ସିବିଆଇ ମୁଖିଆ ପଦରୁ ହଟିବା ପରେ ଆଲୋକବର୍ମାଙ୍କ ପ୍ରତିକ୍ରିୟା: କହିଲେ, ନିଷତ୍ତି ଦୁଃଖଦାୟକ, ମିଥ୍ୟା ଅଭିଯୋଗରେ କରାଗଲା ବିଦା
ଆଜି ସୁପ୍ରିମକୋର୍ଟରେ ରାକେଶ ଆସ୍ଥାନା ମାମଲାରେ ଶୁଣାଣି
କନକ ବ୍ୟୁରୋ: ନାଟକୀୟ ଭାବେ ସିବିଆଇ ନିର୍ଦ୍ଦେଶକ ପଦରୁ ଆଲୋକ ବର୍ମାଙ୍କୁ ହଟାଯିବା ପରେ ସେ ମୁହଁ ଖୋଲିଛନ୍ତି । ଏହି ଘଟଣାକୁ ଦୁଃଖଦାୟକ କହିବା ସହ ତାଙ୍କୁ ଶତ୍ରୁ ଭାବେ ଦେଖୁଥିବା ଜଣେ ବ୍ୟକ୍ତିଙ୍କ ମିଥ୍ୟା, ନିରାଧାର ଓ ତୁଛ ଅଭିଯୋଗ ଆଧାରରେ ତାଙ୍କୁ ପଦରୁ ହଟାଇ ଅନ୍ୟତ୍ର ନିଯୁକ୍ତି ଦିଆ ଯାଇଛି ବୋଲି ସେ କହିଛନ୍ତିି । ତେବେ ସେ ତାଙ୍କ କାର୍ଯ୍ୟକାଳରେ ସିବିଆଇର ସ୍ୱତନ୍ତ୍ରତା ବଜାୟ ରଖିବାକୁ ବାରମ୍ବାର ଚେଷ୍ଟା କରିଥିବା ପ୍ରକାଶ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୁପ୍ରିମକୋର୍ଟଙ୍କ ରାୟ ପରେ ପୁଣି ସିବିଆଇ ନିର୍ଦ୍ଦେଶକ ଭାବେ ଦାୟିତ୍ୱ ନେବାର ମାତ୍ର ୩୦ଘଂଟା ଭିତରେ ଆଲୋକ ବର୍ମାଙ୍କୁ ପଦରୁ ହଟାଇ ଅଗ୍ନିଶମ ବିଭାଗର ଡିଜି ଭାବେ ସ୍ଥାପିତ କରାଯାଇଛି । ମାତ୍ର ଦୁଇ ଦିନ ପୂର୍ବରୁ ଆଲୋକ ବର୍ମାଙ୍କୁ ସିବିଆଇ ନିର୍ଦ୍ଦେଶକ ଭାବେ ପୁନଃ ଅବସ୍ଥାପିତ କରିଥିଲେ ସୁପ୍ରିମକୋର୍ଟ, ହେଲେ ଗତକାଲି ପଦରୁ ତାଙ୍କୁ ବିଦା କରାଯାଇଛି । ଆଲୋକ ବର୍ମାଙ୍କୁ ଏବେ ଅଗ୍ନିଶମ ଡିଜି ଭାବେ ଦାୟିତ୍ୱ ଦିଆଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଗଠିତ ଉଚ୍ଚ-କ୍ଷମତା ସଂପନ୍ନ ସିଲେକ୍ଟ କମିଟି ଆଲୋକ ବର୍ମାଙ୍କୁ ସିବିଆଇ ନିର୍ଦ୍ଦେଶକ ପଦରୁ ବିଦା କରିଦେଇଛି ।
ତିନି ଜଣିଆ ସିଲେକ୍ଟ କମିଟିରେ, ଆଲୋକ ବର୍ମାଙ୍କ ପଦରୁ ହଟାଇବା ପାଇଁ ୨ଜଣଙ୍କ ମତ ଆଧାରରେ ପଦରୁ ହଟା ଯାଇଛି । ଏଥିରେ ୨-୧ ରେ ଆଲୋକ ବର୍ମାଙ୍କୁ ପଦରୁ ହଟାଇବା ଲାଗି ନିଷ୍ପତି ନିଆଯାଇଥିଲା । ସିଭିସି ରିପୋର୍ଟ ଆଧାରରେ ଏହି ନିଷ୍ପତି ନିଆଯାଇଥିବା କୁହାଯାଇଛି । ଆଲୋକ ବର୍ମାଙ୍କୁ ହଟାଇବା ନିଷ୍ପତିକୁ ସିଲେକ୍ଟ କମିଟି ବୈଠକରେ ବିରୋଧ କରିଥିଲେ ମଲିକାର୍ଜୁନ ଖଡଗେ । କଂଗ୍ରେସ ଏପରି ନିଷ୍ପତିକୁ କଡ଼ା ସମାଲୋଚନା କରିଛି । ପିଏମଓ ନିର୍ଦ୍ଦେଶରେ ସିଭିସି କାର୍ଯ୍ୟ କରୁଛି ବୋଲି ଦଳ ଅଭିଯୋଗ କରିଛି ।