ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କୁ ନେଇ ଆପୋଲୋର ଖୁଲାସା : ଚିକିତ୍ସା ସମୟରେ ବନ୍ଦ ଥିଲା ସିସିଟିଭି କ୍ୟାମେରା
କନକ ବ୍ୟୁରୋ : ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କୁ ନେଇ ପୁଣି ଏକ ନୂଆ ଖୁଲାସା । ସେ ଆପୋଲୋ ହସ୍ପିଟାଲରେ ଚିକିତ୍ସିତ ହେଉଥିବା ସମୟରେ ବନ୍ଦ କରିଦିଆଯାଇଥିଲା ସମସ୍ତ ସିସିଟିଭି କ୍ୟାମେରା । ଏହି ଚାଂଚଲ୍ୟକର ମନ୍ତବ୍ୟ ଦେଇଛନ୍ତି ଆପୋଲୋ ହସପିଟାଲର ଅଧ୍ୟକ୍ଷ ଡା. ପ୍ରତାପ ସି ରେଡ୍ଡି । ଜୟଲଳିତା ହସ୍ପିଟାଲରେ ଥିବା ୭୫ଦିନ ଯାଏଁ ସମସ୍ତ କ୍ୟାମେରାକୁ ବନ୍ଦ କରିଦିଆଯାଇଥିଲା ବୋଲି ସେ କହିଛନ୍ତି । କେବଳ ଏତିକି ନୁହେଁ ୨୪ଜଣ ରୋଗୀଙ୍କ ପାଇଁ ଉଦ୍ଦିଷ୍ଟ ଥିବା ଆଇସିୟୁରେ କେବଳ ଜୟଲଳିତାଙ୍କୁ ରଖାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଜୟଲଳିତାଙ୍କୁ ମୃତ୍ୟୁକୁ ନେଇ ତଦନ୍ତ କରୁଥିବା ବିଚାରପତି ଏ.ଅରୁମୁଗ ସ୍ୱାମୀଙ୍କ ଦ୍ୱାରା ଗଠିତ କମିଶନଙ୍କୁ ଜୟାଙ୍କ ସମ୍ପର୍କିତ ସମସ୍ତ ଦସ୍ତାବିଜ ଦାଖଲ କରିଥିବା ଅଧ୍ୟକ୍ଷ କହିଛନ୍ତି । ୨୦୧୬, ସେପ୍ଟେମ୍ବର ୨୨ ତାରିଖରେ ଜ୍ୱର ଓ ଡିହାଇଡ୍ରେସନରେ ପୀଡିତ ହୋଇ ଆପୋଲୋ ହସ୍ପିଟାଲରେ ଭର୍ତ୍ତି ହୋଇଥିଲେ । ଦୁଇ ଦିନ ପରେ ସୁସ୍ଥ ହୋଇ ଆସୁଥିବା ଜୟାଙ୍କ ଫୁସଫୁସରେ ସଂକ୍ରମଣ ଥିବା ଜଣାପଡିଥିଲା । ଅକ୍ଟୋବର ୧ ତାରିଖରୁ ଲଣ୍ଡନର ବିଶେଷଜ୍ଞଙ୍କ ପରାମର୍ଶ ଅନୁୂସାରେ ତାଙ୍କର ଚିକିତ୍ସା ଆରମ୍ଭ ହୋଇଥିଲା ।
ଅକ୍ଟୋବର ୬ ତାରିଖରେ ଏମ୍ସର ଏକ ଡାକ୍ତରୀ ଦଳ ଜୟଲଳିତାଙ୍କ ସ୍ୱାସ୍ଥ୍ୟ ପରିକ୍ଷା କରିଥିଲେ । ନଭେମ୍ବର ୩ ତାରିଖରେ ଜୟଲଳିତା ସଂପୂର୍ଣ୍ଣ ସୁସ୍ଥ ଥିବା ଆପୋଲୋ ହସ୍ପିଟାଲ ପକ୍ଷରୁ ପ୍ରକାଶ ପାଇଥିଲା । ପରେ ୧୯ ତାରିଖରେ ତାଙ୍କୁ ଆଇସିୟୁର ବାହାରକୁ ଅଣାଯାଇ ଚିକିତ୍ସା କରାଯାଇଥିଲା । କିନ୍ତୁ ଶେଷରେ ଡିସେମ୍ବର ୪ ତାରିଖ ରାତିରେ ହୃଦଘାତରେ ତାଙ୍କ ମୃତ୍ୟୁ ହୋଇଥିବା ଆପୋଲୋ ହସ୍ପିଟାଲ ପକ୍ଷରୁ ଜାରି କରାଯାଇ କୁହାଯାଇଥିଲା ।