ପୁଲୱାମା ଆକ୍ରମଣକୁ ଆମେରିକାର କଡାନିନ୍ଦା ! ସହିଦ୍ ଙ୍କ ପରିବାରକୁ ସମ୍ବେଦନା ଜଣାଇବା ସହ ଏଭଳି ମୁହୂର୍ତ୍ତରେ ଭାରତ ସପକ୍ଷରେ ଥିବା କଥା କହିଲା ଆମେରିକା ।
ଜମ୍ମୁ-କାଶ୍ମୀରର ପୁଲୱାମାରେ ସିଆରପିଏଫ୍ ଯବାନଙ୍କ ଉପରେ ହୋଇଥିବା ଆକ୍ରମଣକୁ ଶୁକ୍ରବାର ଆମେରିକା ନିନ୍ଦା କରିଛି ଏବଂ ସବୁ ଦେଶରୁ ଆତଙ୍କବାଦୀଙ୍କୁ ସୁରକ୍ଷା ଦେବା ତଥା ସମର୍ଥନ ନଦେବା ପାଇଁ ଅପିଲ୍ କରିଛି । ଏହି ଆକ୍ରମଣ ପାକିସ୍ଥାନ ସ୍ଥିତ ଆତଙ୍କୀ ସଂଗଠନ ଜେସ୍ –ଏ-ମହମ୍ମଦ ତରଫରୁ ହୋଇଛି ଯେଉଁଥିରେ ୩୭ ରୁ ଅଧିକ ଯବାନ ସହିଦ୍ ହୋଇଯାଇଛନ୍ତି । ସଂଗଠନର ଆତ୍ମଘାତୀ ଆତତାୟୀ ପୁଲୱାମାରେ ସିଆରପିଏଫ୍ ଯବାନଙ୍କ ଏକ ବସରେ ବିସ୍ଫୋଟକପୂର୍ଣ୍ଣ ବାହନ ନେଇ ପିଟିଥିଲେ ଯାହାଦ୍ୱାରା ଯବାନଙ୍କ ଶରୀର ଛୋଟ ଛୋଟ ଟୁକୁଡା ହୋଇ ରାସ୍ତା ସାରା ବିଛେଇ ହୋଇପଡିଲା । ଆକ୍ରମଣକୁ ଆମେରିକାର ବୈଦେଶିକ ମନ୍ତ୍ରାଳୟ ନିନ୍ଦା କରିଥିବା ବେଳେ ଏକ ବୟାନ୍ ଜାରୀ କରିଛି । ଯେଉଁଥିରେ କୁହାଯାଇଛି ଯେ ଆତଙ୍କବାଦର ମୁକାବିଲା ପାଇଁ ଭାରତ ସରକାର ସାଙ୍ଗରେ ଆମେରିକା ସବୁବେଳେ ରହିଛି । ସହିଦ୍ ଯବାନଙ୍କ ପରିଜନଙ୍କ ପ୍ରତି ସମ୍ବେଦନା ବ୍ୟକ୍ତ କରି ଆମେରିକା ବିଦେଶ ମନ୍ତ୍ରାଳୟର ଉପ ପ୍ରବକ୍ତା ରବର୍ଟ ପେଲାଡିନୋ କହିଛନ୍ତି ଯେ ଜମ୍ମୁ-କାଶ୍ମୀରରେ ସିଆରପିଏଫ୍ ଯବାନଙ୍କ ଉପରେ ହୋଇଥିବା ଆକ୍ରମଣକୁ ଆମେରିକା ନିନ୍ଦା କରୁଛି ।
Kanak News is now on WhatsApp
Join and get latest news updates delivered to you via WhatsApp
ସୁରକ୍ଷା ମାମଲାରେ କ୍ୟାବିନେଟ୍ କମିଟିର ବୈଠକରେ ଆଜି ଗୃହମନ୍ତ୍ରୀ ରାଜନାଥ ସିଂହଙ୍କ ସହ ସିଆରପିଏଫ୍ ଡିିଜିଙ୍କ କଥାବାର୍ତ୍ତା ହେବ ଯେଉଁଥିରେ ସେ ଘଟଣାକ୍ରମ ଆଲୋଚନା କରିବେ । ବୈଠକ ଶେଷ ହେବା ପରେ ୧୨ ଟା ସମୟରେ ଗୃହମନ୍ତ୍ରୀ ଏବଂ ଡିଜି ଶ୍ରୀନଗର ଗସ୍ତ ପାଇଁ ବାହାରିବେ । ସେଠାରେ ସିଆରପିଏଫ୍ ର ସମସ୍ତ ସହିଦ୍ ଯବାନଙ୍କୁ ଶ୍ରଦ୍ଧାଞ୍ଜଳୀ ଅର୍ପଣ କରାଯିବା ସହ ଏକ ବିଶେଷ ବିମାନରେ ଗାଜିୟାବାଦ୍ ହିଣ୍ଡନ୍ ଏୟାରବସ୍ କୁ ନିଆଯିବ । ଏଠାରୁ ସହିଦଙ୍କ ଶବ ତାଙ୍କ ଅଚଂଳକୁ ଯିବ । ଉତ୍ତରପ୍ରଦେଶରୁ ୧୦ ରୁ ୧୨ ଜଣ ଯବାନ ଏବଂ ପଞ୍ଜାବରୁ ୪ ରୁ ୫ ଜଣ ଯବାନ ଥିବାବେଳେ ଅନ୍ୟ ରାଜ୍ୟରୁ ଜଣେ ଦୁଇଜଣ ଯବାନ ରହିଛନ୍ତି ।
