହାସହ ପୂର୍ବତନ ମେୟରଙ୍କ ମନ ଖୁସି କରିବାକୁ ଭୁବନେଶ୍ୱର ସାଙ୍ଗଠନିକ ଜିଲ୍ଲାର ପର୍ଯ୍ୟବେକ୍ଷକ ଓ କେନ୍ଦୁଝର ଜିଲ୍ଲା ପାଟଣା ବିଧାନସଭା ନିର୍ବାଚନ ମଣ୍ଡଳୀର ପର୍ଯ୍ୟବେକ୍ଷକ ଭାବେ ନିଯୁକ୍ତି ଦିଆଯାଇଛି । ପୂର୍ବରୁ ଅନନ୍ତଙ୍କୁ ବିଡିଏ ଅଧ୍ୟକ୍ଷ ପଦରେ ନିଯୁକ୍ତି ଦେଇଥିଲେ ବିଜେଡି ସୁପ୍ରିମୋ । କିନ୍ତୁ ସେତେବେଳେ ଅନନ୍ତଙ୍କୁ ଏହି ପଦ ସନ୍ତୁଷ୍ଟ କରିପାରିନଥିଲା । ଏପରିକି ବିଡିଏ ଅଧ୍ୟକ୍ଷ ପଦର ଦାୟିତ୍ୱ ମଧ୍ୟ ନେଇ ନଥିଲେ ଅନନ୍ତ ।
Kanak News is now on WhatsApp
Join and get latest news updates delivered to you via WhatsApp
୨୦୧୯ରେ ଅନନ୍ତ ଭୁବନେଶ୍ୱର ଉତ୍ତର କିମ୍ବା ମଧ୍ୟ ଆସନରୁ ବିଧାୟକ ଭାବେ ଲଢିବାକୁ ଆଗ୍ରହୀ ଥିବା ବେଳେ ବିଡିଏ ଅଧ୍ୟକ୍ଷ ପଦ ଦାୟିତ୍ୱ ଦେଇ ତାଙ୍କର ବିଧାୟକ ଟିକେଟ କାଟିବାକୁ ବିଜେଡିର ଥିଙ୍କଟ୍ୟାଙ୍କ ଯୋଜନା କରୁଥିବା ଚର୍ଚ୍ଚା ହେଉଥିଲା । କିନ୍ତୁ ଅନନ୍ତଙ୍କୁ ବିଡିଏ ଅଧ୍ୟକ୍ଷ ପଦର ଦାୟିତ୍ୱ ମିଳିବା ପରେ ମଧ୍ୟ ସେ ଦାୟିତ୍ୱ ନେଇନଥିଲେ । ଯାହା ଦର୍ଶାଉଥିଲା ଏହି ପଦ ଦେଇ ଅନନ୍ତଙ୍କୁ ସନ୍ତୁଷ୍ଟ କରିପାରିନାହିଁ । ଗୋଟିଏ ପଟେ ପୂର୍ବରୁ ବିବାଦୀୟ ହୋଇ ଆସିଥିବା ଅନନ୍ତଙ୍କୁ ବିଧାୟକ ଟିକେଟ ଦେଇ ଦଳ ରିସ୍କ ନେବାକୁ ଚାହୁଁନଥିବା ବେଳେ ଅନ୍ୟପଟେ ଦୁଇ ଦୁଇଥର ମେୟର ଥିବା ଅନନ୍ତଙ୍କୁ ଅସନ୍ତୁଷ୍ଟ କରିବାକୁ ମଧ୍ୟ ବିଜେଡି ଚାହୁଁନାହିଁ । ଅନନ୍ତଙ୍କ ହାତରେ ବଡ ଭୋଟବ୍ୟାଙ୍କ ରହିଥିବା ବେଳେ ନିର୍ବାଚନ ପୂର୍ବରୁ ତାଙ୍କୁ ଅସନ୍ତୁଷ୍ଟ କରିବା ଦଳ ପାଇଁ ମହଙ୍ଗା ପଡିପାରେ ବୋଲି ପରବର୍ତ୍ତୀ ସମୟରେ ବିଜେଡିର କ୍ରାଇସିସ ମ୍ୟାନେଜର ବୁଝିପାରିଥିଲେ । ତେଣୁ ଅନନ୍ତଙ୍କୁ ଦଳର ବିଭିନ୍ନ ପଦପଦବୀରେ ଦାୟିତ୍ୱ ଦେଇ ସନ୍ତୁଷ୍ଟ କରାଯାଉଥିବା ଚର୍ଚ୍ଚା ହେଉଛି ।
ସେହିଭଳି ପାରାଦ୍ୱୀପ ପୌରପାଳିକାର ପୂର୍ବତନ ଅଧ୍ୟକ୍ଷ ଗୋବିନ୍ଦ ତରାଇଙ୍କ ନିଲମ୍ବନ ଆଦେଶକୁ ଦଳର ସଭାପତି ପ୍ରତ୍ୟାହାର କରିନେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।