ଭିଡିଓ ଜାରି କରି ସଫେଇ ରଖିଲେ ପିଏନବି ସ୍କାମର ଅନ୍ୟତମ ଅଭିଯୁକ୍ତ ମେହୁଲ ଚୋକସି : କହିଲେ, ସମସ୍ତ ଅଭିଯୋଗ ମିଥ୍ୟା,ବେଆଇନ ଭାବେ ଇଡି ଜବତ କରିଛି ସମ୍ପତି
କନକ ବ୍ୟୁରୋ : ପ୍ରଥମ ଥର ପାଇଁ ମୁହଁ ଖୋଲିଲେ ପଂଜାବ ନ୍ୟାସନାଲ ବ୍ୟାଙ୍କ ଦୁର୍ନୀତିର ଅନ୍ୟତମ ଅଭିଯୁକ୍ତ ମେହୁଲ ଚୋକସି । ଏକ ଭିଡିଓ ଜାରି କରି ନିଜ ଉପରେ ଲାଗିଥିବା ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି ମେହୁଲ । ଏହାସହ ବେଆଇନ ଭାବେ ଇଡି ତାଙ୍କର ସମସ୍ତ ସମ୍ପତି ଜବତ କରିଥିବା ସେ ଅଭିଯୋଗ କରିଛନ୍ତି । ଆତ୍ମସମର୍ପଣ କରି ଭାରତ ଫେରିବା ଖବରକୁ ମଧ୍ୟ ଚୋକସି ଖଣ୍ଡନ କରିଛନ୍ତି । ତାଙ୍କ ଉପରେ ଲାଗିଥିବା ସମସ୍ତ ଅଭିଯୋଗ ମିଥ୍ୟା ଏବଂ ଭିତ୍ତିହୀନ ବୋଲି ମେହୁଲ ଚୋକସି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମୁମ୍ବାଇ ପଂଜାବ ନ୍ୟାସନାଲ ବ୍ୟାଙ୍କର ଏକ ବ୍ରାଂଚରୁ ୧୧ହଜାର ୨୩୬କୋଟି ଟଙ୍କାର ଠକେଇ ମାମଲାର ମୁଖ୍ୟ ଅଭିଯୁକ୍ତ ହେଉଛନ୍ତି ନୀରବ ମୋଦି ଓ ତାଙ୍କ ମାମୁଁ ମେହୁୂଲ ଚୋକସି । ଏହି ମାମଲା ପଦାରେ ପଡିବା ପରେ ଉଭୟ ପଳାତକ ସାଜିଛନ୍ତି । ନୀରବ ମୋଦିଙ୍କ ନାଁରେ ପୂର୍ବରୁ ଇଂଟରପୋଲ ରେଡ କର୍ଣ୍ଣର ନୋଟିସ ଜାରି କରିଛି । ଏବେ ମେହୁଲ ଚୋକସିଙ୍କ ନାଁରେ ରେଡ କର୍ଣ୍ଣର ନୋଟିସ ଜାରି କରିବା ପାଇଁ ପ୍ରକ୍ରିୟା ଚାଲିଛି ।
ଆଂଟିଗୁଆ ସରକାରଙ୍କ ପକ୍ଷରୁ ମେହୁଲ ଚୋକସିଙ୍କୁ ନାଗରିକତ୍ୱ ପ୍ରଦାନ କରାଯାଇଛି । ତାଙ୍କୁ ସେଠାରେ ଗିରଫ କରାଯାଇ ଭାରତ ଆଣିବାକୁ ଆଂଟିଗୁଆ ସରକାରଙ୍କୁ ନିବେଦନ କରିଛନ୍ତି ଭାରତ ସରକାର । ଅପରପକ୍ଷରେ ଏହି ପ୍ରସଙ୍ଗରେ କେନ୍ଦ୍ର ସରକାରଙ୍କୁ ଘେରିଛି କଂଗ୍ରେସ । ନୀରବ ମୋଦି ଓ ମେହୁଲ ଚୋକସିଙ୍କୁ ଦେଶରୁ ପଳାୟନ କରିବାରେ ମୋଦି ସରକାର ସହଯୋଗ କରିଛନ୍ତି ବୋଲି କହିଛନ୍ତି କଂଗ୍ରେସ ମୁଖପାତ୍ର ରଣଦୀପ ସୁର୍ଜେୱାଲା ।
ପିଏନବି ସ୍କାମରେ ନୀରବ ମୋଦି ଓ ମେହୁଲ ଚୋକସିଙ୍କ ସତ ସାମ୍ନାକୁ ଆସିବା ପରେ ଦୁହେଁ ଦେଶରୁ ଫେରାର ଅଛନ୍ତି । ମେହୁଲ ଚୋକସିଙ୍କୁ ହାଜର ହେବା ପାଇଁ ବାରମ୍ବାର ଭାରତୀୟ ଯାଂଚ ଏଜେନ୍ସି ଦ୍ୱାରା ନୋଟିସ ପଠାଯାଇଥିଲେ ସୁଦ୍ଧା ସେ ହାଜର ହୋଇନାହାନ୍ତି ।