କନକ ବ୍ୟୁରୋ : ସୁକମାରେ ସମର ସଜ୍ଜା ପାଇଁ ଆଉପାଦେ ଆଗେଇଲା ପ୍ରକ୍ରିୟା । ପିଓକେରେ ଆତଙ୍କବାଦୀଙ୍କୁ ନିପାତ କରିବା ପରି, ଛତିଶଗଡ ସୁକମାରେ ନକ୍ସଲଙ୍କ ମୂଳପୋଛ ପାଇଁ ସର୍ଜିକାଲ ଷ୍ଟ୍ରାଇକ ପରି ହେବ ଆକ୍ରମଣ । ସିଧା ମାଓବାଦୀଙ୍କ ଗଡରେ ପଶି ଆକ୍ରମଣ କରିବେ ସୁରକ୍ଷାକର୍ମୀ । ଆଉ ଲୁଚାଛପାରେ ନୁହେଁ ସାମ୍ନାସାମ୍ନି ହେବ ଲଢେଇ । ଏଥିପାଇଁ ମାଲକାନଗିରି ସୀମାନ୍ତ ସୁକମା ଜଙ୍ଗଲରେ ପହଂଚିସାରିଛନ୍ତି ୫ ହଜାରରୁ ଅଧିକ ଫୋର୍ସ । ଆଜିତ ଡୋଭାଲଙ୍କ ଇଙ୍ଗିତରେ ତିଆରି ହେଉଛି ଏହି ସ୍କେଚ । ନିଜ ଯୋଜନାକୁ ରୂପ ଦେବା ପାଇଁ ଆସନ୍ତାକାଲି ବସ୍ତର ଅଂଚଳର ସୁରକ୍ଷା ଅଧିକାରୀଙ୍କ ସହ ଆଲୋଚନା କରିବେ ଡୋଭାଲ ।
Kanak News is now on WhatsApp
Join and get latest news updates delivered to you via WhatsApp
ଉରି ଆକ୍ରମଣର ୧୧ ଦିନ ପରେ ଅର୍ଥାତ ଗତବର୍ଷ ସେପ୍ଟେମ୍ବର ୨୯ ତାରିଖରେ ପାକ ଅଧିକୃତ କାଶ୍ମୀରରେ ସର୍ଜିକାଲ ଷ୍ଟ୍ରାଇକ କରିଥିଲା ଭାରତୀୟ ସେନା । ଆଉ ଏହି ଅତର୍କିତ ଆକ୍ରମଣର ମାଷ୍ଟରପ୍ଲାନ ପ୍ରସ୍ତୁତ କରିଥିଲେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ । ଭାରତୀୟ ଗୁଇନ୍ଦା ସଂସ୍ଥା ର’ ର ଏହି ପୂର୍ବତନ ମୁଖ୍ୟ ଶତ୍ରୁ ସଂହାର ପାଇଁ ରଣନୀତି ପ୍ରସ୍ତୁତ କରିବାରେ ମାହିର । ଯିଏ ସୁକମାରେ ସମର ସଜ୍ଜା ପାଇଁ ପ୍ରସ୍ତୁତ କରୁଛନ୍ତି ସ୍କେଚ ।
ଯୋଜନାକୁ କିଭଳି ସଫଳ କରିବେ ସୁରକ୍ଷାକର୍ମୀ, ସେହି ମର୍ମରେ ଆସନ୍ତାକାଲି ବସ୍ତର ଅଂଚଳର ସମସ୍ତ ୭ ଜିଲ୍ଲାପାଳ, ଏସପି, ଡିଜିପି ଓ ସିଆରପିଏଫ ଅଧିକାରୀଙ୍କ ସମେତ ନକ୍ସଲ ଅପରେସନରେ ନିୟୋଜିତ ଅଧିକାରୀମାନଙ୍କ ସହ ଭିଡିଓ କନଫରେନ୍ସିଂରେ କରିବେ ଆଲୋଚନା । କୁହାଯାଉଛି ପ୍ରଧାନମନ୍ତ୍ରୀ ମୋଦିଙ୍କ ନିର୍ଦ୍ଦେଶରେ ଏହି ଟାର୍ଗେଟ ୱାରର ନୀଳ ନସ୍କା ଆଙ୍କିଛନ୍ତି ଡୋଭାଲ ।
ବୁର୍କାପାଲ ଆକ୍ରମଣର କଡା ଯବାବ ଦେବାପାଇଁ ଅଜିତ ଡୋଭାଲଙ୍କୁ ଦିଆଯାଇଛି ପୂର୍ଣ୍ଣ କ୍ଷମତା । କେନ୍ଦ୍ର ଗୃହ ମନ୍ତ୍ରାଳୟର ମାଓ ସଂପର୍କୀତ ପରାମର୍ଶଦାତା ବିଜୟ କୁମାର ଦୁଇଦୁଇଥର ବସ୍ତର ଗସ୍ତ କରିସାରିଛନ୍ତି । ଛତିଶଗଡ ସ୍ୱତନ୍ତ୍ର ଡିଜି, ଡିଏମ ଅୱସ୍ଥି ବସ୍ତରରେ ରହି ମାଓ ବିରୋଧୀ ଅପରେସନକୁ ତଦାରଖ କରୁଛନ୍ତି ।