ଭାରତ ମାଟିରେ ଆକ୍ରମଣ ପାଇଁ ପାକିସ୍ତାନରେ ରଚା ଯାଇଥିଲା ବ୍ଲୁ ପ୍ରିଣ୍ଟ : ପୁଲିସ କହିଲା ,ଅନନ୍ତନାଗ ଆତଙ୍କବାଦୀ ହମଲା ପଛର ମାଷ୍ଟର ମାଇଣ୍ଡ
କନକ ବ୍ୟୁରୋ : ଅମରନାଥ ଯାତ୍ରୀଙ୍କୁ ଆକ୍ରମଣ ପଛରେ ଲସ୍କର ଆତଙ୍କବାଦୀଙ୍କ ହାତ । ପାକିସ୍ତାନ ମାଟିରେ ବସି ଲକ୍ସର କମାଣ୍ଡର ଅବୁ ଇସମାଇଲ ରଚିଥିଲା ଏହି ଜଘନ୍ୟ ହତ୍ୟାକାଣ୍ଡର ବ୍ଲୁପ୍ରିଂଟ । ଯେଉଁଥିରେ ୭ଜଣ ନିରୀହ ତୀର୍ଥଯାତ୍ରୀଙ୍କ ମୃତ୍ୟୁ ହେବାସହ ୨୦ ଜଣ ଗୁରୁତର ଆହତ ହୋଇଛନ୍ତି । ଘଟଣା ପରେ ପୂରା ଅଂଚଳକୁ ପୂରା କରି ଛାନଭିନ୍ କରୁଛନ୍ତି ସୁରକ୍ଷାକର୍ମୀ । ସେପଟେ ଏହି ବର୍ବରୋଚିତ ଆକ୍ରମଣର ଉଚିତ ଜବାବ ଦେବାକୁ କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହଙ୍କ ବାସଭବନରେ ଗୁରୁତ୍ୱପୂର୍ଣ୍ଣ ବୈଠକ ହୋଇଛି । କୌଣସି ପରିସ୍ଥିତିରେ ବି ଅମରନାଥ ଯାତ୍ରା ବନ୍ଦ ହେବନାହିଁ ବୋଲି କୁହାଯାଇଛି । ଆଜି ପୁଣି ୩ ହଜାର ତୀର୍ଥଯାତ୍ରୀଙ୍କୁ ଧରି ଅମରନାଥ ଯାତ୍ରା କରିଛି ବସ୍ ।
Kanak News is now on WhatsApp
Join and get latest news updates delivered to you via WhatsApp
ସାରା ଦେଶକୁ ଦୋହଲାଇ ଦେଇଥିବା ଏହି ବର୍ବରୋଚିତ ଆକ୍ରମଣ ପଛରେ ପାକିସ୍ତାନ ମାଟିରୁ ଅପରେଟ କରୁଥିବା ଆତଙ୍କବାଦୀ ସଂଗଠନ ଲସ୍କର-ଇ-ତୋଇବାର ରହିଛି ହାତ । ଲସ୍କର କମାଣ୍ଡର ବସିର ଲସ୍କରି ହତ୍ୟାର ପ୍ରତିଶୋଧ ନେବାକୁ ଏଭଳି ନିରୀହ ଲୋକଙ୍କୁ ଟାର୍ଗେଟ କରିଛି ଆତଙ୍କି ସଂଗଠନ । ଅମରନାଥ ଯାତ୍ରା ସାରି ଫେରୁଥିବା ଏକ ତୀର୍ଥଯାତ୍ରୀ ବସ୍ ଉପରେ ଅନ୍ଧାଧୁନ ଗୁଳିମାଡ କରିଛନ୍ତି ଆତଙ୍କବାଦୀ । ସୋମବାର ରାତି ପ୍ରାୟ ସାଢେ ୮ଟା ପରେ ବସଟିକୁ ତିନିପଟୁ ଘେରିଯାଇ ଗୁଳିବର୍ଷା କରିଥିଲେ ଆତଙ୍କବାଦୀ । ଯେଉଁଥିରେ ୭ଜଣ ତୀର୍ଥଯାତ୍ରୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିବାବେଳେ ୨୦ରୁ ଅଧିକ ଗୁରୁତର ଆହତ ହୋଇଛନ୍ତି ।
