ପୁଣି ପୁରୀରେ ଫୁଟିଲା ଗୁଳି । ବାଟଗାଁ ନିକଟରେ ଗୁଳିକାଣ୍ଡ, ଜଣେ ଗୁରୁତର
କନକ ବ୍ୟୁରୋ : ପୁଣି ପୁରୀରେ ଫୁଟିଲା ଗୁଳି । ପୁରୀ ସଦର ବାଟଗାଁ ନିକଟରେ ହୋଇଛି ଏହି ଗୁଳିକାଣ୍ଡ । ଦୁବୁତ୍ତଙ୍କ ଗୁଳିମାଡ଼ରେ ଜଣେ ଗୁରୁତର ହୋଇଛନ୍ତି । ଗୁରୁତର ଜଣକ ହେଉଛନ୍ତି ଗଙ୍ଗାଧର ଭୋଳ । ଗୁରୁତର ଅବସ୍ଥାରେ ତାଙ୍କୁ କଟକ ସ୍ଥାନାନ୍ତର କରାଯାଇଛି । ତେବେ ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ଗୁଳିକାଣ୍ଡ ହୋଇଛି ବୋଲି ସନ୍ଦେହ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଆହତ ହୋଇଥିବା ୪୭ ବର୍ଷିୟ ଗଙ୍ଗାଧର ଭୋଳ ଆଜି ସକାଳ ୮ଟା ପରେ ମୋଟରସାଇକେଲ୍ ଯୋଗେ କାଠପୋଲ ନିକଟସ୍ଥ ଇଟାଭାଟିକୁ ଯାଉଥିଲେ । ସେତିକିବେଳେ ତିନୋଟି ବାଇକ୍ ଯୋଗେ ଆସି ୭ରୁ ୮ଜଣ ବ୍ୟକ୍ତି ତାଙ୍କୁ ଠେଲାପେଲା କରିବା ସହ ଗୁଳି ଚଳାଇଥିଲେ । ଗୁଳିଟି ତାଙ୍କର ବାମ ଜଙ୍ଘରେ ବାଜିବାରୁ ସେ ଆହତ ହୋଇ ପଡ଼ି ଯାଇଥିଲେ ।
ଚିକିତ୍ସା ପାଇଁ ସଦର ଥାନା ଅନ୍ତର୍ଗତ ବାଟଗାଁ’ ନିବାସୀ ଗଙ୍ଗାଧରଙ୍କୁ ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ତାଙ୍କ ଜଙ୍ଘରେ ଗୁଳି ପଶି ରହିଥିବାରୁ ଏବେ ସେଠାରୁ ତାଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରୁ ଗୁଳି ଓ ଖୋକା ଉଦ୍ଧାର କରାଯାଇଛି । ପୂର୍ବ ଶତ୍ରୁତା ଯୋଗୁଁ ଗୁଳିକାଣ୍ଡ ଘଟିଥିବା କୁହାଯାଉଛି । ପୁଲିସ ତଦନ୍ତ ଜାରି ରଖିଛି ।