କନକ ବ୍ୟୁରୋ : ଭାରତରେ ଅଭିନନ୍ଦନ ବର୍ତମାନ । ପାକିସ୍ତାନରୁ ଫେରିଲେ ୱିଙ୍ଗ କମାଣ୍ଡର ଅଭିନନ୍ଦନ ବର୍ତମାନ । ୨ ଦିନ ଧରି ପାକ୍ କବଜାରେ ରହିବା ପରେ ଆଜି ଭାରତ ଫେରିଛନ୍ତି ବୀର ଯବାନ ଅଭିନନ୍ଦନ । ରାତି ପ୍ରାୟ ୯ଟା ୨୫ରେ ୱାଘା ବର୍ଡର ଦେଇ ସେ ଭାରତ ଫେରିଛନ୍ତି । ଯେଉଁ ମୁହୁର୍ତକୁ ଆଜି ସାରାଦେଶ ଅପେକ୍ଷା କରିଥିଲା, ସେଥିରେ ଅନେକ ସମୟ ବିଳମ୍ବ ହୋଇଥିଲା । ଭାରତୀୟ ୱିଙ୍ଗ ପାଇଲଟଙ୍କୁ ଫେରାଇବା ନେଇ ଦୁଇ ଦେଶ ମଧ୍ୟରେ କାଗଜ ପତ୍ର ଯାଂଚ୍ ପ୍ରକ୍ରିୟା ଦୀର୍ଘ ସମୟ ଧରି ଚାଲିଥିଲା ।
Kanak News is now on WhatsApp
Join and get latest news updates delivered to you via WhatsApp
ସାଢେ ୬ଟାରୁ ଅଭିନନ୍ଦନଙ୍କୁ ପାକିସ୍ତାନ, ଭାରତକୁ ହସ୍ତାନ୍ତର ପ୍ରକ୍ରିୟା ଆରମ୍ଭ କରିଥିବା ବେଳେ ଏହି ପ୍ରକ୍ରିୟା ରାତି ସାଢେ ୯ଟା ଯାଏଁ ଚାଲିଥିଲା । ଶେଷରେ ରାତି ପ୍ରାୟ ସାଢେ ୯ଟାରେ ପାକିସ୍ତାନ, ୱାଘା ବର୍ଡରରେ ଅଭିନନ୍ଦନଙ୍କୁ ଭାରତକୁ ହସ୍ତାନ୍ତର କରିଥିଲା । ଅଭିନନ୍ଦନଙ୍କୁ ହସ୍ତାନ୍ତର ପରେ ତାଙ୍କର ଏସଓପି ଅନୁଯାୟୀ ସ୍ୱାସ୍ଥ୍ୟ ପରୀକ୍ଷା କରାଯିବ ବୋଲି ବାୟୁସେନା କହିଛି । ସ୍ୱାସ୍ଥ୍ୟପରୀକ୍ଷା ପରେ ଅଭିନନ୍ଦନଙ୍କୁ ଅମ୍ରିତସର ବିମାନ ବନ୍ଦରରୁ ସ୍ୱତନ୍ତ୍ର ବିମାନରେ ଦିଲ୍ଲୀ ଅଣାଯିବା କାର୍ଯ୍ୟକ୍ରମ ରହିଛି ।
ସେପଟେ ଅଭିନନ୍ଦନ, ଭାରତ ଫେରିବା ପରେ ସାରା ଭାରତରେ ଉତ୍ସାହର ମାହୋଲ ଦେଖିବାକୁ ମିଳିଛି । ଭାରତ ମାଟିର ବୀର ଯୋଦ୍ଧା ପାଇଲଟ୍ ଅଭିନନ୍ଦନଙ୍କୁ ୨ ଦିନ ପରେ ଫେରାଇଦେଇଛି ପାକିସ୍ତାନ । ସକାଳ ୭ରୁ ରାତି ପ୍ରାୟ ସାଢେ ୯ ଟା । ଅଭିନନ୍ଦନଙ୍କୁ ଅଭିନନ୍ଦନ ଜଣାଇବାକୁ ସାଢେ ୧୪ ଘଂଟାର ଅପେକ୍ଷା । ୱିଙ୍ଗ କମାଣ୍ଡର ଅଭିନନ୍ଦନ ବର୍ତମାନଙ୍କୁ ଭାରତକୁ ଫେରାଇବା ନେଇ ଗତକାଲି ପାକିସ୍ତାନ ଘୋଷଣା କରିବା ପରେ ସମସ୍ତଙ୍କ ନଜର ଚାହିଁରହିଥିଲା ବୀର ଯବାନଙ୍କ ଫେରିବା ବାଟକୁ । ଏଥିପାଇଁ ଭାରତ-ପାକ୍ ସୀମା ୱାଘା ବର୍ଡରରେ ସକାଳୁ ସକାଳୁ ଜମିଥିଲା ଗଣମାଧ୍ୟମ ଏବଂ ଲୋକଙ୍କ ଭିଡ ।