ଅମରନାଥ ଯାତ୍ରୀଙ୍କୁ ଆକ୍ରମଣର ମାଷ୍ଟରମାଇଣ୍ଡ ଆତଙ୍କବାଦୀ ସଂଗଠନ ଲସ୍କର-ଇ-ତୋଇବାର ଟପ୍ କମାଣ୍ଡର ଅବୁ ଇସମାଇଲ । ପାକ୍ ଅଧିକୃତ କାଶ୍ମୀର-ପିଓକେରେ ରହି ଏହି ହତ୍ୟାକାଣ୍ଡର ନୀଳନକ୍ସା ଆଙ୍କିଥିଲା ଇସମାଇଲ । ୨୦୦ରୁ ଅଧିକ ଆତଙ୍କବାଦୀଙ୍କୁ ଭାରତରେ ଆକ୍ରମଣ ପାଇଁ ପ୍ରଶିକ୍ଷଣ ଦେଉଛି ଏହି ଟପ୍ ଲସ୍କର କମାଣ୍ଡର । ଗୁଇନ୍ଦା ସୂଚନା ଅନୁସାରେ, ଜାମ୍ମୁ-କାଶ୍ମୀରରେ ଅପରେଟ୍ କରୁଥିବା ହିଜବୁଲ ମୁଜାହିଦିନ ଆତଙ୍କବାଦୀ ସଂଗଠନ ଏହି ଆକ୍ରମଣକୁ ସଫଳ କରିବାକୁ ଯୋଗାଇ ଦେଇଥିଲା ଆନୁସଙ୍ଗିକ ସହାୟତା ।
ସୋମବାର ଆକ୍ରମଣ ପଛରେ ୫ରୁ ୬ ଜଣ ଆତଙ୍କବାଦୀ ରହିଥିବା ଅନୁମାନ କରାଯାଉଛି । ଆତଙ୍କବାଦୀମାନେ କିଛି ତୀର୍ଥଯାତ୍ରୀଙ୍କୁ ପଣବନ୍ଦୀ କରିବାକୁ ଯୋଜନା କରିଥିବା ମଧ୍ୟ ପ୍ରାଥମିକ ତଦନ୍ତରୁ ସୁରାକ ମିଳିଛି । ପୂରା ଅଂଚଳକୁ ସୁରକ୍ଷା ବଳୟ ମଧ୍ୟରେ ରଖି ତନ୍ନତନ୍ନ କରି ଯାଂଚ କରୁଛନ୍ତି ସୁରକ୍ଷାକର୍ମୀ । କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂଙ୍କ ବାସଭବନରେ ଟପ୍ ଅଫିସିଆଲଙ୍କ ଗୁରୁତ୍ୱପୂର୍ଣ୍ଣ ବୈଠକ ହୋଇଛି । ଆତଙ୍କବାଦୀଙ୍କୁ ଉଚିତ ଜବାବ ଦେବାପାଇଁ ନୂଆ ରଣନୀତି ପ୍ରସ୍ତୁତ ହୋଇଥିବା ଅନୁମାନ କରାଯାଉଛି ।
ଆତଙ୍କବାଦୀଙ୍କ ଏହି ହୀନ ଉଦ୍ୟମ ଅମରନାଥ ଯାତ୍ରାକୁ ପ୍ରଭାବିତ କରିପାରିବ ନାହିଁ ବୋଲି କୁହାଯାଇଛି । ମଙ୍ଗଳବାର ପୁଣି ୩ହଜାର ତୀର୍ଥଯାତ୍ରୀଙ୍କୁ ନେଇ ବସ ଅମରନାଥ ଯାତ୍ରା କରିଛି । ଅନ୍ୟ ପକ୍ଷରେ ସୋମବାର ଆକ୍ରମଣର ଶିକାର ହୋଇଥିବା ବସଟି ଅମରନାଥ ବୋର୍ଡ ସହ ପଂଜିକରଣ ହୋଇନଥିବା ଜଣାପଡିଛି । ସେଥିପାଇଁ ଏହା ସୁରକ୍ଷା ବଳୟ ମଧ୍ୟରେ ନଥିଲା ଓ ଆତଙ୍କବାଦୀମାନେ ଏହାକୁ ଟାର୍ଗେଟ କଲେ ବୋଲି ସୂଚନା ମିଳିିଛିି ।