ଜାମ୍ମୁ-କାଶ୍ମୀରରେ ଇଦ୍ ପାଇଁ ସୁରକ୍ଷା ବ୍ୟବସ୍ଥା କୋହଳ : ଲୋକେ କିଣୁଛନ୍ତି ଆତ୍ୟବଶ୍ୟକ ସାମଗ୍ରୀ, କର୍ମଚାରୀଙ୍କୁ ମିଳିଲା ଅଗ୍ରୀମ ଦରମା
କନକ ବ୍ୟୁରୋ : ଜମ୍ମୁକାଶ୍ମୀରରୁ ଧାରା ୩୭୦ ଉଛେଦ ପରେ ଧୀରେ ଧୀରେ ସୁଧୁରୁଛି ସ୍ଥିତି । ପର୍ଯ୍ୟାୟକ୍ରମେ ଘାଟିର ବିଭିନ୍ନ ଅଂଚଳରେ କଟକଣାକୁ କୋହଳ କରୁଛି ପ୍ରଶାସନ । ଲଦାଖ, ଜମ୍ମୁ ପରେ ଏବେ ଶ୍ରୀନଗର, ଅନନ୍ତନାଗ ଓ ବଡଗାମରେ ଧାରା ୧୪୪ ଧାରାକୁ ହଟାଇ ଦିଆଯାଇଛି । ପଦଯାତ୍ରୀ ଓ ବାଇକ୍ ଚାଳକଙ୍କ ପାଇଁ ଟ୍ରାଫିକ୍ କଟକଣାକୁ କୋହଳ କରାଯାଇଛି । କଟକଣା କୋହଳ ହେବା ପରେ ଦୋକାନ ବଜାର ଖୋଲବାରେ ଲାଗିଛି । ଲୋକମାନେ ଘରୁ ବାହାରି ବଜାରକୁ ଯାଇ ବିଭିନ୍ନ ସାମଗ୍ରୀ କିଣୁଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଜମ୍ମୁକାଶ୍ମୀରର ସଶସ୍ତ୍ର ପୋଲିସ ଫୋର୍ସର ଏଡିଜି ଏସ. ଜେ. ଗିଲାନୀ କହିଛନ୍ତି ପରିସ୍ଥିତିରେ ସୁଧାର ଆସୁଥିବାରୁ ଘାଟିର ବିଭିନ୍ନ ଅଂଚଳରୁ କଟକଣାକୁ କୋହଳ କରାଯାଉଛି । ଆସନ୍ତାକାଲି ମୁସଲମାନ ସମ୍ପ୍ରଦାୟର ବଡ ପର୍ବ ଇଦ୍-ଉଲ୍-ଜୁହା ହାଇଥିବାରୁ କଟକଣାକୁ ଆହୁରି କୋହଳ କରାଯିବା ପାଇଁ ଚିନ୍ତା କରାଯାଉଛି ବୋଲି କହିଛନ୍ତି ଗିଲାନୀ । ତେବେ ଇଂଟରନେଟ୍ ଓ ଟେଲିଫୋନ ସେବା ଯୋଗାଇଦେବା ପାଇଁ ଆଉ କିଛି ଦିନ ସମୟ ଲାଗିବ ବୋଲି ସୂଚନା ଦେଇଛନ୍ତି ଗିଲାନୀ । ସେହିପରି ଜମ୍ମୁକାଶ୍ମୀରର ସରକାରୀ ଚାକିରିଆଙ୍କୁ ଇଦ୍ ପର୍ବ ପାଳନ ପାଇଁ ୩ଶହ କୋଟି ଟଙ୍କା ଅଗ୍ରୀମ ଦରମା ଦିଆଯାଇଛି ।
ଲୋକମାନେ କିଭଳି ସୁବିଧାରେ ବ୍ୟାଙ୍କରୁ ଟଙ୍କା ଉଠାଇପାରିବେ ସେଥିପାଇଁ ରାଜ୍ୟର ୩୫୦ଟି ଏଟିଏମ କାର୍ଯ୍ୟକ୍ଷମ ହୋଇଛି । ଜମ୍ମୁ, କାଠୁଆ , ସାମ୍ବା , ଉଦ୍ଧମପୁର ଓ ରେଶାଇ ଅଂଚଳରୁ କଟକଣାକୁ କୋହଳ କରାଯିବା ସହ ସ୍କୁଲ କଲେଜ ଖୋଲିବାକୁ ନିର୍ଦ୍ଦେଶ ଦିଆଯାଇଛି । ତେବେ ଘାଟିରେ କାଁଭାଁ ଗଣ୍ଡଗୋଳ ହୋଇଥିବା ଖବର ସାମନାକୁ ଆସିଛି । ଏହାକୁ ଜମ୍ମୁକାଶ୍ମୀର ପୋଲିସ ନିୟନ୍ତ୍ରଣ କରିବାରେ ସଫଳ ହୋଇଛି ।