ଅଭିନବ ବିନ୍ଦ୍ରାଙ୍କୁ ମିଳିଲା ସୁଟିଙ୍ଗର ସର୍ବୋଚ୍ଚ ସମ୍ମାନ : ଏହା ପାଇବାରେ ସେ ହେଲେ ପ୍ରଥମ ଭାରତୀୟ
୩୬ ବର୍ଷୀୟ ବିନ୍ଦ୍ରାଙ୍କୁ ଆଇଏସଏସଏଫର ସବୁଠାରୁ ବଡ ପୁରସ୍କାର ‘ବ୍ଲୁ କ୍ରସ୍’ ଦ୍ୱାରା ସମ୍ମାନିତ କରାଯାଇଛି
ଭାରତୀୟ ଅଲମ୍ପିକ୍ ଓ ବିଶ୍ୱ ଚାମ୍ପିଅନ୍ ସୁଟର୍ ଅଭିନବ ବିନ୍ଦ୍ରାଙ୍କୁ ଅନ୍ତର୍ଜାତୀୟ ବନ୍ଧୁକ ଚାଳନା ଖେଳ ମହାସଂଘର ଆଥଲେଟ୍ ସମିତିର ଚେୟାରମ୍ୟାନ୍ ଭାବେ ଭଲ ସେବା ପାଇଁ ଖେଳର ଶୀର୍ଷ ସମ୍ମାନ ଦ୍ୱାରା ସମ୍ମାନିତ କରାଯାଇଛି । ୩୬ ବର୍ଷୀୟ ବିନ୍ଦ୍ରାଙ୍କୁ ଆଇଏସଏସଏଫର ସବୁଠାରୁ ବଡ ପୁରସ୍କାର ‘ବ୍ଲୁ କ୍ରସ୍’ ଦ୍ୱାରା ସମ୍ମାନିତ କରାଯାଇଛି, ଯିଏ କି ଭାରତର ଏକମାତ୍ର ବ୍ୟକ୍ତିଗତ ଅଲମ୍ପିକ୍ ସ୍ୱର୍ଣ୍ଣ ପଦକଧାରୀ ।
Kanak News is now on WhatsApp
Join and get latest news updates delivered to you via WhatsApp
ବିନ୍ଦ୍ରା ତାଙ୍କ ଟ୍ୱିଟରରେ ଲେଖିଛନ୍ତି କି, “ମ୍ୟୁନିଖରେ ଆଜି ସାଧାରଣ ସଭାରେ ଆଇଏସଏସଏଫର ସବୁଠାରୁ ବଡ ପୁରସ୍କାର ‘ବ୍ଲୁ କ୍ରସ୍’ ପ୍ରାପ୍ତ କରି ମୁଁ ବହୁତ କୃତଜ୍ଞ ଅନୁଭବ କରୁଛି ।” ବିନ୍ଦ୍ରାଙ୍କ ପରେ ଏବେ ମହାନ ଆମେରିକୀୟ ସୁଟର୍ କିମ୍ବରଲେ ରୋଡେଙ୍କୁ ଏହି ପଦ ପାଇଁ ଚୟନ କରାଯାଇଛି । ବିନ୍ଦ୍ରା ୨୦୦୮ ବେଂଜିଙ୍ଗ ଅଲମ୍ପିକରେ ୧୦ ମିଟର ଏୟାର ରାଇଫଲ ପ୍ରତିଯୋଗିତାରେ ସ୍ୱର୍ଣ୍ଣ ପଦକ ଜିତି ଇତିହାସ ରଚିଥିଲେ । ସେ ୨୦୧୦ରୁ ୨୦୧୪ ପର୍ଯ୍ୟନ୍ତ ଆଇଏସଏସଏଫ ଆଥଲେଟ୍ ସମିତିର ସଦସ୍ୟ ଓ ୨୦୧୪ରୁ ୨୦୧୮ ପର୍ଯ୍ୟନ୍ତ ଚେୟାରମ୍ୟାନ୍ ରହିଛନ୍ତି । ବିନ୍ଦ୍ରାଙ୍କୁ ତାଙ୍କ କାର୍ଯ୍ୟକାଳ ସମୟରେ ଜାନୁୟାରୀ ୨୦୧୬ରେ ‘ପ୍ରେସିଡେଣ୍ଟସ୍ ବଟନ୍’ ଓ ‘ଡିପ୍ଲୋମା ଅଫ୍ ଅନର’ ଦ୍ୱାରା ସମ୍ମାନିତ କରାଯାଇଥିଲା । ବିନ୍ଦ୍ରାଙ୍କ ଜୀବନ ଉପରେ ଅଭିନେତା ହର୍ଷବର୍ଦ୍ଧନ କପୁରଙ୍କୁ ନେଇ ବାୟୋପିକ୍ ନିର୍ମାଣ କରାଯାଉଛି ।