କନକ ବ୍ୟୁରୋ : ଆରମ୍ଭ ହେଲା କାଉଂଟ୍ ଡାଉନ୍ । ଚଳଚଂଚଳ କଲେଜ୍ କ୍ୟାମ୍ପସ୍ । ଆସନ୍ତା ୨୩ ତାରିଖରେ ହେବ ଛାତ୍ର ସଂସଦ ନିର୍ବାଚନ । ପ୍ରାର୍ଥୀମାନଙ୍କର ଭୋକ, ଶୋଷ କିମ୍ବା ନିଦ ନାହିଁ । ସମସ୍ତେ କେବଳ ସମର୍ଥକ ଖୋଜିବାରେ ବ୍ୟସ୍ତ । ହେଲେ ନିର୍ବାଚନକୁ ନେଇ କେଉଁଠି ଶାନ୍ତି ତ କେଉଁଠି ଦେଖିବାକୁ ମିଳୁଛି ତାତି । ବିଭିନ୍ନ କଲେଜରେ ଦେଖାଦେଇଛି ପ୍ରାକ୍ ନିର୍ବାଚନୀ ହିଂସା ।
Kanak News is now on WhatsApp
Join and get latest news updates delivered to you via WhatsApp
ତେବେ କ୍ଷମତାପାଇଁ ସାଧାରଣ ନିର୍ବାଚନରେ ବିଭିନ୍ନ ରାଜନୈତିକ ଦଳ ମଧ୍ୟରେ ହିଂସାକାଣ୍ଡ ଘଟିବା କିଛି ନୁଆ କଥା ନୁହେଁ । କିନ୍ତୁ ବର୍ତ୍ତମାନ ଯୁବସମାଜ ଆଉ ଛାତ୍ର ସମାଜ କ୍ଷମତା ପାଇଁ ଆପଣାଇଛନ୍ତି ହିଂସାକାଣ୍ଡ । ବର୍ତ୍ତମାନ ରାଜ୍ୟରେ ଆରମ୍ଭ ହୋଇଛି ଛାତ୍ର ସଂସଦ ନିର୍ବାଚନ । ଆଶାୟୀ ପ୍ରାର୍ଥୀମାନେ କ୍ଷମତା ପାଇଁ ଆପଣାଉଛନ୍ତି ହିଂସାକାଣ୍ଡ । ଆଉ ପରିସ୍ଥିତି ଏପରି ହୋଇଛି ଛାତ୍ରସଂସଦ ନିର୍ବଚାନରେ ସବୁବେଳେ ଦୃଷ୍ଟି ଆକର୍ଷଣ କରୁଥିବା ବାଣୀବିହାର ଏବଂ ବିଜେବିରେ ବାତିଲ୍ ହୋଇଛି ନିର୍ବାଚନ । କଲେଜ୍ ମାନଙ୍କରେ ବୋମାମାଡ ଭଳି ଘଟଣା ମାରାତ୍ମକ ରୋଗ ଭଳି ବ୍ୟାପୁଛି । ଗତକାଲି ବାଣୀବିହାରରେ ପ୍ରାୟ ୧୨ଟି ବୋମା ମାଡ ହୋଇଛି । ଯାହାର ଫଳ ସ୍ୱରୁପ କଲେଜରେ ଘୋଷଣା ହୋଇଛି ସାଇନ୍ ଏ ଡାଏ । ସେହିପରି କିଛି ଦିନ ପୂର୍ବରୁ ମହର୍ଷି କଲେଜରେ ମଧ୍ୟ ଅନୁରୂପ ଘଟଣା ଦେଖିବାକୁ ମିଳିଥିଲା ।
ବନ୍ଦ ହେଲା ବାଣୀବିହାର :
