ଓଡିଶା ସଂସ୍କୃତିକୁ ନିନ୍ଦିଲେ ବୈଜୟନ୍ତଙ୍କ ବନ୍ଧୁ ! ମହାପ୍ରଭୁ ଶ୍ରୀଜଗନ୍ନାଥଙ୍କ ଉପରେ ଉଠାଇଲେ ସବୁଠୁ ବଡ ପ୍ରଶ୍ନ, ନିନ୍ଦା କଲା ଓଡିଶା
କନକ ବ୍ୟୁରୋ : ଶ୍ରୀଜଗନ୍ନାଥ ହେଉଛନ୍ତି ବଙ୍ଗାଳୀଙ୍କର । କଳିଙ୍ଗର ଶାସକମାନେ ଜଗନ୍ନାଥଙ୍କୁ ବେଙ୍ଗଲରୁ ଚୋରାଇ ଆଣିଛନ୍ତି । ଓଡିଶା ବାସୀଙ୍କ ଆରାଧ୍ୟ ଦେବତା ଶ୍ରୀଜଗନ୍ନାଥଙ୍କୁ ନେଇ ପୂର୍ବରୁ ଏଭଳି ଅନେକ ବିବାଦୀୟ ଟ୍ୱିଟ୍ କରିଛନ୍ତି ବୈଜୟନ୍ତଙ୍କ ହେଲିକପ୍ଟରରେ ବୁଲୁଥିବା ସାଥୀ ଅଭିଜିତ୍ ଆୟାର । ଏପରିକି ଓଡିଶାକୁ ନୀଚା ଦେଖାଇବାକୁ ଯାଇ କହିଛନ୍ତି, ଓଡିଶାକୁ ବଙ୍ଗାଳି ମାନେ ଆବିଷ୍କାର କରିଥିଲେ । ଓଡିଶାର ସ୍ୱତନ୍ତ୍ରତା କିଛି ନାହିଁ, ଏହା ବେଙ୍ଗଲର ଏକ ଅଂଶ । ତେବେ ଜଗନ୍ନାଥ ଓ ଓଡିଶା ସର୍ମ୍ପକରେ ୨୦୧୭ ମସିହାରେ ଟୁଇଟ୍ କରି ଏଭଳି ଅରୁଚିକର ମନ୍ତବ୍ୟ ଦେଇଥିଲେ ଅଭିଜିତ । ଯାହାକୁ ନେଇ ଏବେ ଓଡିଶାରେ ଝଡ ସୃଷ୍ଟି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଓଡିଶାର ପ୍ରତ୍ୟେକ ବ୍ୟକ୍ତି ଅଭିଜିତଙ୍କ ଏହି ପୁରୁଣା ପୋଷ୍ଟକୁ ନେଇ ତାଙ୍କୁ ନିନ୍ଦା କରିବା ସହ ଗିରଫ କରିବାକୁ ଦାବି କରିଛନ୍ତି । ଏପରିକି ଏହାକୁ ନେଇ ବିଧାନସଭାରେ ମଧ୍ୟ ତାତି ଦେଖିବାକୁ ମିଳିଛି । ଏଥିପାଇଁ ଗୃହ ମଧ୍ୟରେ ବିଜେଡି ସଭ୍ୟ ମାନେ ହଟ୍ଟଗୋଳ ମଧ୍ୟ କରିଛନ୍ତି । ବରିଷ୍ଠ କଂଗ୍ରେସ ନେତା ତାରା ପ୍ରସାଦ ବାହିନୀପତି କହିଛନ୍ତି, ଅଭିଜିତଙ୍କ ପରମ୍ପରା ବୋଧହୁଏ ଠିକ୍ ନାହିଁ । ଓଡିଆ ଜାତିକୁ କେହି ଆବିଷ୍କାର କରିନାହାନ୍ତି । ଜଗନ୍ନାଥ ପୂରା ବିଶ୍ୱର ଦେବତା । ତେଣୁ ଅଭିଜିତଙ୍କ କଥାକୁ ଏତେ ଗୁରୁତ୍ୱ ଦେବାର ଆବଶ୍ୟକତା ନାହିଁ । ଏହାଛଡା ତାଙ୍କର ମାନସିକ ବିକୃତି ଘଟିଛି ଏପରିକି ସେ ପାଗଳ ହୋଇ ଯାଇଛନ୍ତି । ତେଣୁ ପାଗଳ କୁକୁରକୁ ଯେପରି ବାନ୍ଧିକି ଚିକିତ୍ସା କରାଯାଏ ଠିକ୍ ସେହିଭଳି ତାଙ୍କୁ କରାଯିବାର ଆବଶ୍ୟକତା ରହିଛି ।
