କନକ ବ୍ୟୁରୋ : ପୁଣି ଫେରିଲା ସିବିଆଇ । ଦୀର୍ଘଦିନର ଶୀଥିଳତା ପରେ ପୁଣିଥରେ ସିବିଆଇ ଆକ୍ଟିଭ ମୋଡକୁ ଆସିଛି । ତାହା ବି ପୁଣି ବିଜେପି ହାଇକମାଣ୍ଡଙ୍କ ଓଡିଶା ଗସ୍ତର କିଛି ଘଣ୍ଟା ମଧ୍ୟରେ । ସିବିଆଇ ବିଜେଡିର ଦୁଇ ବିଧାୟକ ତଥା ପୂର୍ବତନ ମନ୍ତ୍ରୀଙ୍କୁ ନୋଟିସ ଜାରି କରି ରାଜନୈତିକ ତାତିକୁ ବଢାଇ ଦେଇଛି । ଚିଟଫଣ୍ଡ ସଂସ୍ଥା ଲିଙ୍କ୍ ଅଭିଯୋଗରେ ଉଭୟ ନେତାଙ୍କୁ ସିବିଆଇ ନୋଟିସ ଜାରି କରିଥିବା ନେଇ ଖବର ସରବରାହ ସଂସ୍ଥା ଏଏନଆଇ ପକ୍ଷରୁ ସୂଚନା ଦିଆଯାଇଛି । ତେବେ ଶାହାଙ୍କ ଗସ୍ତର କିଛି ଘଣ୍ଟା ମଧ୍ୟରେ ସିବିଆଇ ହଠାତ୍ ଏଭଳି କ୍ରୀୟାଶୀଳ ହେବା ନେଇ ଏବେ ସାଧାରଣରେ ମଧ୍ୟ ପ୍ରଶ୍ନ ଉଠିଛି ।
Kanak News is now on WhatsApp
Join and get latest news updates delivered to you via WhatsApp
ଖାସକରି ନିର୍ବାଚନ ପାଇଁ କାଉଣ୍ଟଡାଉନ ଆରମ୍ଭ ହୋଇଯାଇଥିବା ବେଳେ ସିବିଆଇ ହଠାତ୍ ଏଭଳି କ୍ରିୟାଶୀଳ ହେବା ପଛର କାରଣ କଣ ରହିଛି ତାହାକୁ ନେଇ ଆରମ୍ଭ ହୋଇଛି ତର୍ଜମା । କାରଣ ଗତ ପଞ୍ଚାୟତ ନିର୍ବାଚନର ଠିକ୍ ପୂର୍ବରୁ ସିବିଆଇ ହଠାତ ତତ୍ପରତା ଦେଖାଇବା ସହ ବିଜୁ ଜନତା ଦଳର ବିଧାୟକ ପ୍ରଭାତ ବିଶ୍ୱାଳଙ୍କୁ ଗିରଫ କରିଥିଲା । ଯାହାକୁ ନେଇ ସେତେବେଳେ ରାଜନୈତିକ ବାତାବରଣ ସରଗରମ ହୋଇଥିଲା । ଏପରିକି ନିର୍ବାଚନକୁ ଆଖି ଆଗରେ ରଖି ସିବିଆଇକୁ କେନ୍ଦ୍ର ସରକାର ବ୍ୟବହାର କରୁଥିବା ବିଜେଡି ପକ୍ଷରୁ ସେହି ସମୟରେ ଅଭିଯୋଗ ଅଣାଯାଇଥିଲା । ଯାହା ସିବିଆଇର କାର୍ଯ୍ୟଶୈଳୀ ଉପରେ ପ୍ରଶ୍ନବାଚୀ ସୃଷ୍ଟି କରିଥିଲା ।
ଏହାଛଡା ଗତ କିଛି ଦିନ ଧରି ସିବିଆଇରେ ଯେଉଁ ବିବାଦ ଦେଖା ଦେଇଥିଲା ତାହା ପଛରେ କେନ୍ଦ୍ର ସରକାରଙ୍କ ସମ୍ପୃକ୍ତି ଥିବା ଅଭିଯୋଗ ଆଣିଥିଲେ ବିରୋଧୀ । ଏପରିକି ସିବିଆଇ କାର୍ଯ୍ୟରେ କେନ୍ଦ୍ର ସରକାର ହସ୍ତକ୍ଷେପ କରୁଥିବା ନେଇ ବିରୋଧୀ ଯେଉଁ ଅଭିଯୋଗ ଆଣିଥିଲେ ତାହା ପୂରା ଦେଶରେ ହଟଚମଟ ସୃଷ୍ଟି କରିଥିଲା । ଆଉ ଏସବୁ ଭିତରେ ନରେନ୍ଦ୍ର ମୋଦି ମଧ୍ୟ ଓଡିଶା ଗସ୍ତ ସମୟରେ ଚିଟଫଣ୍ଡ ମାମଲାରେ ରାଜ୍ୟ ସରକାରଙ୍କୁ ପରୋକ୍ଷରେ ଟାର୍ଗେଟ କରିଥିଲେ । ଆଉ ଆଜି ଶାହାଙ୍କ ଗସ୍ତର ପରେ ପରେ ରିଟର୍ଣ୍ଣ କରିଛି ସିବିଆଇ । ଯାହାକୁ ନେଇ ଚର୍ଚ୍ଚା ହେଉଛି, ରାଜନୈତିକ ଉଦ୍ଦେଶ୍ୟ ରଖି ସିବିଆଇକୁ ବ୍ୟବହାର କରୁଛନ୍ତି କେନ୍ଦ୍ର ସରକାର । କାରଣ ଆଗକୁ ୨୦୧୯ ନିର୍ବାଚନ ଥିବାବେଳେ ବିଜେପିର ଫୋକସରେ ରହିଛି ଓଡିଶା । ଆଉ ରାଜ୍ୟର ଶାସକ ଦଳର କିଛି ନେତାଙ୍କ ନାଁରେ ଚିଟଫଣ୍ଡ ସଂସ୍ଥା ସହ ଲିଙ୍କ୍ ନେଇ ଅଭିଯୋଗ ରହିଛି । ତେଣୁ ଆଗାମୀ ନିର୍ବାଚନ ପୂର୍ବରୁ ସିବିଆଇର କାର୍ଯ୍ୟଶୈଳୀ କିଭଳି ରହୁଛି ତାହା ଦେଖିବା ବାକି ରହିଲା ।