ବୋମାମାଡ ଓ ବ୍ୟାପକ ଅଶାନ୍ତି ମଧ୍ୟରେ ବନ୍ଦ ହୋଇଛି ବାଣୀବିହାର ନିର୍ବାଚନ । ଛାତ୍ର ଅଶାନ୍ତି ପାଇଁ ଏଥର ବାଣୀବିହାରରେ ହେବନି ନିର୍ବାଚନ । ଛାତ୍ର ସଂସଦ ନିର୍ବାଚନ ବାତିଲ କରିବା ସହ ସାଇନ-ଏ-ଡାଏ ଘୋଷଣା କରିଛନ୍ତି କର୍ତ୍ତୃପକ୍ଷ । କ୍ୟାମ୍ପସରେ ଏବେ ବି ପୋଲିସ ଛାଉଣୀ । ମୁଖ୍ୟ ଫାଟକରେ ତାଲା ଝୁଲୁଛି । ସାଇନ୍ ଏ ଡାଏ ଘୋଷଣା ପରେ ହଷ୍ଟେଲ ଖାଲି କରିବାକୁ ଡାକବାଜିରେ ଦିଆଯାଇଥିଲା ସୂଚନା । ପରେ ନିଜ ନିଜ ଜିନିଷପତ୍ର ନେଇ ହଷ୍ଟେଲ ଛାଡିଛନ୍ତି ଛାତ୍ରଛାତ୍ରୀ ।
ନିର୍ବାଚନ ବାତିଲ୍ ହେବା ପରେ କ୍ୟାମ୍ପସରେ ଉତ୍ୟକ୍ତ ଛାତ୍ରଙ୍କ ଘଙ୍କାଇଛନ୍ତି ଲଙ୍କାକାଣ୍ଡ । ଭିସି ଅଫିସରେ ବ୍ୟାପକ ଭଂଗାରୁଜା କରିଛନ୍ତି କିଛି ଆଶାୟୀ ପ୍ରାର୍ଥୀ । ଏପରିକି କିଛି ଛାତ୍ର ଟାୟାର ଜାଳି ପ୍ରତିବାଦ କରିଥିଲେ । ନିଷ୍ପତି ପ୍ରତ୍ୟାହାର ସହ ନିର୍ବାଚନ ଦାବିରେ ଅଡି ବସିଥିଲେ ଆଶାୟୀ ଛାତ୍ର ।
ଛାତ୍ର ସଂସଦ ନିର୍ବାଚନ ଭିତରେ ୩ ଦିନ ହେଲା କମ୍ପୁଥିଲା କ୍ୟାମ୍ପସ । ରବିବାର କ୍ୟାମ୍ପସରେ ୧୨ ଟି ବୋମା ଫୁଟିଥିଲା । ଏପରିକି ମହିଳା ହଷ୍ଟେଲ ଉପରକୁ ବୋମାମାଡ କରିଥିଲେ ଦୁବୃତ । ଏହାପରେ ଉକ୍ରଳ ବିଶ୍ୱବିଦ୍ୟଳୟରେ ନିର୍ବାଚନ ନେଇ ଆଶଙ୍କା ଦେଖାଦେଇଥିଲା । ଏବେ ସ୍ଥିତି ନସୁଧୁରିବା ଯାଏଁ ବାଣୀବିହାରକୁ ସାଇନ-ଏ-ଡାଏ ଘୋଷଣା କରିଛନ୍ତି କର୍ତ୍ତୃପକ୍ଷ । ପରିସ୍ଥିତିକୁ ଦୃଷ୍ଟିରେ ରଖି ବିଶ୍ୱବିଦ୍ୟାଳୟରେ ୧୪୪ ଧାରା ଜାରି କରାଯାଇଛି । ବାଣୀବିହାର ଗଣ୍ଡଗୋଳ ଘଟଣାରେ ୨ଟି ମାମଲା ରୁଜୁ କରାଯିବା ସହ ଜଣକୁ ଗିରଫ କରାଯାଇଥିବା ପୁଲିସ କମିସନର ୱାଇ ବି ଖୁରାନିଆ ସୂଚନା ଦେଇଛନ୍ତି ।
ପୁରୀ ଏସସିଏସ କଲେଜ :
