୨୦୦୦ ଠାରୁ ବିଜେପୁରରେ କିଏ କେବେ ମାରିଛି ବାଜି? ମେଂଟ ଥାଇ ବି ହାରିଥିଲା ବିଜେଡି । ନିର୍ବାଚନ ମଣ୍ଡଳୀକୁ କଂଗ୍ରେସର ଗଡ କରିଥିଲେ ସୁବଳ ।
୨୦୦୦ ରୁ ଆରମ୍ଭ କରି ୨୦୧୪ ଯାଏଁ ହୋଇଥିବା ୪ଟି ନିର୍ବାଚନରେ କଂଗ୍ରେସ ନିଜ ଦବଦବା ଦେଖାଇବାରେ ସକ୍ଷମ ହୋଇଥିଲା । ତିନିଥର କଂଗ୍ରେସ ପ୍ରାର୍ଥୀ ଭାବେ ସୁବଳ ସାହୁ ବାଜିମାତ କରିଥିବା ବେଳେ, ଥରୁଟିଏ ମେଂଟରେ ଲଢି ବିଜେଡି ଏଠି ବାଜିମାତ କରିଥିଲା । ନଜର ପକାନ୍ତୁ ୨୦୦୦ ମସିହାରୁ ଆରମ୍ଭ କରି ଆଜି ଯାଏଁ ହୋଇଥିବା ନିର୍ବାଚନରେ କେଉଁ ଦଳର ପ୍ରଦର୍ଶନ କିଭଳି ରହିଲା ।
Kanak News is now on WhatsApp
Join and get latest news updates delivered to you via WhatsApp
ସାରା ଦେଶରେ ମୋଦି ଲହର ଆଉ ଓଡିଶାରେ ନବୀନଙ୍କ ଯାଦୁ ଚାଲିଥିବା ବେଳେ ବିଜେପୁରରେ କିନ୍ତୁ କଂଗ୍ରେସ ନିଜ ଦମ୍ ଦେଖାଇଥିଲା । ଲଗାତର ତୃତୀୟ ଥର ପାଇଁ ବିଜେପୁର ଆସନରୁ ନିର୍ବାଚିତ ହୋଇଥିଲେ ସୁବଳ ସାହୁ । ୧୨ ଜଣ ପ୍ରାର୍ଥୀ ଥିଲେ ବିଜେପୁର ମୈ÷ଦାନରେ । ହେଲେ ସମସ୍ତଙ୍କୁ ପଛରେ ପକାଇ ବାଜି ମାରିଥିଲେ ସୁବଳ । ୫୩ ହଜାର ୨୯୦ ଅର୍ଥାତ୍ ୩୨.୧୫ ପ୍ରତିଶତ ଭୋଟ ପାଇ ବିଧାୟକ ଭାବେ ନିର୍ବାଚିତ ହୋଇଥିଲେ । ବିଜେଡି ହେଭିୱେଟ ପ୍ରସନ୍ନ ଆଚାର୍ଯ୍ୟ ୫୨, ୮୩୨ ଅର୍ଥାତ୍ ୩୧.୮୮ ଭୋଟ ସହ ରହିଥିଲେ ଦ୍ୱିତୀୟ ସ୍ଥାନରେ । ସ୍ୱାଧୀନ ଭାବେ ଅଶୋକ ପାଣିଗ୍ରାହୀ ୧୮ ହଜାର ୨୩୨ ଭୋଟ ପାଇଥିବା ବେଳେ ବିଜେପି ପ୍ରାର୍ଥୀ ଜୟଶଙ୍କର ପଟ୍ଟନାୟକ ପାଇଥିଲେ ୩୦ ହଜ୪ ୧ ଖଣ୍ଡ ଭୋଟ ।
୨୦୦୯ରେ ରାଜ୍ୟରେ ବିଜେଡି ଆଉ ବିଜେପି ମେଂଟ ଭାଙ୍ଗିଯାଇଥାଏ । ଉଭୟ ଦଳ ନିଜ ନିଜ ଦମରେ ଲଢୁଥିଲେ ନିର୍ବାଚନ । ହେଲେ ଏଠି ବି ବାଜି ମାରିଥିଲେ ସୁବଳ ସାହୁ । ଲଗାତର ଦ୍ୱିତୀୟ ଥର ପାଇଁ ବିଧାନସଭାକୁ ହୋଇଥିଲେ ନିର୍ବାଚିତ । ୨୦୦୯ରେ ବିଜେପୁର ମୈଦାନରେ ଥିଲେ ମୋଟ ୭ ଜଣ ପ୍ରାର୍ଥୀ । ୫୬ ହଜାର ୮୬୪ ଅର୍ଥାତ୍ ୪୦.