କଂଗ୍ରେସରେ କନ୍ଦଳ ଭିତରେ ଆଜି ଏଆଇସିସି ପର୍ଯ୍ୟବେକ୍ଷକଙ୍କ ସହ ବିଧାୟକ ଦଳର ଆଲୋଚନା ! ଉଠିପାରେ ପିସିିସି ନେତୃତ୍ୱ ପରିବର୍ତ୍ତନ ସ୍ୱର
କନକ ବ୍ୟୁରୋ: ଆଜି କଂଗ୍ରେସ ପର୍ଯ୍ୟବେକ୍ଷକଙ୍କୁ ସାକ୍ଷାତ କରିବେ ଦଳୀୟ ବିଧାୟକ । ଆଜି ଅପରାହ୍ନରେ ପର୍ଯ୍ୟବେକ୍ଷକମାନଙ୍କ ସହ ଦଳୀୟ ବିଧାୟକମାନେ ସାକ୍ଷାତ ଆଲୋଚନା କରିବାର କାର୍ଯ୍ୟକ୍ରମ ରହିଛି । ଏହି ଆଲୋଚନା ସରଗରମ ହୋଇପାରେ ବୋଲି ଅନୁମାନ କରାଯାଉଛି । କାରଣ ବିଧାୟକମାନେ ପିସିସି ନେତୃତ୍ୱ ପରିବର୍ତ୍ତନ ପ୍ରସଙ୍ଗ ଉଠାଇବାର ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି କଂଗ୍ରେସ ଜିଲ୍ଲା ସଭାପତି, ବିଭିନ୍ନ ସାମ୍ମୁଖ୍ୟ ମୁଖ୍ୟ ତଥା ପିସିସି କର୍ମକର୍ତ୍ତାମାନଙ୍କ ସହ ଆଲୋଚନା କରିଥିଲେ ଏଆଇସିସି ପର୍ଯ୍ୟବେକ୍ଷକ । ତେବେ ଏହି ଆଲୋଚନାରେ ପର୍ଯ୍ୟବେକ୍ଷକମାନେ ସଙ୍ଗଠନକୁ ସୁଦୃଢ କରିବା ଉପରେ ଗୁରୁତ୍ୱ ଦେଇଥିଲେ । କିନ୍ତୁ ଆଲୋଚନା ବେଳେ ପିସିସି ପରିବର୍ତ୍ତନ ପ୍ରସଙ୍ଗ ଉଠି ନଥିଲା । ପର୍ଯ୍ୟବେକ୍ଷକମାନେ ତିନି ଦିନ ଧରି ସାକ୍ଷାତ ଆଲୋଚନା କରିବା ପରେ ଦଳୀୟ ହାଇକମାଣ୍ଡ ସୋନିଆ ଗାନ୍ଧିଙ୍କୁ ରିପୋର୍ଟ ଦେବେ ।
ସୂଚନା ମୁତାବକ, ରାଜ୍ୟ କଂଗ୍ରେସର ସ୍ଥିତି ପରଖିବାକୁ କେନ୍ଦ୍ରୀୟ ପର୍ଯ୍ୟବେକ୍ଷକ ଦଳ ଆସିଛନ୍ତି । ପ୍ରଥମ ଦିନରେ ବିଭିନ୍ନ ଜିଲ୍ଲା ସଭାପତି ମାନଙ୍କୁ ଜଣ ଜଣ କରି ଭେଟିବା ସହ ସେମାନଙ୍କ ସହ ସଙ୍ଗଠନକୁ ସୁଦୃଢ କରିବା ଉପରେ ଆଲୋଚନା କରିଥିଲେ । କିନ୍ତୁ ପିସିସି ପରିବର୍ତ୍ତନ ପ୍ରସଙ୍ଗ ଉଠି ନଥିଲା । ବରଂ ସଂଗଠନକୁ କିପରି ମଜବୁତ କରାଯିବ ସେ ନେଇ ପ୍ରଶ୍ନ ପଚାରିଥିଲେ ।
ଏହା ସହିତ ପିସିସି କର୍ମକର୍ତ୍ତା ଓ ବିଭିନ୍ନ ଛାମୁଆ ସଂଗଠନର ପଦାଧିକାରୀଙ୍କ ସହ ମଧ୍ୟ ସମାନ ଆଲୋଚନା କରିଛନ୍ତି । କଂଗ୍ରେସର ଏଭଳି ପରିସ୍ଥିତି ପାଇଁ ଦୁର୍ବଳ ନେତୃତ୍ୱକୁ ଦାୟୀ କରୁଥିଲେ ଖୋଦ କଂଗ୍ରେସ ନେତା । ତେଣୁ ପର୍ଯ୍ୟବେକ୍ଷକ ନେତୃତ୍ୱ ପରିବର୍ତ୍ତନକୁ ନେଇ ଆଲୋଚନା ନକରିବା କଂଗ୍ରେସ ନେତାଙ୍କୁ ଆଶ୍ଚର୍ଯ୍ୟ କରିଛି ।
ଅନ୍ୟପଟେ ନେତୃତ୍ୱ ପରିବର୍ତ୍ତନ ସପକ୍ଷରେ ମତ ରଖିଛନ୍ତି କିଛି ପିସିସି କର୍ମକର୍ତ୍ତା । କଂଗ୍ରେସର ଦୂରାବସ୍ଥା ପାଇଁ ଦୁର୍ବଳ ନେତୃତ୍ୱ ମୁଖ୍ୟ କାରଣ ଓ ତୃଣମୂଳ ସ୍ତରରେ କର୍ମୀ ମଧ୍ୟ ପରିବର୍ତ୍ତନ ଚାହୁଁଛନ୍ତି ବୋଲି ପ୍ରତିକ୍ରିୟା ରଖିଛନ୍ତି । ଆଉ ପର୍ଯ୍ୟବେକ୍ଷକ ଦଳର ଏହି ଗସ୍ତ କିଛି ସକରାତ୍ମକ ଫଳ ଦେବ ବୋଲି ଆଶା ବାନ୍ଧିଛନ୍ତି ।