ସେହିପରି ପୁରୀ ଏସସିଏସ କଲେଜ ଓ କାକଟପୁର ମଙ୍ଗଳା ମହାବିଦ୍ୟାଳୟରେ ମଧ୍ୟ ନିର୍ବାଚନୀ ହିଂସା ଦେଖାଦେଇଛି । କାକଟପୁର ମଙ୍ଗଳା ମହାବିଦ୍ୟାଳୟରେ ନିର୍ବାଚନ ବାତିଲ କରାଯାଇଛି । କଲେଜରେ ସାଇନ ଏ ଡାଏ ଘୋଷଣା କରାଯାଇଛି । କଲେଜରେ ବୋମାମାଡ, ବ୍ୟାପକ ଭଙ୍ଗାରୁଜା ଓ ପୋଡାଜଳା ପରେ ନିର୍ବାଚନ ବାତିଲ କରାଯାଇଛିି । ସେହିପରି ପୁରୀ ସାମନ୍ତ ଚନ୍ଦ୍ରଶେଖର ମହାବିଦ୍ୟାଳୟରେ ଛାତ୍ର ଅଶାନ୍ତି ଦେଖାଦେଇଛି । ପ୍ରାର୍ଥିପତ୍ର ନାକଚ ଯୋଗୁଁ ଦୁଇ ଗୋଷ୍ଠି ମୁହାଁମୁହିଁ ହୋଇଛନ୍ତି । କଲେଜ ପରିସରରେ ପୋଡାଜଳା କରିଛନ୍ତି ଉତ୍ୟକ୍ତ ଛାତ୍ର । ନବରଙ୍ଗପୁର ଉମରକୋଟ ପେଣ୍ଡ୍ରାଣି ମହାବିଦ୍ୟାଳୟରେ ନିର୍ବାଚନ ଅନିୟମିତତା ନେଇ ଅଧ୍ୟାପକଙ୍କୁ ଛାତ୍ରଛାତ୍ରୀ ତାଲା ପକାଇବା ସହ ରାସ୍ତାରୋକ କରିଥିଲେ ।
ବନ୍ଦ ହେଲା ବିଜେବି କଲେଜ :
ଛାତ୍ର ଅଶାନ୍ତି କାରଣରୁ ବିଜେବି କଲେଜ ସାଇନ-ଏ-ଡାଏ ଘୋଷଣା କରାଯାଇଛି । ଛାତ୍ରୀନିବାସ ଉପରେ ଘନଘନ ବୋମାମାଡ ହେବା ପରେ କଲେଜ କର୍ତୃପକ୍ଷ ନିର୍ବାଚନ ସ୍ଥଗିତ ରଖିବାକୁ ନିଷ୍ପତି ନେଇଛନ୍ତି । ଏହାପରେ ରାସ୍ତାକୁ ଓହ୍ଲାଇଛନ୍ତି ଛାତ୍ରଛାତ୍ରୀ । ରାଜନୈତିକ ଉଦେଶ୍ୟ ରଖି କଲେଜରେ ନିର୍ବାଚନ ବାତିଲ କରାଯାଇଥିବା ଅଭିଯୋଗ ହୋଇଛି ।
ମହର୍ଷି କଲେଜ :
ବିଜ୍ଞପ୍ତି ପ୍ରକାଶ ପାଇବା ପରେ ପରେ କଲେଜ କ୍ୟାମ୍ପସରେ ଫୁଟିଥିଲା ବୋମା । ବୋମା ମାଡ଼ ପରେ ଭୟଭୀତ ହୋଇ ପଡିଥିଲେ ଛାତ୍ର ଛାତ୍ରୀ । ଦୁଇଟି ବୋମା ଫିଙ୍ଗା ଯାଇଥିବା ବେଳେ ଗୋଟିଏ ବୋମା ଫୁଟିନଥିଲା । ଆଗକୁ ପରିସ୍ଥିତି ଆହୁରି ସଂଗୀନ ହେବା ଆଶଙ୍କା କରାଯାଉଛି ।