୯୧ ପ୍ରତିଶତ ଭୋଟ ସହ କଂଗ୍ରେସ ପ୍ରାର୍ଥୀ ସୁବଳ ସାହୁ ବିଧାନସଭାକୁ ନିର୍ବାଚିତ ହୋଇଥିଲେ । ଦ୍ୱିତୀୟ ସ୍ଥାନରେ ରହିଥିଲେ ବିଜେଡିର ପ୍ରଭାତ ଆଦିତ୍ୟ ମିଶ୍ର । ପାଇଥିଲେ ୩୪.୪୫ ପ୍ରତିଶତ ଅର୍ଥାତ୍ ୪୭, ୮୯୩ ଭୋଟ । ବିଜେପି କିନ୍ତୁ ତୁଳନାତ୍ମକ ଭାବେ ଢେର ପଛରେ ରହିଥିଲା । ୧୪.୦୨ ପ୍ରତିଶତ ଅର୍ଥାତ୍ ୧୯ ହଜାର ୪୯୩ ଭୋଟ ସହ ତୃତୀୟ ସ୍ଥାନରେ ରହିଥିଲେ ବିଜେପି ପ୍ରାର୍ଥୀ ମହମ୍ମଦ ରଫିକ୍ ।
୨୦୦୪ରେ ରାଜ୍ୟରେ ବିଜେଡି ଆଉ ବିଜେପି ମେଂଟରେ ଲଢୁଥିବା ସତ୍ୱେ ପ୍ରଥମ ଥର ପାଇଁ ସୁବଳ ସାହୁ କଂଗ୍ରେସ ବିଧାୟକ ଭାବେ ନିର୍ବାଚିତ ହୋଇଥିଲେ । ବିଜେପୁର ଲଢେଇ ପାଇଁ ୮ ଜଣ ପ୍ରାର୍ଥୀ ଥିଲେ ନିର୍ବାଚନ ମୈଦାନରେ । ୬୬ ହଜାର ୪୦୭ ଖଣ୍ଡ ଭୋଟ ସହ ପ୍ରଥମ ଥର ପାଇଁ ବିଧାନସଭାକୁ ଆସିଥିଲେ ସୁବଳ ସାହୁ । ଯାହା ଥିଲା ନିଜ ନିର୍ବାଚନୀ କ୍ୟାରିୟରରେ ସେ ପାଇଥିବା ସବୁଠାରୁ ଅଧିକ ଭୋଟ । କାରଣ ୨୦୦୯ ଆଉ ୨୦୧୪ରେ ତାଙ୍କ ଭୋଟ କମିଥିଲା । ସୁବଳଙ୍କ ଠାରୁ ପରାସ୍ତ ହୋଇଥିଲେ ବିଜେଡି ପ୍ରାର୍ଥୀ ଅଶୋକ ପାଣିଗ୍ରାହୀ । ସେ ପାଇଥିଲେ ୪୪ ହଜାର ୪୮୯ ଭୋଟ । ୨୧ ହଜାର ୯୧୮ ଭୋଟରେ ପରାସ୍ତ ହୋଇଥିଲେ ଅଶୋକ, ଯାହା ଥିଲା ମୋଟ ଭୋଟର ୧୭.୮୧ ପ୍ରତିଶତ ।
ଏହି ବର୍ଷ ରାଜ୍ୟରେ କ୍ଷମତାକୁ ଆସିଥିବା ବିଜେଡି-ବିଜେପି ମେଂଟ । ପ୍ରାର୍ଥୀ ଥିବା ଅଶୋକ ପାଣିଗ୍ରାହୀ ବିଧାନସଭାକୁ ନିର୍ବାଚିତ ହୋଇଥିଲେ । ବିଜେଡି ଟିକେଟରେ ସେ ହୋଇଥିଲେ ନିର୍ବାଚିତ । ବିଜେପୁର ନିର୍ବାଚନରେ ଥିଲେ ମୋଟ ୫ ଜଣ ପ୍ରାର୍ଥୀ । ବିଜେଡିରୁ ଅଶୋକ ପାଣିଗ୍ରାହୀ ଲଢୁଥିବା ବେଳେ କଂଗ୍ରେସରୁ ପ୍ରାର୍ଥୀ ଥିଲେ ରିପୁନାଥ ସେଠ । ୫୭ ହଜାର ୨୯୮ ଅର୍ଥାତ୍ ୫୩.୯୯ ପ୍ରତିଶତ ଭୋଟ ପାଇ ଅଶୋକ ପାଣିଗ୍ରାହୀ ବିଜୟୀ ହୋଇଥିଲେ । ୪୪ ହଜାର ୨୦୨ ଅର୍ଥାତ୍ ୪୧.୬୫ ପ୍ରତିଶତ ଭୋଟ ପାଇଥିଲେ ରିପୁନାଥ ସେଠ । ୧୩ ହଜାର ୯୬ ଭୋଟରେ ରିପୁନାଥଙ୍କୁ ପରାସ୍ତ କରିଥିଲେ ଅଶୋକ । ଯାହା ଥିଲା ମୋଟ ଭୋଟର ୧୨.୩୪ ପ୍ରତିଶତ ।