ଓଏଏସ୍ ପରୀକ୍ଷାର୍ଥୀଙ୍କ ଭାଗ୍ୟକୁ ନେଇ ସାଂଘାତିକ ଖେଳ । ନମ୍ବର କମାଇ ଦେବାରୁ ଅଯୋଗ୍ୟ ବିବେଚିତ ହେଲେ ଭଦ୍ରକର ପରୀକ୍ଷାର୍ଥୀ, ମୂଲ୍ୟାଙ୍କନରେ ମୁଖ୍ୟ ପରୀକ୍ଷକଙ୍କ ହସ୍ତକ୍ଷେପ ନେଇ ଆସିଲା ସାଂଘାତିକ୍ ଅଭିଯୋଗ
କନକ ବ୍ୟୁରୋ : ଓଏଏସ୍ ପାଇବାକୁ ଥିବା ପରୀକ୍ଷାର୍ଥୀଙ୍କ ଭାଗ୍ୟ ସହ ଖେଳ । ପ୍ରଥମେ ୧୧୭ ନମ୍ବର ପାଇଥିବା ପରୀକ୍ଷାର୍ଥୀଙ୍କ ୁ ନମ୍ବରକୁ ମୁଖ୍ୟ ପରୀକ୍ଷକ ୫୦କୁ କମାଇଦେଲେ । କିଛି ପ୍ରାର୍ଥୀଙ୍କୁ ମୌଖିକ ପରୀକ୍ଷାରେ ୨୫୦ରୁ ୨୫୦ ବି ମିଳିଗଲା । ହେଲେ ଏଭଳି ଅନ୍ୟାୟର ଶିକାର ହୋଇଥିବା ଯୁବକଙ୍କୁ ମୌଖିକ ପରୀକ୍ଷାରେ ମାତ୍ର ୧୦୦ ମିଳିଲା । ଏମିତି କିଛି ପ୍ରମାଣ ଆମର ହସ୍ତଗତ ହେବା ପରେ ଓଡ଼ିଶା ପବ୍ଲିକ୍ ସର୍ଭିସ୍ କମିଶନ୍ ବା ଓଡ଼ିଶା ଲୋକସେବା ଆୟୋଗର ପରିଚାଳନା ନେଇ ବଡ଼ ଧରଣର ସନ୍ଦେହ ସୃଷ୍ଟି ହୋଇଛି । ଓଡ଼ିଶା ଲୋକସେବା ଆୟୋଗ ବା ଓପିଏସସି ସାଧାରଣ ପିଲାଙ୍କ ଜୀବନ ସହ ଖେଳ ଖେଳୁନାହିଁ ତ?
Kanak News is now on WhatsApp
Join and get latest news updates delivered to you via WhatsApp
ରଜତ କୁମାର ମିଶ୍ର । ଭଦ୍ରକ ଧାମନଗର ବ୍ଲକ୍ ଗୁରୁନଗର ଶାସନ ଗାଁର ଶିକ୍ଷିତ ଯୁବକ । ଏକ ସାଧାରଣ ପରିିବାରରୁ ଆସିଥିବା ରଜତ ୨୦୧୬ ମସିହାରେ ଓଏଏସ୍ ଲଖିତ ପରୀକ୍ଷା ଦେଇଥିଲେ । ୨୦୧୭ରେ ପରୀକ୍ଷା ଫଳ ବାହାରିଲା । ପରୀକ୍ଷାରେ ମୋଟ ୨୨୫୦ ମାର୍କରୁ ଇଂରାଜୀ ପ୍ରବନ୍ଧ ପାଇଁ ଥିଲା ୨୦୦ ମାର୍କ । ଇଂରାଜୀ ପ୍ରବନ୍ଧ ବିଷୟରେ ୨୦୦ ମାର୍କରୁ ତାଙ୍କୁ ପ୍ରଥମ ପରୀକ୍ଷକ ୧୧୭ ମାର୍କ ଦେଇଥିବା ବେଳେ, ମୁଖ୍ୟ ପରୀକ୍ଷକ ଏହାକୁ କାଟି ୫୦ କରିଦେଲେ । ଏକଥା ଜାଣିବା ପାଇଁ ତାଙ୍କୁ ୧ ବର୍ଷ ଲାଗିଗଲା । କାରଣ ପରୀକ୍ଷା ଫଳ ବାହାରିବାର ୧ ମାସ ମଧ୍ୟରେ ସେ ଖାତାର ନକଲ ବା ଫଟୋକପି ପାଇବା ପାଇଁ ଆବେଦନ କରିିଥିଲେ ସୁଦ୍ଧା ବର୍ଷକ ପରେ ତାଙ୍କୁ ମିଳିଥିଲା ତାଙ୍କର ଉତ୍ତର ଖାତା ।
ପ୍ରଶ୍ନ ଉଠୁଛି, ଜଣେ ପରୀକ୍ଷକ ଏଭଳି ଇଂରାଜୀ ପ୍ରବନ୍ଧ ଖାତା ଦେଖି ୨୦୦ରୁ ୧୧୭ ଦେଇଥିବା ବେଳେ ମୁଖ୍ୟ ପରୀକ୍ଷକ ଏହାକୁ ୫୦ କରିଦେବା କେତେ ଯୁକ୍ତିଯୁକ୍ତ? ଜଣେ ପରୀକ୍ଷକ ଓ ମୁଖ୍ୟ ପରୀକ୍ଷକଙ୍କ ଭିତରେ ଯଦି ବି ମାର୍କ ନେଇ ମତପାର୍ଥକ୍ୟ ରୁହେ, ତେବେ ସେଥିରେ ଏତେ ପ୍ରଭେଦ ଆସିପାରିବ କି? ରଜତଙ୍କୁ ମୌଖିକ ପରୀକ୍ଷାରେ ୨୫୦ରୁ ମାତ୍ର ୧୦୦ ମାର୍କ ମିଳିଛି । ଓପିଏସ୍ସି ସାଧାରଣ ପ୍ରଶାସନ ବିଭାଗ ଓ ରଜତଙ୍କୁ ଦେଇଥିବା ଉତରରେ ଦର୍ଶାଇଛି ଯେ ରଜତଙ୍କ ଭଳି ସାଧାରଣ ବର୍ଗରେ ପରୀକ୍ଷା ଦେଇଥିବା ପିଲାଙ୍କ ମଧ୍ୟରୁ ୧୧୪୫ ମାର୍କ ପର୍ଯ୍ୟନ୍ତ ନମ୍ବର ପାଇଥିବା ପିଲାଙ୍କୁ ଓଏଏସ୍ ଚାକିରି ମିଳିଛି । ରଜତଙ୍କର ମୋଟ ମାର୍କ ଥିଲା ୧୧୩୨ । ଅର୍ଥାତ୍ ଆଉ ୧୩ ମାର୍କ କମ୍ । ଆଉ ଏହି ୧୩ ମାର୍କ ଭିତରେ ୨୫ ପିଲା ଅଛନ୍ତି । ତେବେ ପ୍ରଶ୍ନ ଉଠୁଛି- ଯେଉଁଠି ମୌଖିକ ପରୀକ୍ଷାରେ କିଛି ପିଲା ୨୫୦ରୁ ୨୫୦ ମାର୍କ ପାଇଥିବା ଦେଖାଯାଉଛି, ସେଠି ରଜତଙ୍କୁ ୧୦୦ ମାର୍କ ମିଳିବା ପଛରେ କିଛି ଚକ୍ରାନ୍ତ ଓ ଦୁର୍ନୀତି ନାହିଁତ?