ରମାଦେବୀ ମହିଳା ବିଶ୍ୱବିଦ୍ୟାଳୟ, ମଟନ୍ ଖାଅ ଭୋଟ ଦିଅ :
ଛାତ୍ର ସଂସଦ ନିର୍ବାଚନକୁ ଆଖିରେ ରଖି ବିଭିିନ୍ନ ରାଜନୈତିକ ଦଳର ଛାତ୍ର ସଂଗଠନ ସବୁ ସମର୍ଥନ ଯୋଗାଡ ପାଇଁ ଭିନ୍ନ ଭିନ୍ନ କୌଶଳ ଆପଣେଇଛନ୍ତି । କ୍ୟାମ୍ପସରେ ଖୋଲିଛି ମଟନ୍, ଚିକେନ୍, ବିରିୟାନୀର ପସରା । ଏଭଳି ଦୃଶ୍ୟ ଦେଖିବାକୁ ମିଳିଛି ଭୁବନେଶ୍ୱର ରମାଦେବୀ ମହିଳା ବିଶ୍ୱବିଦ୍ୟାଳୟରେ । ନିର୍ବାଚନରେ ନିଜ ସପକ୍ଷରେ ଭୋଟ ହାତେଇବାକୁ ପ୍ରାର୍ଥୀମାନଙ୍କ ଏହି ଆୟୋଜନ ।
ସାଧାରଣ ନିର୍ବାଚନରେ ଯେପରି ଭୋଟରମାନଙ୍କୁ ଆକୃଷ୍ଟ କରିବା ପାଇଁ ନେତାମାନେ ଉଦ୍ୟମ କରିଥାନ୍ତି, ସେହିଭଳି ଉଦ୍ୟମ କରୁଛନ୍ତି ଛାତ୍ର ସଂସଦ ପ୍ରାର୍ଥୀ । କିଏ ହୋଟେଲ ନେଇ ସାଙ୍ଗ ସାଥୀମାନଙ୍କୁ ଖୁଆଉଛନ୍ତି ତ କିଏ କଲେଜ ଭିତରେ ଖାଦ୍ୟ ପସରା ଖୋଲି ଦେଉଛନ୍ତି ।
ପୋଷ୍ଟର, ବ୍ୟାନର, କଟ ଆଉଟରେ ଛାଇ ଯାଇଛି କ୍ୟାମ୍ପସ । ଭୋଟରଙ୍କୁ ନିଜ ସପକ୍ଷକୁ ନେବାକୁ ପାଣି ଭଳି ଖର୍ଚ୍ଚ ହେଉଛି ଟଙ୍କା । ଲିଙ୍ଗଡୋ କମସନଙ୍କ କଟକଣାକୁ ପରୱା ନାହିଁ ଛାତ୍ରନେତାଙ୍କର । ଶନିବାର ନାମାଙ୍କନ ପତ୍ର ଦାଖଲ ହେବା ପରେ ଆହୁରି ସରଗରମ ହୋଇପଡିଛି କଲେଜ ଓ ୟୁନିଭରସିଟିର କ୍ୟାମ୍ପସ୍ ।
କଲେଜ ପରିସରରେ ଶିକ୍ଷାଦାନ ସହ ଚରିତ୍ରଗଠନ ମୂଳ ଲକ୍ଷ । ହେଲେ ନିର୍ବାଚନ ଯୋଗୁଁ ହିଂସାକାଣ୍ଡ ସୃଷ୍ଟି କରିବା ପାଇଁ ଚାଲିଛି ପ୍ରତିଦ୍ୱନ୍ଦିତା । ଏକଥା କାହାକୁ ଅଛପା ନାହିଁ ଯେ ବର୍ତ୍ତମାନ ଛାତ୍ର ସଂସଦ ନିର୍ବାଚନକୁ ବିଭିନ୍ନ ରାଜନୈତିକ ଦଳ ନିଜ ସମ୍ମାନ ପ୍ରଶ୍ନ ରୂପେ ଗ୍ରହଣ କରିଛନ୍ତି । ତେଣୁ କଳେ ବଳେ କୌଶଳେ ଏହି ନିର୍ବାଚନକୁ ବାଜିମାତ୍ କରିବାକୁ ପ୍ରୟାସ କରୁଛନ୍ତି ସମସ୍ତ ରାଜନୈତିକ ଦଳ । ଏପରିକି ଛାତ୍ର ମାନଙ୍କୁ ହିଂସା ପଥ ଆପଣେଇବାକୁ ଏକ ରକମର ପ୍ରୋତ୍ସାହନ ଦେଉଛନ୍ତି କହିଲେ ଅତ୍ୟୁକ୍ତି ହେବ ନାହିଁ । ଯାହାର ଉଦାହରଣ ମଧ୍ୟ ଦେଖିବାକୁ ମିଳିଛି । କେଉଁଠି ପ୍ରାର୍ଥୀଙ୍କୁ ଅପହରଣ କରାଯାଉଛି ତ ଆଉ କେଉଁଠି କରାଯାଉଛି ଭୟଭୀତ । କହିବାକୁ ଗଲେ ହିଂସା ଛାତ୍ର ଛାତ୍ରୀମାନଙ୍କ ମନରେ ବିଷ ମଂଜି ବୁଣି ଏତେ କମ୍ ବୟସରୁ କବଳିତ କରୁଛି । ଦେଶର ଭବିଷ୍ୟତ ନଷ୍ଟ ଆଡକୁ ଗତି କରୁଛି । ଏହି ସବୁ ପରିସ୍ଥିତ ଦେଖି ଲାଗୁଛି ହିଂସା ଓ ଦୁର୍ନୀତି ତାର କ୍ଷେତ୍ର ଏହିଠାରୁ ହିଁ ପ୍ରସ୍ତୁତ କରୁଛି ।
ତେବେ ମହାବିଦ୍ୟାଳୟ ମାନଙ୍କରେ ଛାତ୍ର ସଂସଦ ନିର୍ବାଚନ ସ୍ୱାଧୀନତାର ଅବ୍ୟବହିତ ପୂର୍ବରୁ ଅନୁଷ୍ଠିତ ହେଉଥିଲା । ଉଦ୍ଦେଶ୍ୟ ଥିଲା ବିଦେଶୀ ଶାସକ ଗଲା ପରେ ଆମ ଆମକୁ ଶାସନ କରିବୁ । ଦେଶକୁ ଶାସନ ପାଇଁ ଉପଯୁକ୍ତ ନେତା ସୃଷ୍ଟି କରିବା ପାଇଁ ଛାତ୍ର ସଂସଦ ନିର୍ବାଚନ ଥିଲା ଭିତ୍ତିଭୂମି । ପାଠ ପଢୁଥିବା ଛାତ୍ରଛାତ୍ରୀ ମାନଙ୍କୁ ଗଣତନ୍ତ୍ର ପଦ୍ଧତିରେ ପ୍ରତିନିଧି ବାଛିବାକୁ ସୁଯୋଗ ଦିଆଗଲା । ଯାହାର ଉଦ୍ଦେଶ୍ୟ ଥିଲା ଯେଉଁମାନେ ସଭାପତି ଏବଂ ସଂପାଦକ ଭାବରେ ନିର୍ବାଚିତ ହେବେ ସେମାନେ ଦେଶର ଭବିଷ୍ୟତର ନେତା । ଦେଶ ଏବଂ ରାଜ୍ୟର ଧରିବେ ଶାସନ ମଙ୍ଗ । ଯେଉଁମାନେ କ୍ରାଡା ସମ୍ପାଦକ ହେବେ ସେମାନେ କଲେଜ ଜୀବନରୁ ହିଁ କ୍ରୀଡା ନୈପୁଣ୍ୟତା ସୃଷ୍ଟି କରିବେ । ଆଉ ରାଜ୍ୟ ତଥା ଦେଶକୁ ମିଳିବେ ନୂଆ ପ୍ରତିଭା ।
