ରାଜନୀତି ବିଛଣାରେ କଡ଼ ଲେଉଟାଇଲେ ନବ ଦାସ । ଦମରେ କହୁଥିିଲେ ଛାଡ଼ିବିନି କଂଗ୍ରେସ, ଆଜି ତୁଟାଇଦେଲେ ସବୁ ସମ୍ପର୍କ ।
କାଲିର ହଁ ଆଜିର ନା, କାଲିର ନା ଆଜିର ହଁ । କେତେବେଳେ ବିରୋଧୀ ଦଳ ସରକାରୀ ଦଳ ଶିବିରରେ ତ ଆଉ କେବେ ସରକାରୀ ଦଳ ବିରୋଧୀ ଦଳ ଶିବିରରେ । ସେଥି ପାଇଁ କୁହଯାଏ-ରାଜନୀତୀରେ ଗୋଟିଏ ବିଛଣାରେ ଅନେକ ଅପରିଚିତ ବ୍ୟକ୍ତିଙ୍କୁ ଦେଖିବାକୁ ମିଳେ ।
କନକ ବ୍ୟୁରୋ: ରାଜନୀତିରେ କ’ଣ ସବୁ ଦେଖିବାକୁ ନମିଳେ । କାଲିର ହଁ ଆଜିର ନା, କାଲିର ନାଁ ଆଜିର ହଁ । କେତେବେଳେ ବିରୋଧୀ ଦଳ ସରକାରୀ ଦଳ ଶିବିରରେ ତ ଆଉ କେବେ ସରକାରୀ ଦଳ ବିରୋଧୀ ଦଳ ଶିବିରରେ । ସେଥି ପାଇଁ କୁହଯାଏ-ରାଜନୀତୀରେ ଗୋଟିଏ ବିଛଣାରେ ଅନେକ ଅପରିଚିତ ବ୍ୟକ୍ତିଙ୍କୁ ଦେଖିବାକୁ ମିଳେ । ବର୍ଷ ବର୍ଷ ଧରି ସରକାରଙ୍କୁ ଗାଳି ଦେଉଥିବା ବ୍ୟକ୍ତି ଶେଷ ମୁର୍ହୂତରେ ପ୍ରଶଂସକ ପାଲଟିଜାନ୍ତି । ନିନ୍ଦୁକ ପ୍ରଶଂସକ ହେବା ଏବଂ ପ୍ରଶଂସକ ନିନ୍ଦୁକ ହେବା ରାଜନୀତିର ଏକ ସ୍ୱାଭାବିକ ଘଟଣା । ଆଉ ସେହି ଘଟଣାର ପୁନରାବୃତ୍ତି କରିଛନ୍ତି ଝାରସୁଗୁଡ଼ା ବିଧାୟକ ନବ ଦାସ । ଆଜି ବିଧିବଦ୍ଧ ଭାବେ କଂଗ୍ରେସକୁ ବାଏ ବାଏ କହିବା ପରେ ନବ ଦାସଙ୍କୁ ନେଇ ଚାରିଆଡ଼େ ଚର୍ଚ୍ଚା ଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ବହୁ ଦିନ ଧରି ଦଳବଦଳର ଚର୍ଚ୍ଚା ଆସିଲା ବେଳେ ଝାରସୁଗୁଡ଼ା ନେତା ତଥା ପୂର୍ବତନ କଂଗ୍ରେସର କାର୍ଯ୍ୟକାରୀ ସଭାପତି ନବ ଦାସ ମନା କରି ଆସୁଥିଲେ । କିନ୍ତୁ ଏହି ମନା କରିବା ଭିତରେ ଏକ ଅସ୍ପଷ୍ଟ-ଲୁଚକାଳି ଖେଳ ବାହାରକୁ ଜଳଜଳ କରି ଦେଖାଯାଉଥିଲା । ଯେତେବେଳେ ବାରମ୍ବାର ନବଙ୍କୁ ପଚାରାଯାଉଥିଲା ଆଗକୁ କଣ ହେବ । ସେତେବେଳେ ସେ କୌଣସି ସ୍ପଷ୍ଟ ଉତ୍ତର ଦେଉନଥିଲେ । ଏପରିକି ଗଣମାଧ୍ୟମରେ ହେଉଥିବା ଚର୍ଚ୍ଚାକୁ ମଧ୍ୟ ଖଣ୍ଡନ କରି ପ୍ରେସ୍ ରିଲିଜ୍ ଜରିଆରେ ସ୍ପଷ୍ଟୀକରଣ ରଖିଥିଲେ ନବ ଦାସ । କହିଥିଲେ ‘ମୁଁ କଂଗ୍ରେସ ଦଳ ଛାଡ଼ି ବିଜୁ ଜନତା ଦଳରେ ଯୋଗଦେବା ଅପ୍ରଚାର କରାଯାଉଛି । ‘ମୁଁ ମୋର ଛାତ୍ର ଜୀବନରୁ କଂଗ୍ରେସ ସହିତ ଜଡ଼ିତ ଅଛି । କଂଗ୍ରେସ ଦଳର ଉଥାନ ଓ ପତନ, ଦଳର ନୀତି ଆଦର୍ଶରେ ମୁଁ ଅନୁପ୍ରାଣିତ । ଦଳ ତରଫରୁ ମୋତେ ଯେଉଁ ଦାୟିତ୍ୱ ମିଳିଛି ତାହା ନିଷ୍ଠାର ସହ ତୁଲାଉଛି ଏବଂ ଆଗକୁ ମଧ୍ୟ କାର୍ଯ୍ୟ କରିବି । ତେଣୁ ମୋର କଂଗ୍ରେସ ଦଳ ଛାଡ଼ି ଅନ୍ୟ ଦଳ ଯିବା ପ୍ରଶ୍ନ ଉଠୁନାହିଁ । ଏବଂ ଯେଉଁମାନେ ମୋ ନାଁରେ ଅପପ୍ରଚାର କରୁଛନ୍ତି ସେମାନଙ୍କୁ କ୍ଷାନ୍ତ ରହିବା ପାଇଁ ଅନୁରୋଧ ମଧ୍ୟ କରିଥିଲେ ନବ ଦାସ ।
ଯିଏ ଦିନେ ଗଣମାଧ୍ୟମର ଚର୍ଚ୍ଚାକୁ ନେଇ ଦମରେ କହିଥିଲେ ମୁଁ କଂଗ୍ରେସ ଛାଡ଼ି ଯିବାର ପ୍ରଶ୍ନ ଉଠୁ ନାହିଁ ସିଏ ଆଜି ଦଳକୁ ବାଏ ବାଏ କହିଛନ୍ତି । ଏହାର ଅର୍ଥ ନବ ଦାସ ଯେଉଁ ଛେପ ପକାଇଥିଲେ ତାହାକୁ ପୁନର୍ବାର ଢୋକି ଦେଲେ । ଯାହାକୁ ନେଇ ଏବେ ବିଭିନ୍ନ ମହଲରେ ନବ ଦାସଙ୍କୁ ସମାଲୋଚନାର ପାତ୍ର ହେବାକୁ ପଡ଼ିଛି । ସେ ଯାହା ହେଉ ଓଡ଼ିଶା ବିଧାନସଭାକୁ ଲକ୍ଷ୍ୟ କରି ଯଦି ଆପଣ ବିରୋଧୀ ବା ଶାସକ ଦଳର ବ୍ରାଣ୍ଡ ଭାବୁଥାନ୍ତି ତାହେଲେ ସାବଧାନ । ନେତା ଯେ କୌଣସି ଦଳକୁ ଯାଇ ପାରନ୍ତି । ଆଉ ଯେ କୌଣସି ଦଳରୁ ଟିକେଟ ପାଇପାରନ୍ତି । ଏହାର ଉଦାହରଣ ପାଲଟିଛନ୍ତି ପଶ୍ଚିମ ଓଡ଼ିଶା ତଥା ଝାରସୁଗୁଡ଼ାର ନେତା ନବ ଦାସ ।
ଏହି ଦଳ ବଦଳ ପ୍ରକ୍ରିୟା ୧୯୬୭ ଘଟଣାର ହରିୟାଣର ବିଧାୟକ ଗୟାଲାଲଙ୍କ ଠାରୁ ଆରମ୍ଭ ହୋଇଥିଲା । କାରଣ ଗୟାଲାଲ୍ ୧୫ ଦିନରେ ୩ଥର ଦଳବଦଳ କରିି ରାଜନୀତିରେ ଆୟାରାମ ଗୟାରାମ ପରମ୍ପରା ତିଆରି କରିଥିଲେ । ଯଦି ଆଜି ଦିନର ରାଜନୀତିକୁ ଦେଖିବା, ତାହେଲେ ୭୦ ଦଶକର ସତ, ଆଜି କିଭଳି ଜୀବନ୍ତ ରହିଛି, ତାହା ସହଜରେ ଅନୁମାନ କରିହେବ । କେହି କେହି କୁହନ୍ତି, ରାଜନୀତି ହେଉଛି ଆଇପିଏଲ୍ ମ୍ୟାଚ୍ ଭଳି । ଏଠି ଦେଶ ବଡ ନୁହେଁ କ୍ରିକେଟ ହିଁ ବଡ କଥା । ଆପଣ ଯେ କୌଣସି ଦଳ ପାଇଁ ଖେଳିପାରିନ୍ତି । ଯେଉଁଠି ଆପଣଙ୍କ ଦକ୍ଷତା ହିଁ ପ୍ରସଙ୍ଗ ଭାବରେ ଗ୍ରହଣ କରାଯାଏ । ତେଣୁ କଂଗ୍ରେସକୁ ବାଏ ବାଏ କହି ଆସନ୍ତା ୨୪ରେ ଶଙ୍ଖ ଫୁଙ୍କିବେ ନବ ଦାସ ।