ମମତାଙ୍କୁ ସମାଲୋଚନା କରି ନବୀନଙ୍କୁ ପ୍ରଶଂସା କଲେ ଅମିତ ଶାହା : କହିଲେ, ପଶ୍ଚିମବଙ୍ଗ ଭଳି ବିଜେଡ଼ିଙ୍କ ଶାସନରେ ହେଉନି ହିଂସାକାଣ୍ଡ, ସେପଟେ ନବୀନଙ୍କୁ ଅଣ-ଏନଡିଏ ବୈଠକକୁ ଡାକିଲେ ସୋନିଆ
କନକ ବ୍ୟୁରୋ : ଭୋଟ୍ ଗଣତିର ଦିନ ଯେତିକି ପାଖେଇ ପାଖେଇ ଆସୁଛି, ରାଜନୈତିକ ଦଳଙ୍କ ମଧ୍ୟରେ ଥିବା ସମୀକରଣରେ ସେତିକି ପରିବର୍ତ୍ତନ ଆସିବାରେ ଲାଗିଛି । ନିର୍ବାଚନ ପ୍ରଚାର ବେଳେ ବିଜେଡି ସରକାରକୁ କଡା ସମାଲୋଚନା କରୁଥିବା ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ସ୍ୱର ଟିକେ ନରମି ଯାଇଛି । ଗତକାଲି ପଶ୍ଚିମବଙ୍ଗରେ ହିଂସାକାଣ୍ଡ ପରେ ଶାହା କହିଛନ୍ତି, ନବୀନଙ୍କ ଶାସନରେ ଏଭଳି କେବେ ଘଟେ ନାହିଁ । ଶାହାଙ୍କ ଏହି ମନ୍ତବ୍ୟ ଅନେକଙ୍କୁ ଆଶ୍ଚର୍ଯ୍ୟ କରିଛି । କିଛି ଦିନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ନବୀନଙ୍କୁ ପ୍ରଶଂସା କରି କହିଥିଲେ, ବାତ୍ୟାର ଭଲଭାବେ ମୁକାବିଲା କରିଛି ବିଜେଡି ସରକାର । ଏହାପରେ ନବୀନ ମଧ୍ୟ ବାତ୍ୟା ସମୟରେ କେନ୍ଦ୍ରର ଆଭିମୁଖ୍ୟକୁ ପ୍ରଶଂସା କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ପଶ୍ଚିମବଙ୍ଗରେ ବିଜେପିର ବିଶାଳ ରୋଡ୍ ସୋ ବେଳେ ସୃଷ୍ଟି ହୋଇଥିବା ପୋଡ଼ାଜଳା ଏବଂ ହିଂସାକାଣ୍ଡ ସଂପର୍କରେ କହିବାକୁ ଯାଇ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଏଭଳି ଏକ ବୟାନ ଦେଇଛନ୍ତି, ଯାହା ନବୀନଙ୍କ ଭାବମୂର୍ତ୍ତିକୁ ଆହୁରି ମଜବୁତ କରିଛି । ଶାହା କହିଛନ୍ତି,
ଦେଶରେ ଅନେକ ଦଳର ଶାସନ ଚାଲିଛି । ଓଡ଼ିଶାରେ ନବୀନ ବାବୁଙ୍କ ଶାସନ ଚାଲିଛି, ହେଲେ କାହିଁ କୌଣସି ସ୍ଥାନରେ ତ’ ଏଭଳି ହିଂସାକାଣ୍ଡ ଦେଖାଯାଉନି ।
କ୍ଷମତାର ଗାଦିରେ ବସିବା ପାଇଁ ପଶ୍ଚିମବଙ୍ଗରେ ବିଜେପି-ଟିଏମସି ସାମ୍ନା-ସାମ୍ନି ହେଉଥିବା ବେଳେ ଏପଟେ କଂଗ୍ରେସ ସାଥୀ ଖୋଜିବା ପାଇଁ ଆରମ୍ଭ କରିଦେଇଛି ପ୍ରକ୍ରିୟା । ଜାତୀୟ ଗଣମାଧ୍ୟରେ ପ୍ରକାଶିତ ରିପୋର୍ଟ ଅନୁସାରେ ଆସନ୍ତା ମେ’ ୩ ତାରିଖ, ଅର୍ଥାତ୍ ଠିକ୍ ଫଳାଫଳ ଆସିବା ଦିନ ୟୁପିଏ ସହଯୋଗୀ ଦଳଙ୍କ ସହ କିଛି ଅଣ-ଏନଡିଏ ଦଳକୁ ନେଇ ବୈଠକ ଡାକିଛନ୍ତି ସୋନିଆ ଗାନ୍ଧୀ । ସୂଚନା ଅନୁସାରେ ବିଜୁ ଜନତା ଦଳ, ତେଲୁଗୁ ଦେଶମ, ୱାଇଏସଆର କଂଗ୍ରେସ ଓ ତେଲେଙ୍ଗାନା ରାଷ୍ଟ୍ର ସମିତିକୁ ଚିଠି ଲେଖିଛନ୍ତି ସୋନିଆ ଗାନ୍ଧି ।
କ୍ଷମତାର ଯୁଦ୍ଧରେ କେଉଁଠି ନିର୍ବାଚନୀ ହିଂସା ଘଟୁଛି, ତ ଆଉ କେଉଁଠି ସାଥୀ ଖୋଜା ଚାଲିଛି । ଆଉ ଏହି ତମାମ୍ ସମୀକରଣ ରୂପରେଖ କ’ଣ ହେବ ତାହା ଆଗାମୀ ୨୩ ତାରିଖରେ ସ୍ପଷ୍ଟ ହୋଇଯିବ ଯେତେବେଳେ ୨୦୧୯ ନିର୍ବାଚନର ରେଜଲ୍ଟ ସାମ୍ନାକୁ ଆସିବ ।