ହିଂସା ଛାଡ଼, ଦେଶର ଭବିଷ୍ୟତ ଗଢ଼ । ଇରାନକୁ ଆମେରିକା ରାଷ୍ଟ୍ରପତିଙ୍କ ଆହ୍ୱାନ । କହିଲେ, ଆମେରିକା ଯୁଦ୍ଧ ନୁହେଁ ଶାନ୍ତି ଚାହେଁ ।
କନକ ବ୍ୟୁରୋ: ଇରାକ ଓ ଆମେରିକା ମଧ୍ୟରେ ବଢୁଥିବା ଉତେଜନା ଭିତରେ ନରମ ପଡିଛନ୍ତି ଆମେରିକା ରାଷ୍ଟ୍ରପତି । ଡୋନାଲ୍ଡ ଟ୍ରମ୍ପ କହିଛନ୍ତି ଆମେରିକା ଶାନ୍ତି ଚାହେଁ ଏହାସହ ଆତଙ୍କବାଦ ଦମନ ପାଇଁ ଇରାନ କାର୍ଯ୍ୟ କରିବାକୁ ସେ ଆହ୍ୱାନ ଦେଇଛନ୍ତି । ଇରାନ ନେତାଙ୍କୁ ସମ୍ବୋଧିତ କରି ଟ୍ରମ୍ପ କହିଛନ୍ତି ଯେ ଇରାନବାସୀଙ୍କ ପାଇଁ ଏକ ଉଜ୍ୱଳ ଭବିଶ୍ୟତ ଅପେକ୍ଷା କରିଛି ।
Kanak News is now on WhatsApp
Join and get latest news updates delivered to you via WhatsApp
ଇରାକରେ ଥିବା ଆମେରିକାର ସାମରିକ ଘାଟି ଉପରେ ଇରାନ୍ ମିଜାଇଲ୍ ମାଡ଼ କରି ୮୦ଜଣ ସୈନ୍ୟଙ୍କୁ ମାରି ଦେଇଥିବା ଦାବିକୁ ଅସ୍ୱୀକାର କରିଛନ୍ତି ଆମେରିକାର ରାଷ୍ଟ୍ରପତି । ଦେଶବାସୀଙ୍କୁ ସମ୍ବୋଧନ କରି ଟ୍ରମ୍ପ କହିଛନ୍ତି ଇରାନ୍ର କ୍ଷେପଣାସ୍ତ୍ର ମାଡ଼ରେ ସାମରିକ ଘାଟିର ଅଳ୍ପ ବହୁତ କ୍ଷତି ଘଟିଛି । କିନ୍ତୁ କୌଣସି ସୈନିକଙ୍କ ମୃତ୍ୟୁ ହୋଇନାହିଁ ।
ଆମେରିକା ରାଷ୍ଟ୍ରପତିଙ୍କ ବୟାନ ଆସିବାର କିଛି ସମୟ ପରେ ବାଗଦାଦର ସବୁଠାରୁ ସୁରକ୍ଷିତ ଗ୍ରୀନଜୋନରେ ଆମେରିକୀୟ ଦୂତାବାସ ନିକଟରେ ପୁଣି ରକେଟ ଆକ୍ରମଣ ହୋଇଛି । ଇରାନୀ ସେନା ଏଭଳି ଆକ୍ରମଣ କରିଥିବା ସ୍ପଷ୍ଟ କରିଛି ।
ଗୋଟିଏ ପଟେ ଆମେରିକା ଶାନ୍ତି ଚାହୁଁଥିବା କଥା ରାଷ୍ଟ୍ରପତି କହିଛନ୍ତି । ଅପରପକ୍ଷରେ ଇରାନ୍ ଏକ ଆତଙ୍କବାଦର ପ୍ରାୟୋଜକ ରାଷ୍ଟ୍ର ଏବଂ ଏହି ରାଷ୍ଟ୍ର ସାରା ବିଶ୍ୱରେ ଆତଙ୍କବାଦକୁ ପ୍ରେତ୍ସାହିତ କରୁଛି ବୋଲି କହିଛନ୍ତି ଟ୍ରମ୍ପ । ଇରାନ୍ ଉପରେ ଆର୍ଥିକ କଟକଣାକୁ ଆହୁରି କଠୋର କରାଯିବ ବୋଲି ସେ ଚେତାବନୀ ମଧ୍ୟ ଦେଇଛନ୍ତି । କୌଣସି ପରିସ୍ଥିତିରେ ଇରାନକୁ ପରମାଣୁ ଶକ୍ତିି ସମ୍ପନ୍ନ ରାଷ୍ଟ୍ର କରାଇ ଦିଆଯିବ ନାହିଁ ବୋଲି ଦୋହରାଇଛନ୍ତି ଟ୍ରମ୍ପ ।
ଆମେରିକା ରାଷ୍ଟ୍ରପତି ଆହୁରୀ ମଧ୍ୟ ସ୍ପଷ୍ଟ କରିଛନ୍ତି ଯେ, ମଧ୍ୟପ୍ରାଚ୍ୟର ତେଲ ଆମେରିକାର ଆବଶ୍ୟକ ନାହିଁ, ତୈଳ କ୍ଷେତ୍ରରେ ଆମେରିକା ଏକ ଆତ୍ମନିର୍ଭରଶୀଳ ରାଷ୍ଟ୍ର । ଆମେରିକା ଓ ଇରାନ ମଧ୍ୟରେ ବଢୁଥିବା ଉତେଜନା ଭିତରେ ଟ୍ରମ୍ପଙ୍କ ବୟାନ ଯୁଦ୍ଧ ଆଶଙ୍କାକୁ ଟାଳି ଦେଇଛି । ଅପରପକ୍ଷରେ ଟ୍ରମ୍ପଙ୍କ ବୟାନର କିଛି ସମୟ ପରେ ପୁଣି ଆକ୍ରମଣ କରିଛି ଇରାନ ।