ଜଗନ୍ନାଥଙ୍କ ନାଁ ନେଇ କର୍ମୀଙ୍କୁ ଉସକାଇଲେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା! କହିଲେ, ରଥଯାତ୍ରା ପୂର୍ବରୁ ଘରେ ଘରେ ପହଞ୍ଚ
କନକ ବ୍ୟୁରୋ : ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ଗସ୍ତ ଉପରେ ଆଜି ଲାଗିରହିଥିଲା ସାରା ଓଡିଶାର ନଜର । କାରଣ ଆଗାମୀ ସାଧାରଣ ନିର୍ବାଚନରେ ଦଳୀୟ ନେତା ଓ କର୍ମୀଙ୍କୁ ୧୨୦ ପ୍ଲସ ସିଟର ଟାର୍ଗେଟ ଦେଇଥିଲେ ଶାହା । ଆଉ ଏହି ଲକ୍ଷ୍ୟ ପୂରଣ ପାଇଁ କର୍ମୀଙ୍କୁ କି ମନ୍ତ୍ର ଦେବେ ଶାହା ତାକୁ ନେଇ ଅନେକ ଆକଳନ ହେଉଥିଲା । ହେଲେ ସବୁଠାରୁ ସମ୍ବେଦନଶୀଳ ପ୍ରସଙ୍ଗରେ ନେତା ଓ କର୍ମୀଙ୍କୁ ଉସୁକାଇଛନ୍ତି ବିଜେପିର ଏହି ଟପ ଷ୍ଟ୍ରାଟେଜି ମେକର । ଜଗନ୍ନାଥଙ୍କୁ ନେଇ ନେତା ଓ କର୍ମୀଙ୍କୁ ଦେଇଛନ୍ତି ନୂଆ ରଣନୀତି । କହିଛନ୍ତି ରତ୍ନଭଣ୍ଡାର ଚାବିକୁ ଯେଉଁ ସରକାର ସୁରକ୍ଷା ଦେଇପାରିଲେନି, ସେହି ସରକାର ଓଡିଶାବାସୀଙ୍କୁ କି ସୁରକ୍ଷା ଦେବେ । ଏହି ବାର୍ତା ଓଡିଶାରେ ଘରେ ଘରେ ପହଂଚାଅ । ଅର୍ଥାତ ମୋଦି ସରକାରଙ୍କ ସଫଳତା ସହ ନୀବନ ସରକାରଙ୍କ ବିଫଳତାକୁ ନେଇ ଲୋକଙ୍କ ପାଖକୁ ଯିବାକୁ ଶାହା ଆହ୍ୱାନ ଦେଇଛନ୍ତି । ଆଉ ମାତ୍ର ୧୫ ଦିନର କଣ୍ଟ ଦେଇ ରଥଯାତ୍ରା ଭିତରେ ସମସ୍ତଙ୍କ ଘରେ ପହଞ୍ଚିବାକୁ ବିଜେପି କର୍ମୀଙ୍କୁ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଓଡିଶା ନେତାଙ୍କୁ ୨୦୧୯ ନିର୍ବାଚନରେ ୧୨୦ ପ୍ଲସ ସିଟର ଟାର୍ଗେଟ ଦେବାପରେ ବିଜେପିର ସର୍ବୋଚ୍ଚ ନୀତି ନିର୍ଦ୍ଧାରକ ଅମିତ ଶାହା ତୃତୀୟଥର ଲାଗି ଓଡିଶାରେ ପହଞ୍ଚିଛନ୍ତି । ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଏକ ସ୍ୱତନ୍ତ୍ର ଚାଟାର୍ଡ ଫ୍ଲାଇଟରେ ଭୁବନେଶ୍ୱର ବିମାନବନ୍ଦରରେ ପହଂଚିବା ପରେ ସିଧା ପହଞ୍ଚିଥିଲେ ଦଳୀୟ କାର୍ଯ୍ୟାଳୟରେ । ଯେଉଁଠାରେ ପୁରୀ, କଟକ ଓ ଭୁବନେଶ୍ୱର ତିନି ସଂସଦୀୟ କ୍ଷେତ୍ର ଅନ୍ତର୍ଗତ ୨୧ଟି ବିଧାନସଭା ନିର୍ବାଚନ ମଣ୍ଡଳୀର ନେତାଙ୍କ ସହ ରୁଦ୍ଧଦ୍ୱାର ବୈଠକ କରିଛନ୍ତି । ବିଜେପିର ଏହି ଟପ ଷ୍ଟ୍ରାଟେଜି ମେକରଙ୍କ କାର୍ଯ୍ୟକ୍ରମକୁ ୫ଟି ଭାଗରେ ବିଭକ୍ତ କରାଯାଇଥିଲା ।
– ପ୍ରଥମେ ୩ ଲୋକସଭା ଓ ଏହା ଅଧିନରେ ଥିବା ୨୧ ବିଧାନସଭା କ୍ଷେତ୍ରର ପ୍ରଭାରୀଙ୍କ ସହ ଆଲୋଚନା
– ଏହାପରେ ଦଳର ବିସ୍ତାରଙ୍କ ସହ ଚର୍ଚ୍ଚା ଓ ସଂଗଠନକୁ ମଜଭୁତ କରିବା ପାଇଁ ରଣନୀତି
– ଭୁବନେଶ୍ୱର ପ୍ରଦର୍ଶନୀ ପଡିଆରେ ଶକ୍ତିକେନ୍ଦ୍ର ମୁଖ୍ୟ ଓ ଉପମୁଖ୍ୟଙ୍କ ସହ ଚର୍ଚ୍ଚା