ସମୟ ଥିଲା ଛାତ୍ର ସଂସଦ ନିର୍ବାଚନରେ ଭାଗ ନେଉଥିବା ଛାତ୍ର ଛାତ୍ରୀ ମାନେ କୌଣସି ରାଜନୈତିକ ଦଳ ତରଫରୁ ଲଢୁନଥିଲେ । ମାତ୍ର ୮୦ ଦଶକର ଆରମ୍ଭରୁ ରାଜନୈତିକ ଦଳ ମାନେ ନିଜ ଦଳର ଛାତ୍ର ସଂଗଠନ ଗଢି କଲେଜ୍ ନିର୍ବାଚନ ଲଢୁଛନ୍ତି । କଲେଜ୍ ନିର୍ବାଚନ ପରିଚାଳନା ଏବଂ ତଦାରଖ କରିବା ପାଇଁ ନିଜ ଦଳର ଯୁବନେତା ମାନଙ୍କୁ ନିଯୁକ୍ତି ଦେଉଛନ୍ତି । କିନ୍ତୁ ବର୍ତ୍ତମାନ ଦଳୀୟ ଭିତ୍ତିରେ ନିର୍ବାଚନ ହେଉଥିବା ସହ ଛାତ୍ରଛାତୀଙ୍କ ପରିପକ୍ୱତା ଅଭାବରୁ ସୁଯୋଗ ହାତଉଛନ୍ତି ବିଭିନ୍ନ ରାଜନୈତିକ ଦଳ । ନିର୍ବାଚନ ସମୟରେ ଗୋଷ୍ଠୀ ବିବାଦ , ଅଧ୍ୟାପକ ଏବଂ ଅଧ୍ୟପିକା ମାନଙ୍କୁ ଅଶାଳୀନ ଏବଂ ରୁଚିହୀନ ଆଚରଣ ଏବଂ ଉଚ୍ଚାରଣ କଲେଜ୍ ପରିସରକୁ କରୁଛି ବିଷାକ୍ତ । ଧୀରେ ଧୀରେ ପ୍ରତିଷ୍ଠିତ ମହାବିଦ୍ୟାଳୟ ଏବଂ ବିଶ୍ୱବିଦ୍ୟାଳୟ ପାଲଟିଲାଣି ଦଳୀୟ ରଣକ୍ଷେତ୍ର । କାନ୍ଥବାଡରେ ଲଗୁଛି ଅସଂଖ୍ୟ ପୋଷ୍ଟର୍ । ଦଳୀୟ ନେତାମାନେ ଦଳୀୟ ସ୍ୱାର୍ଥକୁ ନେଇ ନିର୍ବାଚନ ପରିଚାଳନା କରୁଛନ୍ତି । ଯାହାର ଫଳସ୍ୱରୁପ କଲେଜ୍ ପରିସରରେ ଅଣଛାତ୍ରମାନଙ୍କର ପ୍ରବେଶ ହେଉଛି । ଏବଂ ବିଦ୍ୟ।।ର ମନ୍ଦିର କୁହାଯାଉଥିବା ଏହି କଲେଜ ମାନଙ୍କରେ ନଷ୍ଟ ହେଉଛି ଅଧ୍ୟୟନରେ ଏକାଗ୍ରତା । ଯଦି ଏହିଭଳି ଚାଲି ରହେ ତେବେ କଲେଜ୍ ଗୁଡିକ ଶିକ୍ଷା ଆହରଣର କେନ୍ଦ୍ର ହେବା ପରିବର୍ତ୍ତେ ପାଲଟିବ ହିଂସାକାଣ୍ଡ ଆହରଣର କେନ୍ଦ୍ର । ଆଉ ପଥଭ୍ରଷ୍ଟ ହେବ ଯୁବ ସମାଜ ।
ଏକଥାକୁ ଅସ୍ୱୀକାର କରିହେବ ନାହିଁ ଯେ ଦେଶପାଇଁ ଏବଂ ସରକାର ଗଠନ ପାଇଁ ନେତାଙ୍କର ଆବଶ୍ୟକତା ରହିଛି । ସେହି ନେତା ମାନେ ଯୋଗ୍ୟ ଏବଂ ଗୁଣାତ୍ମକ ହେବ ନିହାତି ଜରୁରୀ । ଏଥିପାଇଁ ମହାବିଦ୍ୟାଳୟ ସ୍ତରରେ ଛାତ୍ର ସଂସଦ ନିର୍ବାଚନ ଏକ ପରୀକ୍ଷାଗାର ବା ଲାଲ୍ ଲିଟମସ୍ ଟେଷ୍ଟ ସଦୃଶ । ଛାତ୍ର ସଂସଦ ନିର୍ବାଚନରେ ଅଂଶଗ୍ରହଣ କରୁଥିବା କିମ୍ବା ସକ୍ରିୟ ଭୂମି୍କା ନେଇଥିବା ଛାତ୍ରଛାତ୍ରୀ ପରବର୍ତ୍ତୀ ସମୟରେ ଭଲ ନେତା ହୋଇପାରନ୍ତି । ସଂସଦ ହେଉ ବା ବିଧାନସଭା ବହୁ ଛାତ୍ର ନେତା ଉନ୍ନତମାନର ଆଇନ୍ ପ୍ରଣୟନରେ ସହାୟକ ହୋଇଛନ୍ତି ।
ହେଲେ ବର୍ତ୍ତମାନର ଛାତ୍ର ସଂସଦ ନିର୍ବାଚନ ବାସ୍ତବତା ଠାରୁ ଅନେକ ଦୂରରେ । କଲେଜ୍ ନିର୍ବାଚନର ମୂଳଲକ୍ଷ୍ୟ ହେଉଛି ଛାତ୍ର ଛାତ୍ରୀଙ୍କ ଦାବୀ ଏବଂ ସମସ୍ୟାଗୁଡିକ ସେମାନଙ୍କ ମାଧ୍ୟମରେ ସମାଧାନ କରିବା । ଏବଂ ପାଣ୍ଠିର ସୁବିନିଯୋଗ କରିବା । କିନ୍ତୁ ବର୍ତ୍ତମାନର ପରିସ୍ଥିତି ଦେଖି ହୃଦବୋଧ ହେଉଛି ପ୍ରାର୍ଥୀମାନଙ୍କଠାରୁ ଯୁକ୍ତାତ୍ମକ ଆଶା କରିବା ମୁର୍ଖାମୀ । କାରଣ ନିର୍ବାଚିତ ପ୍ରାର୍ଥୀ ଦୁର୍ନୀତି ପ୍ରିୟ । ଅନେକ ସଂସ୍ଥାଠାରୁ ନେଇଥାନ୍ତି ଲାଂଚ । କାରଣ କଲେଜ ପାଣ୍ଠିରୁ ଏଭଳି ରାଜକୀୟ ଭାବେ ନିର୍ବାଚନ ପ୍ରଚାର ଅସମ୍ଭବ । ଏହି ପ୍ରାର୍ଥୀମାନେ ସରକାରୀ ସମ୍ପତି ଭଙ୍ଗାରୁଜା କରିବା ସହ ଘଟାଇଥାନ୍ତି ହିଂସା । କ୍ଲାସ୍ ବନ୍ଦ କରିବା ସହ ଅନ୍ୟ ଛାତ୍ର ଛାତ୍ରୀମାନଙ୍କ ପାଠପଢାରେ ସୃଷ୍ଟି କରିଥାନ୍ତି ବ୍ୟାଘାତ ।
ତେବେ ରାଜ୍ୟରେ ହାତଗଣତି କିଛି ଶିକ୍ଷାନୁଷ୍ଠାନ ଅଛି ଯେଉଁଠି ଏହି ହିଂସାତ୍ମକ ନିର୍ବାଚନର ଛିଟା ପଡୁନାହିଁ । ଏହି ଶିକ୍ଷାନୁଷ୍ଠାନ ମାନଙ୍କରେ ନିର୍ବାଚନ ଉପରେ ଲାଗିଛି ଅଙ୍କୁଶ । ଏବଂ ପରୋକ୍ଷ ଭାବରେ ନିୟନ୍ତ୍ରିତ ହୋଇ ନିର୍ବାଚନ ହେଉଛି । କୌଣସି ଗଣ୍ଡଗୋଳ ଏବଂ ହୋ ହଲ୍ଲା ମଧ୍ୟରେ ନହୋଇ ଶାନ୍ତିପୂର୍ଣ୍ଣ ଭାବରେ ନିର୍ବାଚନ ହେଉଛି ।