ସେହଭିଳି ଅଭିଜିତଙ୍କ ଟ୍ୱିଟ ପ୍ରସଙ୍ଗରେ ବୈଜୟନ୍ତଙ୍କ ପାଇଁ ଓକିଲାତି କରିଛନ୍ତି ଦାମ ରାଉତ । ସେ କହିଛନ୍ତି, ଜଗନ୍ନାଥ ହେଉଛନ୍ତି ଓଡିଶାର ସ୍ପନ୍ଦନ । ତେବେ ଜଗନ୍ନାଥଙ୍କୁ ଦେଖିବାକୁ ବଙ୍ଗଳାରୁ ୬୫ ପ୍ରତିଶତ ଭକ୍ତ ଆସିଥାନ୍ତି । ତା ଅର୍ଥ ନୁହେଁ ଜଗନ୍ନାଥ ବଙ୍ଗଲାର । ଅଭିଜିତ ଜଣେ ଅଜ୍ଞାନୀଙ୍କ ଭଳି କଥା କହିଛନ୍ତି । ଜଣେ ବନ୍ଧୁ ଅନ୍ୟ ଜଣେ ବନ୍ଧୁଙ୍କୁ ବୁଲାଇବାକୁ ଆଣିଛନ୍ତି । ତେବେ ଏଥିରେ ବୈଜୟନ୍ତଙ୍କର କଣ ଦୋଷ ବୋଲି କହିଛନ୍ତି ଦାମ । ସେହିଭଳି ବିନାୟକ ଦାସ ମହାପାତ୍ର କହିଛନ୍ତି, ଏଭଳି ମନ୍ତବ୍ୟ ଆଦୌ ଠିକ୍ ନୁହେଁ । ଯେଉଁମାନଙ୍କର ଜଗନ୍ନାଥଙ୍କ ବିଷୟରେ ଧାରଣା ନାହିଁ ସେମାନେ ଏପରି କହିବା ଠିକ୍ ନୁହେଁ । ଆଇନ ଅନୁଯାୟୀ ସେମାନଙ୍କୁ ଦଣ୍ଡ ଦେବା ଆବଶ୍ୟକ । ଏଭଳି କହି ଅଭିଜିତ ପୂରା ଓଡିଆ ଜାତିିକୁ ଅପମାନ କରିଛନ୍ତି ।
ଅଭିଜିତଙ୍କ ଏଭଳି ମନ୍ତବ୍ୟ ଜଗନ୍ନାଥ ପ୍ରେମୀଙ୍କୁ ଆଘାତ ପହଞ୍ଚାଇ ଥିବା ବେଳେ କିନ୍ତୁ ଏହା ବୈଜୟନ୍ତଙ୍କୁ ବୋଧହୁଏ ଫରକ ପଡିନଥିଲା । ଏପରିକି ଯେଉଁ ବ୍ୟକ୍ତି ଓଡିିଶା ତଥା ଶ୍ରୀଜଗନ୍ନାଥଙ୍କୁ ନେଇ ଏଭଳି ଟ୍ୱିଟ କରୁଛନ୍ତି ତାଙ୍କୁ ନିଜ ହେଲିକପ୍ଟରରେ ବସାଇ ଚିଲିକାର ନୋ ଫ୍ଲାଇଂ ଜୋନରେ ଉଡାଇବାକୁ ଭୁଲିନଥିଲେ ବୈଜୟନ୍ତ । ଏପରିକି ଯେଉଁ ଜଗନ୍ନାଥଙ୍କୁ ନେଇ ଅଭିଜିତ ପୂର୍ବରୁ ପ୍ରଶ୍ନ ଉଠାଇଥିଲେ ସେହି ଜଗନ୍ନାଥ ମନ୍ଦିରକୁ ଦେଖାଇବା ପାଇଁ ଆକାଶମାର୍ଗରୁ ନିଜ ହେଲିକପ୍ଟରରେ ବସାଇ ବୁଲାଇଥିଲେ ବୈଜୟନ୍ତ । ଯାହାର ଭିଡିଓ ଟ୍ୱିଟରରେ ସେୟାର କରିଥିଲେ ଅଭିଜିତ ଆୟାର ମିତ୍ର । ଏପରିକି ସେ କୋଣାର୍କ ମନ୍ଦିରର କାରୁକାର୍ଯ୍ୟକୁ ନିନ୍ଦା କରିବା ସହ ଓଡିଆଙ୍କ ଧର୍ମୀୟ ଭାବନାକୁ ମଧ୍ୟ ଆଘାତ ଦେଇଛନ୍ତି । ମନ୍ଦିରରେ ଖୋଦିତ ହୋଇଥିବା କାମଉଦ୍ଦୀପକ ଚିତ୍ରକୁ ନେଇ ସେ ସମାଲୋଚନା କରିଛନ୍ତି । ମନ୍ଦିରରେ ଏପରି ଅଶ୍ଳୀଳ ଚିତ୍ର ଖୋଦିତ ହୋଇଛି, ଏହା କିପରି ଏକ ପବିତ୍ର ସ୍ଥାନ ହୋଇପାରିବ ବୋଲି ସେ ଭିଡ଼ିଓରେ କହିଛନ୍ତି । ଏପରିକି ଏଭଳି ଅଶ୍ଳୀଳ ଚିତ୍ର ଆମ ନୂଆ ରାମମନ୍ଦିରରେ ରହିବ ନାହିଁ ବୋଲି କହିଥିଲେ । ଜଗନ୍ନାଥ ସଂସ୍କୃତି, ଓଡିଶା ତଥା ଓଡିଶାର ମନ୍ଦିରକୁ ନେଇ ଅପମାନସୂଚକ ମନ୍ତବ୍ୟ ଦେଉଥିବା ଅଭିଜିତଙ୍କୁ କିଭଳି ହେଲିକପ୍ଟରରେ ବସାଇ ବୈଜୟନ୍ତ ବୁଲାଇଲେ ତାହା ଏବେ ସାଧାରଣ ଲୋକଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି ।