ଡାକ୍ତର ହେବ ତ ଏମିତି ! ରୋଗୀଙ୍କ ପାଇଁ ଭଗବାନ ସାଜିଲେ ଆଦିତ୍ୟ, ୪ କିଲୋମିଟର ପାହାଡ ଚଢି ଆସନ୍ନ ପ୍ରସବାଙ୍କୁ ଷ୍ଟ୍ରେଚରରେ ବୋହି ନେଲେ ହସ୍ପିଟାଲ
କନକ ବ୍ୟୁରୋ : ଅନେକ ସମୟରେ ଡାକ୍ତର ଓ ରୋଗୀ ସେବାକୁ ନେଇ ବିବାଦ ଦେଖା ଦେଇଥାଏ । ହେଲେ ବିବାଦରୁ ଉର୍ଦ୍ଧରେ ରହି ପାହାଡ ଚଢି ରୋଗୀ ସେବା କରି ଅନନ୍ୟ ଉଦାହରଣ ସୃଷ୍ଟି କରିଛନ୍ତି ନୂଆପଡାର ଡାକ୍ତର ଆଦିତ୍ୟ ନାରାୟଣ ଯୋଶୀ । ପାହାଡ ତଳେ ଆମ୍ବୁଲାନ୍ସ ଅଟକି ଯିବାରୁ ୪ କିଲୋମିଟର ପାହାଡ ଚଢି ଆସନ୍ନ ପ୍ରସବାଙ୍କୁ ଚିକିତ୍ସା କରିଥିଲେ ଡାକ୍ତର । ତାପରେ ଗ୍ରାମବାସୀଙ୍କ ସହାୟତାରେ ମହିଳାଙ୍କୁ ଷ୍ଟ୍ରେଚରରେ ଭାର କରି ଆମ୍ବୁଲାନ୍ସ ନିକଟକୁ ସେ ନିଜେ ବୋହି ଆଣିଥିଲେ । ନାରାୟଣଙ୍କ ଏଭଳି ପ୍ରଶଂସନୀୟ କାଯ୍ୟପାଇଁ କୁହାଯାଉଛି ଡାକ୍ତର ହେବ ତ ଏମିତି ।
Kanak News is now on WhatsApp
Join and get latest news updates delivered to you via WhatsApp
ପ୍ରସବ ବେଦନାରେ ଛଟପଟ ହେଉଥିବା ମହିଳାଙ୍କୁ ଷ୍ଟ୍ରେଚର୍ରେ ବୋହି ନିଆଯାଉଥିବା ଚିତ୍ର ହିଁ ବୟାନ୍ କରୁଛି ଉପାନ୍ତ ଇଲାକାରେ ସ୍ୱାସ୍ଥ୍ୟସେବାର ନଗ୍ନଚିତ୍ର । ପାହାଡ ଉପରକୁ ପହଂଚି ପାରିଲାନି ଆମ୍ବୁଲାନ୍ସ, ଆଉ କୌଣସି ଉପାୟ ନପାଇ ବାଧ୍ୟ ହୋଇ ୪ କିଲୋମିଟର୍ ଯାଏଁ ମହିଳାଙ୍କୁ ବୋହି ଆଣିଲେ ସଂପର୍କୀୟ । ଆଉ ଏହି ଘଟଣାରେ ନାୟକର ଭୂମିକା ନେଇଥିଲେ ଡାକ୍ତର ଆଦିତ୍ୟ ନାରାୟଣ ଯୋଶୀ ।
ଘଟଣାଟି ହେଉଛି ନୂଆପଡ଼ା ଜିଲ୍ଲାର ଅପନ୍ତରା ଇଲାକାରେ ଥିବା କାପୁରଗଡ଼ ଗାଁର । ଗାଁର ପୁଲିତା ମାଝୀ, ପ୍ରସବ ଯନ୍ତ୍ରଣା ବଢ଼ିବାରୁ ଆମ୍ବୁଲାନ୍ସକୁ ଫୋନ୍ କରାଯାଇଥିଲା । ହେଲେ ପାହାଡ଼ ଉପରକୁ ଆମ୍ବୁଲାନ୍ସ ଯିବା ସମ୍ଭବ ନହେବାରୁ କିକିରିକିଟା ଗାଁ ନିକଟରେ ଅଟକି ରହିଲା । ଗୋଟିଏ ପଟେ ପ୍ରସୂତୀଙ୍କ ପ୍ରସବ ଯନ୍ତ୍ରଣା, ଆଉ ଗୋଟେ ପଟେ ଗାଁରେ ପହଂଚି ପାରୁନଥାଏ ଆମ୍ବୁଲାନ୍ସ । ଶେଷରେ ଷ୍ଟ୍ରେଚରରେ ଆମ୍ବୁଲାନ୍ସ ଯାଏଁ ପ୍ରସୂତୀ ମହିଳାଙ୍କୁ ବୋହିକି ଆଣିବାକୁ ପଡ଼ିଲା ।ଆମ୍ବୁଲାନ୍ସ ଯୋଗେ ଶେଷରେ ଖଡ଼ିଆଳ ଡାକ୍ତରଖାନାରେ ପହଂଚିଥିଲେ ପୁଲିତା ମାଝୀ । ଆଉ ସେଠି ଅସ୍ତ୍ରୋପଚାର ପରେ ଏବେ ଦୁନିଆ ଦେଖିଛି କୁନି ଶିଶୁ ।
କିଛି ଦିନ ପୂର୍ବେ ମାଲକାନଗିରରେ ଯେଉଁ ଚିତ୍ର ଦେଖିବାକୁ ମିଳିଥିଲା , ସେହି ସମାନ ଚିତ୍ର ନୂଆପଡ଼ାର ଉପାନ୍ତ ଅଂଚଳରେ ଦେଖିବାକୁ ମିଳିଛି ।ଆଉ ଦୁଇଟି କାହାଣୀରେ ନାୟକ ହେଉଛି ଡାକ୍ତର । ପ୍ରଥମେ ଓମ୍କାର ହୋତା ଆଉ ଏବେ ଆଦିତ୍ୟ ଯୋଶୀ । ଉପାନ୍ତ ଇଲାକାରୁ ଆସୁଥିବା ଏହି ଚିତ୍ର ସବୁ ଦେଖିଲେ, ସରକାରଙ୍କ ଭୂମିକା ନେଇ ଗୋଟିଏ ଓଡ଼ିଆ ଢ଼ଗ ଆପଣ ଛାଏଁ ମନକୁ ଚାଲିଆସେ-ମତେ ଯେତେ ମାଠିବୁ ମାଠ୍, ମୁଁ ସେହି ଦରପୋଡ଼ା କାଠ୍ ।