– ନେତା ଓ କର୍ମୀଙ୍କ ସହ ସାମାଜିକ ଗଣମାଧ୍ୟମ ସମ୍ମିଳନୀ
– ଏବଂ ଶେଷରେ ଓଡିଶାର ଲୋକସଭା ଟୋଲି ସହ ବିଶେଷ ଆଲୋଚନା
ବିଜେପି ସୂତ୍ରରୁ ମିଳିଥିବା ସୂଚନା ଅନୁସାରେ ଓଡିଶାର ପ୍ରତି ଘରେଘରେ ପରିବର୍ତନର ମଞ୍ଜି ବୁଣିବାକୁ ଆହ୍ୱାନ ଦେଇଛନ୍ତି ବିଜେପି ରାଷ୍ଟ୍ରିୟ ଅଧ୍ୟକ୍ଷ । ରଥଯାତ୍ରା ପୂର୍ବରୁ ଅର୍ଥାତ ମାତ୍ର ୧୫ ଦିନ ଭିତରେ ଶକ୍ତିକେନ୍ଦ୍ର ଅଧ୍ୟକ୍ଷ, ବୁଥ କମିଟି ଅଧ୍ୟକ୍ଷ ଓ ଜିଲ୍ଲା ସଭାପତିମାନଙ୍କୁ ସଂପର୍କ ପାଇଁ ସମର୍ଥନ କାର୍ଯ୍ୟକ୍ରମରେ ପ୍ରତିଟି ଘରେ ପହଂଚି ମୋଦି ସରକାରଙ୍କ ଉପଲବ୍ଧିକୁ ପହଂଚାଇବାକୁ କଠିନ ଟାସ୍କ ଦେଇଛନ୍ତି ଅମିତ ଶାହା । ପଂଚାୟତ ନିର୍ବାଚନ ଫଳାଫଳରେ ଉତ୍ସାହିତ ବିଜେପି ନେତା ୧୨୦ ଆସନ ହାସଲର ଦମ୍ଭ ଦେଖାଇଥିବାବେଳେ ବିଜେପୁର ପରାଜୟ ପରେ ଦ୍ୱନ୍ଦ୍ୱରେ ପଡିଯାଇଛନ୍ତି । ବୋଧହୁଏ ସେଥିପାଇଁ ଲକ୍ଷ୍ୟ ହାସଲ କରିବାକୁ ସଂଗଠନ ସଜାଡିବା ନିହାତି ଆବଶ୍ୟକ ବୋଲି ଅନୁଭବ କରିଛନ୍ତି । ତ୍ରିପୁରା, ଆସାମ ଓ ମଣିପୁରର ସଫଳତା ଓଡିଶା, ପଶ୍ଚିମବଙ୍ଗ, ଆନ୍ଧ୍ର ଓ ତେଲେଙ୍ଗାନାରେ ଦୋହରାଇବାକୁ ଦେଇଛନ୍ତି ଆହ୍ୱାନ ।
କେନ୍ଦ୍ରରେ ବିଜେପି ସରକାରଙ୍କ ସଫଳତା ସହ ଓଡିଶାରେ ବିଜେଡି ସରକାରଙ୍କ ବିଫଳତାକୁ ନେଇ ଲୋକଙ୍କ ପାଖକୁ ଯିବା ଲାଗି କର୍ମୀଙ୍କୁ ଆହ୍ୱାନ ଦେଇଛନ୍ତି ଶାହା । ଗରିବଙ୍କ ଘରେ ଦୁଇ ଓଳି ଖାଇବା, ପ୍ରତ୍ୟେକ ଘରେ ବିଜୁଳି ଓ ପିଲାଙ୍କ ପାଇଁ ଶିକ୍ଷା ନିଶ୍ଚିତ ନହେବାଯାଏଁ କର୍ମୀମାନଙ୍କୁ ନଶୋଇବାକୁ କହିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ। ତେବେ ବିଜେଡ଼ି କହିଛି ନିର୍ବାଚନ ପରେ ସବୁକିଛି ଜଣା ପଡ଼ିଯିବ । ଓଡ଼ିଶାର ସଚେତନ ଭୋଟର କାହାକୁ ଗାଦିଚ୍ୟୁତ କରିବେ କାହାକୁ ଗାଦିରେ ବସାଇବେ ତାହା ବେଶ ଭଲଭାବେ ଜାଣିଛନ୍ତି ।
ପ୍ରଥମଥର ଲାଗି ଶାହାଙ୍କ ଷ୍ଟ୍ରାଟେଜିରେ ଦୁଇଟି ନୂଆ ରଣନୀତି ସାମିଲ ହୋଇଛି । ଯେତେବେଳେ ସାମାଜିକ ଗଣମାଧ୍ୟମ ଜରିଆରେ ଲୋକଙ୍କ ସହ ଅଧିକରୁ ଅଧିକ ସଂପର୍କ ସ୍ଥାପନ ପାଇଁ କୁହାଯାଇଛି । ଏଥିସହ ତ୍ରିପୁରା, ଅରୁଣାଚଳ ପ୍ରଦେଶ, ମିଜୋରାମ ଓ ନାଗାଲାଣ୍ଡ ପରେ ଓଡିଶାରେ ଲୋକସଭା ଟୋଲି ବୈଠକ କରିଛନ୍ତି ଅମିତ ଶାହା । ଏସବୁ ରଣନୀତି ମିଶନ ୧୨୦ ପ୍ଲସ ହାସଲରେ କେତେଦୂର ସମର୍ଥ ହେଉଛି ତା ଉପରେ ନଜର ରହିବ । ବିଶେଷ କରି ନେତା ଦେଇଥିବା ମନ୍ତ୍ର, କର୍ମୀମାନେ କିଭଳି କାର୍ଯ୍ୟକାରୀ କରିବେ ତାହା ଦେଖିବାର କଥା ।